Dini rəhbərlər konqresmen Smiti qərəzli sayırlar

Azərbaycanda fəaliyyət göstərən dini konfessiya rəhbərləri ABŞ Konqresində “Azərbaycan Demokratiya Aktı” layihəsinin müzakirəyə çıxarılması narahatlığı ilə bağlı Konqresə müraciət ünvanlayıblar.

Müəlliflər layihədə Azərbaycanda dini etiqad azadlığının məhdudlaşdırılması ilə bağlı mülahizələrə narazılıq ifadə edərək, bunu ölkədəki tolerantlıq mühitinə qarşı “qərəzli kampaniya” adlandırırlar.

ABŞ Konpresmenlərinin Azərbaycandakı dini mühiti yaxşı bildikləri halda belə sənədin Kapitoliyə təqdim olunmasını müəlliflər anlaşılmazlıq sayırlar. “Biz bunu müəllifin məlumatsızlığı sayardıq, amma indi dünyada informasiya əldə etmək imkanları bu fikri istisna edir”, deyə müəlliflər sənədi qərəzli adlandırırlar.

   Sənəddə ölkədəki müsəlman məscidləri, xristian kilsələri, yəhudi sinaqoqları və alban-udin kilsələrinin yanaşı fəaliyyət göstərdikləri vurğulanır. Bununla yanaşı, dini rəhbərlər ölkədə keçirilmiş çoxsaylı beyənlxalq dini tədbirləri də tolerantlıq nümunəsi kimi təqdim edirlər. Bakıda erməni qriqorian kilsəsinin belə qorunduğu nəzərə çatdırılır.

Müəlliflər qanun layihəsində Azərbaycanda baptistlərin, yeddinci gün adventistlərinin, “Pentecostals” nümayəndələrinin leqal statusa malik olmamaları və acınacaqlı durumda olmalarına da cavab verirlər. “Bununla bağlı bildiririk ki, bu cərəyanların nümayəndələri icma deyil, fərdi şəkildə fəaliyyət göstərirlər”, – deyə müraciətdə qeyd edilir.

   Layihədə Azərbaycanda çoxsaylı dini məhbuslar olması ilə bağlı müddəaya müəlliflər bu şəxslərin dini fəaliyyətə görə yox, terrora, dövlət çevrilişinə cəhdə görə həbs olunduqlarını iddia edirlər. Müəlliflər bu şəxslərin “vicdan məhbusları” adlandırılmasına da etiraz bildirirlər.

“Sizi əmin edirik ki, Azərbaycanda mövcud olan tolerantlıq mühiti sözdə yox, əməldədir və canlı nümunə müraciətin altındakı imzalardır. Biz heç zaman Azərbaycanda dini zəmində qarşıdurma yaşamamışıq və buna yol verməmişik. Bu tolerantlıq bizim ruhumuzda, qanımızdadır”, - deyə özlərini əsl tolerantlar sayırlar.

Son olaraq, müəlliflər konqresmenlərə layihənin müzakirəsi zamanı mövqelərini nəzərə alaraq düzgün qərar verəcəklərinə inanmaq istədiklərini bəyan edirlər.

Müraciəti Şeyxülislam Allahşükür Paşazadə - Qafqaz Müsəlmanları İdarəsinin sədri, Aleksandr - Bakı və Azərbaycan arxiyepiskopu, Vladimir Fekete - Roma Katolik Kilsəsinin Azərbaycandakı apostol prefekturasının ordinarisi, Milih Yevdayev - Azərbaycandakı Dağ yəhudiləri icmasının rəhbəri, Gennadi Zelmanoviç  - Avropa yəhudilərinin Bakı icmasının rəhbəri, Robert Mobili - Alban-udin xristian dini icmasının sədri imzlayıblar. -05D-