Çap məhsullarının yayımı sahəsində vəziyyət müzakirə olunub

Bazar ertəsi Azərbaycan KİV-in, Bakıda akkreditə olunmuş qərb ölkələrinin və beynəlxalq təşkilatların nümayəndələrinin iştirakı ilə çap mətbuatının yayımı problemləri müzakirə olunub.

Görüşdə “Ayna-Zerkalo”, “Azadlıq”, “Yeni Müsavat” qəzetlərinin, Turan agentliyinin, Reportyorların Azadlıq və Təhlükəsizlik İnstitutunun, həmçinin Avropa İttifaqı, ATƏT, Avropa Şurası, ABŞ, Almaniya, Böyük Britaniya, Fransa və digər ölkələrin missiyalarının nümayəndələri iştirak ediblər.

Redaktorlar çap mətbuatının yayımı sahəsində vəziyyətin kəskin pisləşməsi barədə məlumat veriblər ki, bu da özünü “Qasid” yayım firmasının köşklərinin ləğvində və Bakı   meriyasının yeni köşklərində dövrü mətbuatın satışından imtina olunmasında özünü göstərir.

On illərlə qəzet və jurnal satışı ilə məşğul olan “Qasid”in 400-dən çox köşkündən 300-ə yaxını son ildə Bakıda ləğv  edilib. Onların əvəzinə yeni köşklər qurulur ki, bunlar da qida məhsullarının satışı ilə məşğuldur. Regionlarda çap məhsullarının yayımı ilə bağlı vəziyyət daha acınacaqlıdır.

Nəticədə “Yeni Müsavat” və “Azadlıq” qəzetlərinin satışı üçdə bir hissə azalıb. Distribyutorların həmin qəzetlərə borcu müvafiq olaraq 8 min və 28 min manat təşkil edir. “Azadlıq” qəzetinin durumu daha da ağırdır, qəzet “Azərbaycan” nəşriyyatına ödəniş edə bilmir.

İyulda redaktorların Prezident Administrasiyasının ictimai-siyasi şöbəsinin rəhbəri Əli Həsənovla görüşü nəticə verməyib. Ə.Həsənovun vədlərinə baxmayaraq, problem nəinki həllini tapmayıb, əksinə daha da pisləşib.

Redaktorlar problemin həlli yolları barədə fikirlərini bildiriblər və Azərbaycanda mediada reklam sahəsi də daxil olmaqla, müstəqil KİV-in iqtisadi vəziyyətinə diqqətin artırılmasını xahiş ediblər.—0—