Beynəlxalq Bankın keçmiş rəhbəri bəraət istəyir

“Azərbaycan Beynəlxalq Bankı” ASC-nin keçmiş sədri Cahangir Hacıyev bazar ertəsi məhkəmədə son sözlə çıxış edərək ona bəraət verilməsini xahiş edib.

O bildirib ki, “heç bir təqsiri yoxdur”, ABB-nin kreditlərinin hesabına isə müəssisələr açılıb. C.Hacıyev hesab edir ki, bu kreditlər “problemli” sayıla bilməz, çünki onların ödəmə vaxtı bitməyib.

ABB-nin böyük borclarına gəlincə, C.Hacıyev hesab edir ki, bu barədə həmin kreditləri almış müəssisələri idarə edən maliyyə naziri Samir Şərifovdan soruşmaq lazımdır

C.Hacıyev ona və ailə üzvlərinə qarşı “hüquq-mühafizə terroru”na son qoyulmasına çağırıb.

Məhkəmə hökmün elan olunmasını qeyri-müəyyən vaxta təxirə salıb.

Keçmiş bankirin vəkili Aqil Layıcov hesab edir ki, məhkəmə C.Hacıyevin günahını sübuta yetirməyib, ibtidai və məhkəmə istintaqı obyektiv olmayıb.

Onun sözlərinə görə, C.Hacıyevin hüquqlarının pozulmasından Avropa İnsan Hüquqları Məhkəməsinə bir sıra şikayətlər verilib.

Əgər məhkəmə ittiham hökmü çıxararsa əsas iş üzrə də şikayət veriləcək.

Xatırladaq ki, bundan öncə prokuror C.Hacıyevin 17 il azadlıqdan məhrum edilməsini istəyib.

* C.Hacıyevlə yanaşı ABB-nin filiallarının rəhbərləri İlqar Abdullayev, Yusif Ələkbərov, İbrahim Hüseynov, Anar Sultanov, Məhəmməd Cahangirov, Kənan Orucov, Azad Cavadov da məhkəmə qarşısında dayanıb.

Onlar CM-in 179.3.1, 179.3.2 (mütəşəkkil qrup tərəfindən külli mirdarda mənimsəmə),  308.2 (vəzifə səlahiyyətindən sui-istifadə ağır nəticələrə səbəb olduqda), 309.2 (vəzifə səlahiyyətini aşma ağır nəticələrə səbəb olduqda), 313 (vəzifə saxtakarlığı), 228.1 və 228.4 (odlu silahın qanunsuz əldə edilməsi, ötürülməsi, satışı, saxlanması, daşınması və ya gəzdirilməsi) maddələri ilə ittiham olunur.-C06-