Bakı Apellyasiya Məhkəməsi “Azur” və FB-Company şirkətləri arasındakı məhkəməyə jurnalistlərin buraxılmaması barədə qərarını ləğv edib

Bakı Apellyasiya Məhkəməsində (BAM) FB-Сompany kommersiya şirkətinin sahibləri Anar Qəribov və Ağa Əliyevin ( onların hüquqlarını vəkil Ənvər Əmirəliyev müdafiə edir)  Fuad Rzayev və Babək Babayevə məxsus  “Azur” Ticarət Mərkəzinə qarşı iddiasına baxılır. Fevralın 1-də, üçüncü iclasda hakim Vüsalə Baxışova icarəyə götürülmüş ticarət zalından sahiblərin icazəsi olmadan çıxarılmış brend malların sayı, dəyəri, vəziyyəti və onların geyim üçün yararsız olan yerdə saxlanması ilə  bağlı üçüncü ekspertizanın keçirilməsinə qərar qəbul edib. Dördillik münaqişə zamanı təkcə bu epizoda görə Qəribova  və Əliyevə yarım milyon manatlıq ziyan dəyib. Həmçinin Cinayət Məcəlləsinin bəzi bəndlərinin pozulması halları baş verib.  Əsasən, iddiaçılar “Azur”un vəzifəli şəxslərinin qanunazidd hərəkətləri nəticəsində öz mallarının bir hissəsinin itdiyini və bir hissəsinin korlandığını hesab edirlər.

Turan prosesin  xüsusiyyəti kimi məhkəmə çəkişməsinin ticarət yerinin icarədarları və “Azur” firmasının iki sahibi (biri dövlət məmurunun oğludur) arasında baş verməsini hesab edir. Özbaşınalıqdan əziyyət çəkənlərin əlində ticarət yerinin  (Azur) sahibləri Rzayev və Babayevlə bağlanmış onillik müqavilə var. Onlar müqavilənin bir neçə bəndini pozublar. Rzayev və Babayev müqavilənin şərtlərini kobud şəkildə pozaraq kirayəçiləri çıxarıblar.

Əgər BAM müqaviləni pozanların mümkün təzyiqinə məhəl qoymadan zərərçəkənlərin xeyrinə qərar çıxararsa, BAM-ın qərarını Azərbaycanda məhkəmə islahatları üzrə dövlət proqramının uğuru hesab etmək olar.

Hakimin sözlərinə görə, on cilddən ibarət iş materiallarında qarışıqlıq hökm sürür, məsələn, o, malların alqı-satqısı ilə bağlı birinci instansiya məhkəməsinin son iclasında təqdim olunmuş sənədləri tapmayıb. Hakim FB-Company nümayəndəsinə təqdim edilmiş sənədlərin yerini iş materiallarında müəyyənləşdirməyi və birinci instansiya məhkəməsinə təqdim olunmuş bütün sübutların səhifəsini tərtib etməyi tapşırıb. Zərərçəkən tərəf oğurluqdan əvvəl və yararsız otaqda yerləşdirildikdən sonra firmanın mal və avadanlıqlarının vəziyyətini məhkəməyə izah etmək üçün şahidləri - şirkətin əməkdaşlarını məhkəməyə gətirib.  Şahidlər həmçinin onların imzaladığı və məhkəməyə təqdim olunmuş, iddiaçının haqlı olduğunu sübut edən 1600-dən çox sənədin həqiqiliyini təsdiqləyə bilər.

İclasın başlandığını elan edən hakim Baxışova BAM-ın iclaslarında iştirak etmək istəyən jurnalistlərdən məhkəməyə müraciət daxil olduğunu bildirib. Əlavə edirik ki, Turan bu proses üzrə ikinci iclasda jurnalistlərin iştirakını qadağan edən Baxışovanın hərəkətinin qanuni olub-olmaması barədə sorğu ilə BAM sədrinə məktub göndərib.

