![Dünyasını dəyişmiş əsgər I.İbayevi döyən kapitan həbs edildi](https://turan.az/resized/./turan-750-500-resize.webp)
Dünyasını dəyişmiş əsgər I.İbayevi döyən kapitan həbs edildi
Respublika Hərbi Prokurorluğu əsgər İsmayıl İbayeviin ölüm faktı ilə bağlı başlanmış cinayət işinin istintaqı ilə bağlı məlumat yayıb.
Hərbi Prokurorluğun mətbuat xdmətindən Turana daxil olan məlumatda bildirilir ki, Müdafiə Nazirliyinin Naxçıvandakı «N» saylı hərbi hissəsinin müddətli həqiqi hərbi xidmətdə olmuş əsgəri İsmayıl İbayevin ölümü ilə əlaqədar cinayət işinin istintaqı Naxçıvan Muxtar Respublikası Hərbi Prokurorluğunda davam etdirilir.
Əsgər İsmayıl İbayevin ölməsi faktına görə 31 iyul 2012-ci il tarixdə Naxçıvan Muxtar Respublikası Hərbi Prokurorluğu tərəfindən Cinayət Məcəlləsinin 125-ci maddəsi ilə cinayət işi başlanıb, müvafiq ekspertizalar təyin edilib. Ekspertizanın rəyinə əsasən müəyyən olunub ki, mərhum İ.İbayevin ölümünə səbəb baş beyin toxumasının dağılması, massiv qan itirmə, kəllə qapağı sümüklərinin sınığı ilə müşayiət olunan, başın bir ədəd dəlib keçən odlu silah-güllə yaralanması olub.
Aparılmış istintaqla müəyyən edilib ki, “N” saylı hərbi hissənin bölük komandiri kapitan Rövşən Ataşov Hərbi Nizamnamə qaydalarını pozaraq tabeliyində olan mərhum əsgər İsmayıl İbayevi bir neçə dəfə sillə ilə vuraraq döyüb. Hərbi xidmət üzrə vəzifələrin yerinə yetirilməsi zamanı tabeliyində olan mərhum əsgər İsmayıl İbayevi döydüyü üçün kapitan Rövşən Ataşov 31 avqust 2012-ci il tarixdə CM-nin 331.3-cü maddəsi ilə təqsirləndirilən şəxs qismində cəlb edilib və barəsində məhkəmənin qərarı ilə həbs qətimkan tədbiri seçilib. Hazırda baş vermiş hadisənin bütün hallarının tam, hərtərəfli və obyektiv araşdırılması istiqamətində zəruri istintaq hərəkətlərinin icrası davam etdirilir.
Mərhum əsgərin valideynləri oğluna xidmət yerində işgəncə verilməsi, onun komandiri tərəfindən öldürülməsi və daxili orqanlarının çıxarılaraq satılması barədə Azərbaycan Respublikası Hərbi Prokurorluğuna müraciət edərək oğlunun meyitinin ekshumasiya edilməsini xahiş ediblər. 7 sentyabr 2012-ci il tarixdə mərhum əsgər İsmayıl İbayevin valideynlərinin, nümayəndəsinin, müstəntiqin, prokuror-kriminalistin, məhkəmə-tibbi ekspertin və məhkəmə təbabəti sahəsində mütəxəssisin iştirakı ilə qanunvericiliyin tələblərinə uyğun olaraq foto, video və digər yazan texniki vasitələrdən istifadə olunmaqla meyit qəbirdən çıxarılıb müayinə olunarkən meyitin daxili orqanlarının yerində olduğu təsdiq edilmiş, əsgərin atası Rafiq İbayevin ərizəsində göstərilən digər xüsusatların yoxlanılması üçün mərhum əsgərin daxili orqanlarından nümunələr götürülərək komisyon məhkəmə-tibbi ekspertizası təyin edilmişdir. Mərhum əsgər İsmayıl İbayevin meyitinin təkrar məhkəmə-tibbi müayinəsinin nəticələrinə əsasən valideynlərinin ərizəsində meyitin daxili orqanlarının çıxarılaraq satılması barədə göstərdiyi xüsusatlar öz təsdiqini tapmayıb. Məlumatda bildirilir ki, bu cür halların ordumuza qarşı müntəzəm olaraq qeyri-sağlam münasibətdə olan müxtəlif qruplar tərəfindən uydurulan şayiələrdir. Ümumi dünyagörüşü olan hər bir şəxsə məlumdur ki, ölmüş adamın hər-hansı orqanlarının başqa şəxsə köçürülməsi absurt iddiadan başqa bir şey deyildir.
Respublika Hərbi Prokurorluğunun Mətbuat xidməti çox təəssüflə əlavə olaraq bildirir ki, Müdafiə Nazirliyi Məhkəmə-Tibbi Ekspertiza və Patoloji Anatomiya Mərkəzinin rəisi tərəfindən meyitin müayinəsi zamanı qanunvericiliyin tələblərinə müvafiq olaraq həyata keçirilən tədbirlər barədə kütləvi-informasiya vasitələrinə kifayət qədər ətraflı məlumat verilsə də, əsgərlərin daxili orqanlarının çıxarılıb satılması barədə hələ də bəzi informasiya vasitələrində bilərəkdən və ya bilməyərəkdən həqiqətə uyğun olmayan yazılar, yanlış məlumatlar yayılır.
Respublika Hərbi Prokurorluğu bir daha bəyan edir ki, kütləvi informasiya vasitələrində heç bir fakta əsaslanmayan, reallığı əks etdirməyən bu cür məlumatların dərc edilməsi yolverilməzdir.
-
- Cəmiyyət
- 12 Sentyabr 2012 20:08
Cəmiyyət
-
Ədalət Naminə Həmrəylik Komitəsinin təşəbbüsü ilə təşkil edilən, Azərbaycanda insan hüquqları vəziyyətinə həsr olunmuş vətəndaş cəmiyyəti fəallarının onlayn görüşündə jurnalistlərin, siyasi fəalların və müharibəyə qarşı çıxanların həbsi ilə bağlı ciddi narahatlıqlar vurğulandı. Avqustun 30-da keçirilən bu toplantı Beynəlxalq İtkin Düşənlərin Anım Günü ilə üst-üstə düşdü və Qarabağ müharibələrindən sonra həm Azərbaycan, həm də Ermənistan cəmiyyətlərinin qarşılaşdığı davamlı çətinlikləri diqqətə çatdırdı.
-
Sentyabrın 1-də Bakıda və Abşeron yarımadasında hava yağıntısız olacaq. Şimal-qərb küləyi gündüz cənub-şərq küləyi ilə əvəz olunacaq. Havanın temperaturu gecə müsbət 21+26, gündüz müsbət 33+38 dərəcə olacaq, Milli Hidrometeorologiya Xidməti bildirib.
-
Ölkənin aparıcı mobil operatoru "Milli və müasir" rəqəmsal muzeyini təqdim edir Azercell milli dəyərlərimizi müasir texnologiyalar vasitəsilə yaşatmaq, onları geniş auditoriyaya tanıtmaq və gələcək nəsillərə çatdırmaq məqsədilə "Milli və müasir" rəqəmsal muzeyi layihəsini təqdim edir. Bu innovativ təşəbbüs sənət və texnologiyanı birləşdirərək şirkətin hər iki sahəyə olan dəstəyini bir daha vurğulayır.
-
Bakının Suraxanı rayonu ərazisində sənaye zonasında bir obyektdə yanğın başlayıb. Yanğının söndürülməsinə FHN-in Dövlət Yanğından Mühafizə Xidmətinin qüvvələri cəlb olunub.
Rəy yaz