E.ON Ruhrgas Bakı və Abşeronun qaz təchizatı şəbəkəsinin təkmilləşdirilməsi layihəsinin TİƏ-ni təqdim edib

Ötən həftə "Azəriqaz" İB-də Almaniyanın E.ON Ruhrgas şirkəti 2011-ci ilin oktyabrından hazırladığı Bakı və Abşeronun qaz təchizatı şəbəkəsinin təkmilləşdirilməsi layihəsinin TİƏ-ni təqdim edib. 

ARDNŞ mətbuat xidmətinin məlumatına görə, “Azəriqaz” İB-nin baş direktoru Əkbər Hacıyev tədbiri giriş sözü ilə açaraq Bakı və Abşeron yarımadasında təbii qaz təchizatı şəbəkəsinin modernləşməsi və yenidən qurulması məsələsinin respublika iqtisadiyyatı və Abşeron yarımadasının sosial-iqdisadi inkişafı nöqteyi-nəzərindən mühüm yer tutduğunu qeyd edib. Onun sözlərinə görə, layihə hazırlanarkən Bakı və Abşeron yarımadasında 2030-cu ilədək yaranacaq tələbatın ödənilməsi nəzərə alınıb. 

Təqdimatda texniki-iqtisadi əsaslandırmanın xülasəsi, nəticələri, eləcə də layihənin reallaşdırılması üçün müəyyən edilmiş mərhələlər əksini tapıb. Sonra “Azəriqaz” İB-nin aparıcı mütəxəssisləri TİƏ sənədinin müddəaları ətrafında müzakirə aparıblar.

* 28 oktyabr 2011-ci ildə “Azəriqaz” İB və E.ON Ruhrgas AG Bakı və Abşeron yarımadasında təbii qaz təchizatı şəbəkəsinin modernləşmə və yenidən qurulması layihəsinin TİƏ-nin tərtibi barədə saziş imzalayıblar. Orada sənayenin inkişafı, əhalinin tələbatının artması, qaz itkisinin azaldılması, mövcud qazpaylayıcı şəbəkənin genişlənməsi nəzərə alınıb. --12D—