Dəmiryolçular vətəndaşlıqdan imtina məcburiyyətində qaldıqlarını bəyan edirlər

“Azərbaycandəmiryolu” QSC Bakı Departamentinin vaqon bələdçiləri işdən çıxarılmalarına etiraz olaraq cümə axşamı RATİ-də mətbuat konfransı keçiriblər.

Vaqon bələdçisi Mirsahib Sahibov 2007-ci ildən başlayaraq 15-30 il təcrübəsi olan vaqon bələdçilərinin küləvi şəkildə işdən çıxarılmalarına diqqət çəkib. 3 minə qədər bələdçidən cəmi 300 nəfər keçmiş bələdçi qaldığı deyilib. Elə 2007-ci ildən bu yana idarəyə 450 qadın bələdçi işə götürülüb və götürülməkdə davam edir.

Kişi bələdçilərin işdən çıxarılmasına sərnişinlərə yaxşı xidmət göstərə bilməmələrinin səbəb göstərilməsi əsassız sayılıb. Onlara ünvanlanan narkotik satmaq, oğurluq etmək, cinayətkar olmaq, vaqonları təmiz saxlamamaq kimi ittihamları bələdçiləri gözdən salmaq cəhdi adlandırıblar. Uzun müddət Rusiya istiqamətinə gedən qatarlarda bələdçi işləyən şəxslərin işdən çıxarılmasına daha bir səbəb kimi rus dilini bilməmələri, “sərnişinə xidmətin Avropa standartlarına uyğun qurulması və köhnə bələdçilərin buna cavab verə bilməməsi” arqumentləri sadəcə absurd sayılıb. Vaqon bələdçiləri dəmiryol sistemində baş verən bu qanunsuzluqlarda dəmiryol rəhbərlərinin deputat M.Əliyevanın adını hallandırmasına diqqət çəkiblər.   

“Dəmiyolu sistemində işə yeni qəbul edilən xanım bələdçilərdən hansı Avropa dillərini bilir, sərnişinə xidmətlə bağlı hansı xüsusi kurs keçiblər ki? Heç biri, bununla belə onlar işə qəbul edilir, amma 15-30 il  təcrübəyə malik olan bələdçilər yararsız sayılır”, - deyə M.Sahibov qeyd edib. Yeni bələdçilərin təzə, stajlı bələdçilərin köhnə vaqonlarla təmin olunması rəhbərliyin əməkdaşlara qarşı ayrı-seçkiliyinin göstəricisi kimi dəyərləndirilib. Köhnə bələdçilər ancaq 2013-cü ildən ayda 200 manat maaş aldıqları halda, yeni bələdçilərin aylıq maaşları 450-500 manatdır.  

Vaqon bələdçilərinin fikrincə, kütləvi şəkildə işdən azad edilmələrinin əsas səbəbi onların adına yazılan maliyyə vəsaitlərini uzun illər boyu dəmiryol rəhbərliyinin mənimsəməsidir. “Bizi işdən çıxarmaqla dəmiryol rəhbərliyi bu maliyyə cinayətlərinin, dövlətə vurduqları ziyanın üstünü örtərək, cinayt məsuliyyətindən yaxalarını qurtarmaq istəyirlər”, - deyə M.Sahibov qeyd edib.

Təmir, yeni vaqonlar alınması və s. kimi saxta əməliyyatlar adı altında dövlətin milyonlarla vəsaitini mənimsədikləri, bu pullara özləri üçün xüsusi müəssisələr yaratdıqları bildirilib.

Dəmiryolçular özlərinə qarşı baş verənləri məmur özbaşınalığı, vətəndaşın taleyinə biganəlik, taleyin ümidinə buraxılmaq, insan haqlarının tapdanması kimi dəyərləndiriblər. Onlar bu dərəbəyliyin arxasında “Azərbaycandəmiryol” QSC-nin rəhbəri Arif Əsgərovun, dəmiryolu sistemi rəhbərliyinin və nəqliyyat naziri Ziya Məmmədovun durduğunu xüsusi vurğulayıblar. Uzun aylar boyu dövlət qurumlarına olan müraciətlərinə cavab verilməməsinə qarşılıq olaraq son çarə kimi ölkədəki xarici ölkə səfirliklərindən sığınacaq istəmək məcburiyyətində qalacaqlarını bəyan ediblər. -05C-