DİN Mətbuat Xidməti təkzib edir

 DİN Mətbuat Xidməti Turan agentliyinin aprelin 10-da yaydığı “İstintaq təcridxanasında məhbusun qulağını kəsiblər?” başlıqlı məlumatına münasibət bildirib.

DİN-in acıqlamasında  narkotik vasitələrin qanunsuz dövriyyəsi ilə məşğul olduğuna görə həbs olunmuş Hünər Cəfərovun  saxlanılarkən  polislər tərəfindən işgəncəyə məruz qalması barədə deyilənlər təkzib olunur.

“Bəli, martın 20-də bizim Baş Narkotiklərlə Mübarizə İdarəsi əməkdaşlarının keçirdiyi əməliyyat – axtarış tədbirləri nəticəsində Astara rayon sakini,  əvvəllər də Cinayət Məcəlləsinin bir neçə maddəsi ilə dəfələrlə məhkum olunmuş  Hünər Cəfərovdan 5.680 qram, idarə etdiyi avtomobildən isə 59.221 qram narkotik vasitə olan heroin aşkar edilərək götürülüb.  İlkin izahatında o, narkotikin özünə aid olduğunu etiraf edib. Fakt üzrə CM-in müvafiq maddəsi ilə cinayət işi qaldırılıb. Məhkəmənin hökmü ilə onun barəsində həbs qətimkan tədbiri seçilib və o həbs olunaraq İstintaq Təcridxanasına göndərilib”, - deyə DİN mətbuat xidmətinin məlumatında bildirilir.

DİN hesab edir kı, H.Cəfərovun vəkili  müvəkkilini   “polis zorakılığına məruz qalmış yazıq, fağır” kimi təqdim etməklə onun qanunazidd əməllərini pərdələməyə, qanunun tələb etdiyi məsuliyyətdən yayındırmağa əbəs yerə cəhd edir”.-0-