Dini konfessiya rəhbərləri dünya birliyinə müraciət ediblər

Azərbaycandakı dini konfessiya rəhbərləri Xocalı faciəsinin növbəti ildönümü ilə bağlı dünya dini liderlərinə, beynəlxalq qurumlara və Avropa məhkəməsinə müraciət ünvanlayıblar.

Müəlliflər 23 il öncə Xocalıda insanlığa qarşı soyqırım törədildiyini nəzərə çatdıraraq bu aktı ümumbəşəri mənəvi dəyərlərə zidd zorakılıq, qətl və təcavüz kimi dəyərləndirirlər. Sənəddə kütləvi insan qətlilə müşayiət edilən Xocalı faciəsi “erməni vəhşiliyinin kulminasiya nöqtəsi” adlandırılır.

Daha sonra müəlliflər 20 ildən çox vaxt keçməsinə baxmayaraq, erməni qəsbkarlarının Azərbaycan torpaqlarından çıxmalı olduqları haqda BMT Təhlükəsizlik Şurasının 4 qətnaməsınin hələ də yerinə yetirilrmədiyini nəzərə çatdırırlar. Həm də belə cəzasızlığın analoji cinayətlərin təkrarlanmasına yol açdığı vurğulanır. Dünya birliyinin gözü önündə baş vermiş Xocalı gerçəklərini görmədikləri halda, təsdiqini tapmayan “ermənisoyqırımı”nı tanımaq cəhdləri pislənilir.     

Müəlliflər Avropa məhkəməsini Ermənistanın Azərbaycana qarşı təcavüzünə son qoyulmasına, cinayətkar əməllərə prinsipial hüquqi-siyasi, hüquqi qiymət verilərək günahkarların cəzalandırılmasına və Xocalıda törədilən kütləvi qırğının soyqırım aktı kimi tanınmasına çağırırlar  

Müraciəti Qafqaz Müsəlmanları İdarəsinin sədri şeyxülislam Allahşükür Paşazadə, Bakı və Azərbaycan arxiyepiskopu Aleksandr, Azərbaycandakı Dağ yəhudiləri icmasının rəhbəri Melih Yevdayev, Azərbaycandakı katolik icmasının rəbbəri ordinari Vladimir Fekete imzalayıblar.

Xatırladaq ki, 1992-ci il fevralın 25-dən 26-na keçən gecə minlərlə dinc, silahsız, müdafiəsiz Xocalı sakinləri erməni işğalçılarının qəfil və amansız basqınına məruz qalıb. 613 nəfər xüsusi qəddarlıqla qətlə yetirilib, qocalara, uşaqlara, hamilə qadınlara belə rəhm olunmayıb. 150 nəfər sakin itkin düşüb, 1275 nəfər əsir götürülərək işgəncələrlə qətlə yetirilib.-05D-