Mətbuat-monitorinq 13.04.15

Rəsmi qəzetlər dövlət başçısı İlham Əliyevin Astara və Lənkəran rayonlarına səfəri, bəzi obyektlərin işilə tanış olması haqda xəbərləri ilk səhifələrə yerləşdiriblər.

Bu qəzetlər deputat Mehriban Əliyevanın Moskvada RF KİV rəhbərlərilə görüşü haqda məlumatlara da geniş yer veriblər.

“Azadlıq” qəzeti Hesablama Palatasının hesabatında “Azərenerji”nin rəhbəri Etibar Pirverdiyev və torpaq komitəsinin keçmiş sədri Qərib Məmmədovla bağlı neqativ faktların əksini tapmasını “hər iki şəxsə həbs təhlükəsi” adı ilə ilk səhifəyə çıxarıb. 

Qəzet Bakı metrosunun N.Nərimanov stansiyası yaxınlığındakı “Metropark” ticarət mərkəzində da qaz sızamsından 20-yə çox şəxsin zəhərləndiyini bildirir.

Qəzet yazır ki, “Human Rights Watch” beynəlxalq hüquq-müdafiə təşkilatının nümayəndəsi Reyçel Denber rəsmi Bakını siyasi məhbusları Avropa Oyunlarına qədər azad etməyə çağırıb.

Paytaxt küçələrindən Heydər Əliyevin portretlərinin yığışdırıldığını yazan qəzet rəsmi Bakıya “heykəlləri necə gizləyəcəksiniz?” sualı ünvanlayır.

AXCP sədri Əli Kərimli bu günlərdə Zığ şossesindəki 9 mərtəbəli binanın yanmasına “bu, hansısa bədbəxt hadisənin yox, konkret cinayət əməlinin nəticəsi” mövqeyi ifadə edib.

Ekspertlərə isnadən ölkənin qiymətli kağızlar bazar həcminin bu il 17,6% azaldığını yazan qəzet bunu “qiymətli Kağızlar bazarının çökməsi” adlandırır.

Ölkəyə ət, süd, meyvə-tərəvəz, kərə yağı idxalının 70%-lə 100%-dən də çox artdığını deyən ekspet bununla rəsmi Bakının kənd təsərrüfatında 3% artım olması haqda bəyanatını yalanlayıb.

Ekspertlər MDB məkanında dollara münasibətdə milli valyutası ən çox ucuzlaşan ölkənin Azərbaycan olduğunu bildirirlər.

Qəzet qeyd edir ki, İnsan Alverinə qarşı Mübarizə İdarəsinin rəisi Şərif Əsədullayevin oğlu Tamerlan Əsədullayev restoranda davaya görə xuliqanlıq maddəsilə məhkəmə önünə çıxarılıb və barəsində 2 aylıq həbs-qətimkan tədbiri seçilib.

“Yeni Müsavat” qəzeti qondarma erməni soyqırımının 100 illiyi ərəfəsində rəsmi Kremlin bu il aprelin 24-də Türkiyədə “Çanaqqala zəfəri-100” tədbirlərində yüksək səviyyədə iştirak edəcəyi bəyanatını Ermənistana “yubiley” silləsi adlandıraraq önə çəkib.  

Qəzet rəsmi Bakının inhisarçılara qarşı mübarizə aparmağa başlaması, bunun inhisarçıların həbsilə başa çata biləcəyi iddialarını da ilk səhifəyə çəkib.

Gözlənilən yeni əfv fərmanı haqda danışan hüquq müdafiəçisi Novella Cəfəroğlu fərmanın ya mayın 10-u, ya da 28-i ərəfəsində olacağını bildirir.

Bakının Zığ şossesindəki 9 mərtəbli binanın yanması fonunda qəzet son zamanlar Bakıda bir çox binaların üzlüklərinin yanar materiallardan olduğu üçün belə yanğınların təkrarlanma riskinin yüksək olması xəbərdarlığı edir.

Manatın devalvasiyası ilə bağlı ölkənin mobil telefon satışı bazarında ciddi müştəri qıtlığı yarandığını yazan qəzet mobil telefon satışı dükanlarının bağlana biləcəyini nəzərə çatdırır.