DAK dünya birliyini Güney Azərbaycana dəstək olmağa çağırdı

Cümə axşamı Dünya Azərbaycanlıları Konqresi (DAK) İranda Azərbaycan türklərinin təhqir olunması və bu fonda baş verən hadisələrə dair dinləmələr keçirib.  

DAK həmsədri Sabir Rüstəmxanlı “Kanal-2” telekanalında yer alan təhqiri bir verilişin işi yox, rəsmi Tehranın Azərbaycan türklərinə münasibətinin nəticəsi kimi dəyərləndirib. İranda Güney Azərbaycan türklərinin toplum və fərd olaraq formalaşmasında fars mühitinin rolunun qabardılması əsassız sayılıb. “Bu təhqir XII əsrdə “Şahnamə”dən bu yana gəlir və indiyə kimi davam edir”deyən S.Rüstəmxanlı fars mühitinin türkləri təhiq etməsinin tarixi köklərinə toxunub. Amma S.Rüstəmxanlı Güney Azərbaycan türklərinin indiyə kimi öz dilində məktəbə, universitetə, qəzet-jurnala sahib ola bilməməsini, mədəniyyətinin dünya muzeylərində “pers mədəniyyəti” kimi təqdim olunmasını millətə böyük təhqir adlandırıb. “Bu isə millətin özünü müdafiə üçün müqavimət gücünün olmamasının göstəricisidir”, -S.Rüstəmxanlı millətə olan təhqirlərin haradan qaynaqlandığını söyləyib.

Onun fikrincə, Azərbaycan dövləti millətin bir hissəsi olan təkcə 9 milyon azərbaycanlının yox, bütün Azərbaycan türklərinin dövlətidir və dövlət buna münasibət ifadə etməlidir.

Güney Azərbaycandan olan Əmir Mirvəhid bu təhqirlərin zaman-zaman olduğunu xatırladıb, son hadisəyə bənzər olayların bundan öncə olmasına da diqqət çəkib. Onun fikrincə, bütün təhqirlərin aradan qaldırılması üçün bütün türk dünyasının Güney Azərbaycana dəstək olması vacibdir.

Müxalifətin ünlü simalarından Pənah Hüseyn İranda baş verən etirazların güclənəcəyini iddia edərək təkcə bütün dünya türklüyünün yox, regionun taleyinin bu etirazlarda həll olunacağını vurğulayıb.

DAK Güney Azərbaycan nümayəndəliyinin başçısı Babək Muğanlı bu dəfə hərəkatın təşkilatlanmış şəkildə aparıldığını deyərək  bu hərəkatın Güney Azərbaycan türklərinin qələbəsilə başa çatmasına şübhə etmədiyini deyib.

Müzakirələrin sonu olaraq bəyanat qəbil edilib. Sənəddə İranda Güney Azərbaycan türklərinə təzyiqlərin gücləndiyi qeyd edilir və telekanaldakı təhqir həmin rəsmi təzyiqlərin tərkib hissəsi kimi dəyərləndirilir. Təhqirə etiraz olaraq aksiyalar keçirdiklərinə görə azərbaycanlıların kütləvi şəkildə işgəncələrə, həbslərə məruz qaldıqları bildirilir. Müəlliflər rəsmi Tehranı tezliklə bu diskriminasiya hallarına son qoymağa, həbs edilən azərbaycanlıları dərhal azad etməyə, dünya birliyini və beynəlxalq qurumları bu ədalətli mübarizəyə dəstək verməyə çağırırlar.-05C-