Buzovnada su maxinasiyaları (2)

Bakı/12.08.22/Turan: Buzovnada su maxinasiyaları adlı məqalədə su təchizatı şəbəkəsinə qanunsuz qoşulma faktı və qanunsuz hərəkətlərin aradan qaldırılması istiqamətində görülən tədbirlərdən bəhs edilmişdi.

Məqalə dərc edildikdən sonra həmin yerdə daha bir qanunsuz qoşulma cəhdi qeydə alınıb. Bu barədə “Azərsu” ASC-nin “Qaynar xətt”inə məlumat verilib. Ertəsi gün Xəzər Rayon 2-ci Polis Bölməsinə üz tutduq. Burada onlar “Azərsu” ASC-nin nümayəndəsi Anar Cəbrayıllının qanunsuz qoşulma ilə bağlı su şirkətinə ünvanlanmış şikayətin polisə göndərilməsi barədə dediklərini təkzib ediblər. Polis idarəsinin nümayəndəsi onu da qeyd edib ki, vətəndaşlardan şikayət daxil olmayıb. “Turan” agentliyinin direktoru özünü təqdim edəndən sonra vəziyyət dəyişib: “Azərsu”dan və vətəndaşlardan izahat alındığı və işi müstəntiq Cavid Ağayevin araşdırdığı məlum olub.

Ağayevi yerində tapmayıblar, o, ərazidə olub. Lakin polis etiraf edib ki, söhbət su çəkməyi vəd edərək vətəndaşlardan pul yığan bir fırıldaqçıdan gedir.

Bu 25 düymlüyə 60 istehlakçının qeyri-qanuni qoşulması planlaşdırılırdı!

Aldadılan potensial su istehlakçılarından biri Turan-a bildirib ki, azı 20 nəfər 2-ci Polis Bölməsinə şikayət ərizəsi yazıb. Mənbə bildirib ki, söhbət bir dələduzdan yox, dövlət qurumları ilə əlaqəli üç nəfərdən ibarət qrupdan gedir. Bu işlə bağlı istintaqın marağına görə hələlik açıqlamadığımız əlavə məlumat da əldə etmişik.

Amma önəmlisi odur ki, bu işdə qanundan kənara çıxaraq istehlakçıların su borularına qoşulması sxemi aşkarlanıb, sonra isə “Azərsu” onları leqallaşdırırmış. Belə ki, işbazların köməyi ilə, bütün dövlət strukturlarının “gözü yumması” nəticəsində müvafiq “muzd” müqabilində (yerləşdiyi yerdən və məsafədən asılı olaraq 300 manatdan 1000 manata qədər) su təchizatı şəbəkəsinə özbaşına qoşulursunuz. Sonra “Azərsu” sizi qanunsuz qoşulmağa görə 180 manat cərimə edir. Bundan əlavə, siz sayğac quraşdırılması və abunəçinin şəxsi hesabının verilməsi ilə rəsmi su istehlakçısı kimi qeydiyyatdan keçirsiniz. Belə bir sxem texniki əsaslandırma olmadan çoxlu sayda istehlakçıya "partizan üsulu ilə” şəbəkəyə qoşulmağa imkan verir.

Beləliklə, qarışıqlıq, şəbəkədə qəzalar, su çatışmazlığı yaranır. Eyni zamanda böyük vəsaitlər bütün maraqlı tərəflərin cibinə axır. Məsələn, bizim dedyimiz halda 40 min manata yaxın pul qanunsuz olaraq dövlət məmurlarının cibinə gedib. Ölkə miqyasında söhbət yüz milyonlarla manatdan gedir. Uduzan dövlətdir, büdcədir. Məlumat var ki, sonradan vətəndaşların vəsaiti hesabına yaradılan bu yeni qoşulmalar dövlət vəsaiti hesabına yaradılan şəbəkələr kimi rəsmiləşdirilir.

“Su təchizatı və tullantı suları haqqında” Qanun istehlakçıların su təchizatı sisteminə icazəsiz qoşulmasını açıq şəkildə qadağan edir, qoşulduqdan sonra istehlakçıya leqallaşdırmaq hüququ vermir və buna görə cəza nəzərdə tutur. “Azərsu”da qanunu pozanların leqallaşdırılması mexanizmini öyrənməyə çalışsaq da, bizə cavab verilmədi. Bununla belə, biz müəyyən edə bildik ki, qanun pozucularının leqallaşdırılması 203 saylı daxili normativ hüquqi sənəd əsasında həyata keçirilir. Yəni “Azərsu” qanundan yayınma mexanizmi yaradıb və özü də qəsdən kütləvi qanun pozuntularının və vəsaitlərin mənimsənilməsinin təşəbbüskarıdır.  

Qanuna zidd olaraq qazılan xəndək

Bu gün, avqustun 12-də, bu məqalə artıq hazır olanda məlum oldu ki, yuxarıda qeyd olunan başıbəlalı ərazidə indi başqa bir su mənbəyinə yenidən qoşulmaq üçün eyni adamların iştirakı ilə mikro xəndək qazırlar, “Azərsu” da, polis də, yerli icra hakimiyyətləri də, bələdiyyələr də həmişəki kimi öz maraqlarından çıxış edərək.  heç nə görmürlər, eşitmirlər. 

Hesab edirik ki, bu cinayət əməlini dayandırmaq üçün 203 saylı normativ sənəd ləğv edilməlidir. 1999-cu ildə qəbul edilmiş “Su təchizatı və tullantı suları haqqında” Qanun mənəvi cəhətdən köhnəlib və ona işbazların deyil, cəmiyyətin və dövlətin maraqları baxımından yenidən baxılmalıdır.–0—