Azərbaycanda dövlət qulluqçuları arasında qadınların xüsusi çəkisi 30% təşkil edir

Bakı/05.03.21/Turan: 8 mart Beynəlxalq Qadınlar bayramı öncəsi Dövlət Statistika Komitəsi ölkə həyatının müxtəlif sahələrində qadınların fəaliyyətinə dair statistik göstəriciləri açıqlayıb.  

Göstəricilərə əsasən, 2021-ci ilin əvvəlinə ölkə əhalisinin ümumi sayının 50,1 faizini qadınlar təşkil edib. Ötən il doğulmuş 126,6 min körpədən 46,7 faizi qız uşaqlarının payına düşüb.

Ölkənin ümumi təhsil müəssisələrində müəllimlərin 81,0, orta ixtisas təhsil müəssisələrində 77,9, ali təhsil müəssisələrində 54,8 faizini, həkimlərin isə üçdə ikisini qadınlar təşkil edir.

Ümumi təhsil müəssisələrində təhsil alanların 46,4 faizi, orta ixtisas təhsil müəssisələrində oxuyanların 62,4 faizi, ali təhsil müəssisələrinin tələbələrinin 48,9 faizi qızlardır.

Məlumata görə, elmi işçilərin 58,1 faizini qadınlar təşkil edir. Son 10 ildə qadın elmlər doktorlarının sayı 2,6 dəfə, fəlsəfə doktoru elmi dərəcəsi olanların sayı isə 2,3 dəfə artıb. Milli Elmlər Akademiyasının həqiqi üzvlərindən 7-si, müxbir üzvlərindən isə 10-u qadındır.

Dövlət qulluğunda çalışanlar arasında qadınların xüsusi çəkisi 29,0 faiz, sahibkarlar arasında isə 21,3 faizdir.

Milli Məclisdə qadın deputatların sayı da artır, əgər 1990-cı ildə bütün deputatların 4,3 faizini, 2000-ci ildə 10,7 faizini qadınlar təşkil edirdisə, hazırda qadın deputatların xüsusi çəkisi 18,3 faizə çatıb. -05D-