!['Bütün körpülər artıq müayinə olunmalıdır'](https://turan.az/resized/media/2023/main/091900066809-750-500-resize.webp)
'Bütün körpülər artıq müayinə olunmalıdır'
Sentyabrın 15-də Xaçmaz şəhərində 1974-cü ildə inşa olunan avtomobil körpüsünün bir hissəsi çökdü, üç nəfər xəsarət də aldı.
Dünən, sentyabrın 18-də də Astara rayonunda iki, Zaqatala rayonunda isə bir avtomobil körpüsündə problemlər yaranıb. Hər iki rayonda güclü yağış nəticəsində yaranmış selin körpülərə ciddi ziyan vurduğu bildirilir.
Azərbaycanda zaman-zaman bu və ya digər körpülərin inşasına, təmirinə dövlət büdcəsindən vəsaitin ayrıldığı deyilir. Rəsmi məlumata görə, 2022-ci ildə respublikanın ümumi istifadədə olan avtomobil yollarında dörd körpü təmir edilib.
Azərbaycan Avtomobil Yolları Dövlət Agentliyindən (AAYDA) Turana bildirilib ki, ölkədə vaxtlı-vaxtında avtomobil körpülərinin təmiri beynəlxalq standartlara uyğun həyata keçirilir.
Qeyd olunub ki, son günlər baş verən hadisələr sel nəticəsində yaranıb: "Hər il belə hadisələr olur. Heç kəs bundan sığortalanmayıb. Başqa ölkələrdə də belə hadisələr tez-tez olur".
Nəqliyyat üzrə ekspert Elməddin Muradlı isə AzadlıqRadiosuna bildirib ki, son vaxtlar yollarda texniki qurğular açıqlandığı müddətdən az istifadə edilir: "Yollar çəkilir, istismar müddəti 30 il yazılır, amma üç ildən sonra görürsən ki, dağılır. Məsələn, Bakı-Quba yolu tikildi, üç il sonra dağıldı və 10 il sonra bu yola yeni xərclər çəkiblər. Yollarda vəziyyət budursa, yəqin, yol qurğularında da bu cür halları müşahidə edə bilirik".
Ekspertin fikrincə, aidiyyəti qurumlar bu məsələyə çox diqqətlə yanaşmalıdırlar: "Bütün körpülər bu hadisələrdən sonra artıq müayinə olunmalıdır. Xüsusən bölgələrdə. Bakıda, sıx olan yerlərdə rəhbərlik görəcək deyə, dərhal tədbir görürlər, bölgələrdə isə, bəlkə də, 50-60 ildir istismar olunan körpülər var və onların istismarı indi təhlükəlidir. Gözləməsinlər ki, faciə baş versin, hansısa körpü sel-daşqına məruz qalsın, uçsun. Bir var ki, körpüyə vaxtında xərc çəkilsin, bərkidilsin, bir də var ki, körpü uçsun və onun təzədən tikilməsi üçün xeyli vəsait xərclənsin".
E.Muradlı düşünür ki, məsələ ilə bağlı qaynar xətt yaradıla bilər: "Körpü vəziyyətini yerli əhali daha yaxşı bilir. Qaynar xətt yaradıla bilər ki, aidiyyəti qurumlar məlumat alsınlar, gedib yerində araşdırma aparsınlar".
Onun sözlərinə görə, digər tərəfdən, təbii fəlakət elədir ki, körpünü vurub dağıda bilər: "Bu, təkcə Azərbaycanda olan proses deyil. Sadəcə həmin körpüləri vaxtlı-vaxtında müayinə etmək, qüsurları aradan qaldırmaq lazımdır. Bu son günlərdə baş verənlər bir siqnaldır".
Cəmiyyət
-
Bazar günü, iyulun 28-də Bakıda və Abşeron yarımadasında hava şəraitinin dəyişkən buludlu olacağı, arabir tutulacağı gözlənilir.
-
Bakı şəhəri ərazisində qanunsuz miqrasiyaya qarşı mübarizə çərçivəsində müxtəlif ünvanlarda əməliyyat tədbirləri həyata keçirilib. Daxili İşlər Nazirliyindən verilən məlumata görə, Baş Dövlət Yol Polisi İdarəsinin qanunsuz miqrasiyaya qarşı mübarizə idarəsinin əməkdaşları tərəfindən Azərbaycan ərazisində yaşamaq və qalmaq hüququ verən sənədləri olmayan 34 əcnəbi müəyyən edilərək saxlanılıb.
-
Azərbaycan Müdafiə Nazirliyi (AMN) iyulun 25-də bəyanat yayaraq son günlərdə Ermənistanı Kəlbəcərdə ağır silahlar, Tovuz istiqamətində isə kvadrokopter tətbiq etməklə ona qarşı “təxribatlar törətməkdə” günahlandırıb. Üstəlik, Ermənistanın Qərb ölkələri ilə hərbi əməkdaşlığından narazılıq və narahatlıq ifadə edib.
-
Daxili İşlər Nazirliyinin Baş Narkotiklərlə Mübarizə İdarəsinin son əməliyyatları zamanı narkotik maddələrin qanunsuz dövriyyəsilə məşğul olan mütəşəkkil dəstənin 5 üzvü - əvvəllər məhkum olunmuş Bəhlul İsmayılov, Röyal Əliyev, Xəyal Alıyev, Samir Ağayev və Əli Məmmədli saxlanılıblar.
Rəy yaz