Hakim proses iştirakçılarının rəyini soruşub, qeyd edib ki məhkəmə prosesi öz kommersiya sirləri olan şirkətlər arasında gedir. Hakim əlavə edib ki, şirkətlərin gəlirləri barədə sənədlər kommersiya sirri hesab edilə bilər. Zərərçəkən tərəf mətbuatın prosesə buraxılmasına etiraz etməyib, çünki onların fəaliyyətində ictimaiyyətdən gizli bir şey yoxdur. Ancaq “Azur” şirkətinin müdafiəçisi qapalı prosesin keçirilməsini tələb etdi. Bunun səbəbilə bağlı Qəribovun sualının cavabında müdafiəçi deyib ki,  icarə haqqında müqavilə və onunla bağlı hesablaşmalar kommersiya sirri sayılır. Qısa məşvərətdən sonra hakim "hələlik " prosesi açıq elan etmək qərarına gəlib və əlavə edib ki, bəzi hallarda iclaslar mətbuatın iştirakı olmadan keçirilə bilər.

Sonra “Azur” firması tərəfindən icarədarlara dəyən zərərin dəyərləndirilməsi müzakirə olunub.  Hakim ticarət zalından çıxarılmış və uyğun yerdə saxlanmadığına görə yararsız vəziyyətə düşmüş malların – brend geyimlərin təkrar ekspertizası ilə bağlı tərəflərin istəyini xatırladıb.  İddiaçının vəkili Əmirəliyev çıxarılmış malların xüsusiyyətləri, dəyəri və kodları barədə məlumat verib. Bunun əsasında icarədarlara dəymiş ziyanı müəyyən etmək olar. Xatırladaq ki, əvvəllər bu malların qiymətləndirilməsi 2021-ci ildə Ədliyyə Nazirliyinin Dövlət Ekspertiza Mərkəzinin mütəxəssisləri tərəfindən aparılıb. Bu Mərkəzin eksperti əvvəllər məhkəmədə iştirak edib. Ekspertiza əmlaka 503 662 manat ziyan dəydiyini təsdiqləyib. Bundan əlavə, zərərçəkən tərəf 410 994 manatlıq malın itdiyini və əldə edilməmiş mənfəətdən şirkətə 390 760 manat məbləğində ziyan dəydiyini bildirir.

Əmlakı – üzərində qiymət etiketləri olan satılmamış geyim və ayaqqabıları hansı komissiyanın və hansı idarənin dəyərləndirəcəyi barədə hakimin sualının müzakirəsi zamanı “Azur” şirkətinin müdafiəçisi bu şirkətin binasında saxlanılan malların təkrar qiymətləndirilməsinə qarşı çıxıb. Lakin hakim məhkəmə prosesinin tez həll olunması üçün ekspertizanın keçirilməsini vacib hesab edir. O deyib ki, hər iki tərəf mütəxəssisləri cəlb etməlidir. “Azur” şirkətinin vəkili birinci ekspertizanın nəticəsini qənaətbəxş hesab edərək təkrar ekspertizanın lazım olmadığını bir daha bildirib. Bu zaman qəribə  vəziyyət yaranıb- bundan öncə bütün əvvəlki iclaslarda əvvəlki ekspertizanın nəticələrilə razılaşmayan “Azur” nümayəndəsi qəflətən bildirib ki, əvvəlki ekspert qiymətləndirməsinin nəticələrinə baxmaq kifayətdir.  Buna cavab olaraq FB-Company nümayəndəsi onların dəvət etdikləri ekspertlərin əməyini ödəməyə hazır olduğunu bildirib, qarşı tərəf isə (“Azur”) ekspertizanın keçirilməsinə maneçilik törətməsin. Vəkil Əmirəliyevin sözlərinə görə, “Azur” şirkəti icarədarların əmlakını çıxardığını etiraf edir, sadəcə, ziyanın yekun məbləğini müəyyən etmək lazımdır. Bundan ötrü zərərçəkən tərəf malların təkrar ekspertizasına israr edir.

Müzakirədən sonra hakimlər ekspertlərin iş prosesinin videoqeydi aparılmaqla şirkətin mallarının təkrar ekspertizası ilə bağlı zərərçəkən tərəfin iddiasını təmin etmək qərarına gəliblər. Hakim digər tərəfə ekspertlərin işləməsi üçün şəraiti təmin etməyi həvalə edib.

Bu iş üzrə BAM-ın növbəti iclası martın 1-nə təyin edilib.

Proses haqqında əvvəlki məqalələr:

• “Azure” Ticarət Mərkəzinin günahı ucbatından bir milyon manatdan çox iflasa uğradığını bildirən biznesmenin iddiası üzrə məhkəmə başlayıb
• Bakı Apellyasiya Məhkəməsi mətbuatın FB-Company-nin Azure Ticarət Mərkəzinə qarşı iddiası üzrə prosesi müşahidə etməsini qadağan edib