Dağıstanlı telejurnalistlər Azərbaycana buraxılmayıb

Dağıstanın “Eksklüziv TV” kanalının çəkiliş qrupu Azərbaycana girişdə və geri qayıdarkən saxlanılıb.

Bu barədə kanalın saytında bu telekanalın Dərbənddəki telejurnalisti Murad Ağamirov yazıb.

Hadisənin məhz nə zaman baş verdiyi açıqlanmır.

Müəllif yazır ki, çoxdandır tamaşaçılara Azərbaycan Respublikasında ləzgi musiqi mədəniyyəti haqqında danışmaq istəyirdi. “Bu məqsədlə xarici pasport çıxartdırdım, Ləzgi-Azərbaycan estradasını araşdırdım və günlərin bir günü onlara qonaq getməyi qərara aldım... prinsipcə, bununla da xoş olan hər şey başa çatdı, sonrası maraqsız gömrük səhnəsi!

Sərhədin Rusiya hissəsini uğurla keçdikdən sonra, saat 11-də biz artıq Azərbaycan tərəfdə idik. Sakitçilik idi, operatorum çox sayda müasir foto və videotexnika ilə nəzarətdən töhmətsiz keçdi və bayıra çıxdı. Fotoaparatlara heyranlıqdan başqa (çantada olan texnikanın ümumi məbləği yarım milyondan çox idi) ona qarşı heç bir irad tutulmadı.

Mənim növbəm çatdı, ştativ, fotoaparat, qulaqlıq, mikrofon... və həmin an hər şey tərsinə döndü. Bir an elə bir hiss yarandı ki, mən Amerika-Meksika sərhədini keçirəm və məni bir torba marixuana ilə yaxalayıblar.

Gömrüyün bütün rəhbərliyi, sərhədçilər, KQB... həmin vaxt artıq məlum oldu ki, sərhədi fototexnika ilə keçmək olmaz. Bunun üçün akkreditasiya tələb olunur. Baxmayaraq ki, bizim operatorlar həmişə klip və toyları çəkmək üçün oaraya gedirlər və heç vaxt problem olmayıb.

Uzun sözün qısası, bizə bir otaq ayırdılar, təmbəllik etməyən hər kəs yanımıza gəlir, haqqımızdakı məlumatları yazır, pasportlarımızın, şəxsiyyət vəsiqələrimizin, vizitkalarımızın şəklini çəkir və saatlarla yoxa çıxırdılar. Bizə nəyə əsasən saxlanıldığımız barədə heç bir izahat vermirdilər, Azərbaycan dilində nə isə soruşurdular. Cavabda Azərbaycan dilini bilmədiyimizi öyrəndikdə “hər şey aydındır” demiş kimi başlarını sallayır və gedirdilər.

Daha sonra bir zabit nəzakətlə məndən telefonumu istədi və facebook-da bütün şəxsi yazışmalarımı oxudu, qalereyaya baxdı... bütün bu tamaşa axşam saat 7-yə qədər (!) davam etdi!!! Yəni biz ac-susuz və heç bir ağlabatan açıqlama verilmədən 8 saat dindirmə otağında oturduq!!!

Açığını desəm, görünürdü ki, terminal işçiləri özləri də nə baş verdiyini bilmirdilər, görünür, qərar bizdən uzaqda bir yerdə qəbul edilmişdi. Bu hadisənin sonu da başlanğıcı kimi tez baş verdi. Terminal işçisi gəldi, pasportları götürdü və dedi ki, bizim girişimiz qadağan olunub. Pasportlara möhür vurdular və konvoyun müşaiyəti ilə neytral zonaya keçirdilər. Ölkədən hansı səbəbdən çıxarılmağımızla bağlı yazılı izahat vermək xahişlərimiz susqunluq divarı ilə qarşılanırdı.

Bu qədər, Azərbaycan rahat nəfəs aldı!!! Sərhədçilərin, gömrükçülərin və KQB-nin ayıq-sayıqlığı sayəsində ölkə dövləti mikrofonla ələ keçirmək istəyən düşmənlərdən müdafiə olundu! Azərbaycan rahat yata bilər!”, deyə Ağamirov yazıb.

Azərbaycan Sərhəd Xidmətindən bu telekanalın çəkiliş qrupunun ölkəyə buraxılmamasının səbəbi haqqında şərh almaq mümkün olmayıb. -02D-