Əhalinin sosial müdafiəsi sistemi birinci imtahana - koronavirus imtahanına tab gətirmədi

İki ilə yaxındır Almaniyada yaşayan Bakılı jurnalist Çingiz Sultansoya Rathaus şəhərinin sosial xidmətindən zəng edərək Bavariyada koronavirusla bağlı görülən preventiv tədbirlərlə əlaqədar probleminin olub olmadığını soruşublar. Sultansoy Almaniya vətəndaşı deyil, bu ölkədə yaşamaq üçün icazəsi var.

"Təkcə mənim kimi auslenderlərə - əcnəbilərə deyil, bütün almanlara, o cümlədən risk qrupunda olan təminatlı insanlara da müraciət edirlər. Onlara məktublar yazırlar. Zəngdən sonra Azərbaycan vətəndaşları və icra hakimiyyətlərinin, dövlət qurumlarının işi haqqında düşündüm və ürəyim ağrıdı...", deyə Çingiz sosial şəbəkədə yazıb.

Azərbaycanda 65 yaşdan yuxarı olan və evdən çıxmaq hüququ olmayan, onlara kömək edə biləcək doğmaları olmayan vətəndaşların çətin vəziyyəti haqqında tarixçi Rüstəm Ələsgərov Turan-a danışıb. Onun ehtiyacı yoxdur, amma yaşları ilə əlaqədar SMS-icazə almaqla belə mağazaya və aptekə çıxa bilməyən tanış həmyaşıdları var. Onlara kömək edəcək heç kim yoxdur. Rüstəm Ələsgərov Əmək və Əhalinin Sosial Müdafiəsi Nazirliyinə zəng edib və hamı kimi orada qeydiyyatdan keçib ki, sosial işçilər özünütəcrid zamanı ona kömək etsinlər. Amma kömək edən yoxdur, hətta onların vəziyyəti ilə maraqlanmırlar belə. Onlar qonşularından onlara ərzaq almağı xahiş etmək məcburiyyətindədirlər və ya 100 manat cərimə olunmaqla risk edərək, karantin qaydalarını pozurlar.

Azərbaycanda martın 24-dən etibarən xüsusi karantin rejimi qüvvədədir. Bu rejim çərçivəsində 65 yaşından yuxarı vətəndaşlara evlərini və mənzillərini tərk etmək qadağan edilib.

Hərbi pensiyaçı və yazıçı Akif Həsənova da zəng etməyiblər, baş çəkməyiblər və kömək etməyiblər.

Mahmud Hüseynov bildirir ki, 65 yaşından yuxarı yeddi nəfər qohumu var. Heç birinə sosial xidmətdən zəng edən olmayıb.

Məqalə müəllifi FB-də 65+ yaş qrupunda olanlara sual ünvanlayaraq çox sayda belə etiraf alıb.

Bakılı Telli Əliyeva yazıb ki, ona bir dəfə JEK-dən zəng edib köməyə ehtiyacı olub olmadığını soruşublar. Vəssəlam.

Bioloq Sevinc Hüseynova Bakının Nərimanov rayon sosial xidmətinin yaxşı işlədiyini, onun qohumuna dəfələrlə kömək etdiyini yazıb. Amma elə həmin rayonda yaşayan Aidə Qəmbər 65+ yaşında olan qonşusuna heç kimin zəng etmədiyini bildirib.

84 yaşlı nənə Rusulə Axundovaya yalnız poliklinika həkimləri zəng ediblər. Beydulla Manafova ailə həkimi zəng edib.

Asif Hacıyev Mingəçevirdə yerli hakimiyyət, sosial xidmət və hüquq-mühafizə orqanları tərəfindən pensiyaçılara konkret kömək göstərildiyi haqqında məlumat verib.

Hüquq müdafiəçisi Səidə Qocamanlı sosial xidmət işçiləri tərəfindən unudulub.

Olluz Ömərovanın valideynlərinə zəng etməyiblər, baxmayaraq ki, yaşlılardan biri xərçəng xəstəsidir.

Pensiyaçı, keçmiş siyasətçi Vahab Manafov obrazlı şəkildə fikir bildirib: "Heç kim zəng etməyib, heç kim gəlməyib, heç kimin niyyəti də yoxdur! Amma yaxşı hesabat verir və pulları ciblərinə doldururlar...".

Əmək və Əhalinin Sosial Müdafiəsi Nazirliyinin saytında karantin günlərində müxtəlif dövlət qurumlarının və özəl şirkətlərin qeyd edilən yaş qrupundakı 13 mindən çox vətəndaşa kömək edildiyi bildirilir. Elə oradaca 2400 tənha pensiyaçıya ərzaq yardımı göstərmiş Bravo mağazalar şəbəkəsi haqqında məlumat var. Müdafiə Nazirliyi ordu veteranlarının, şəhidlərin və hərbi əlillərin ailə üzvlərinə ərzaq yardımı paylayır. Amma profili bu sahə olan Əmək və Əhalinin Sosial Müdafiəsi Nazirliyi tərəfindən 65+ yaşlı insanlara kütləvi qayğı haqqında məlumat yoxdur.

Problemi işıqlandıran jurnalistlər Azərbaycanın sosial müdafiə sisteminin karantin sınaqlarına tab gətirməyərək çökdüyünü yazırlar. Karantin şərtləri ilə əlaqədar evdən ərzaq mağazasına belə çıxmaq imkanı olmayan çox sayda tənha ölkə vətəndaşı köməksiz qalıb. Bu insanları gözlənilmədən fəal ictimai dəstək xilas edir. Ərzaq toplayan və onları ünvanlara paylayan bir neçə şəbəkə qruplarının fəalları onların köməyinə çatır.

Jurnalist Gülnaz Qəmbərlinin qrupu karantin dövründə 28 ailəyə kömək edib.

Rəssam Milena Nəbiyevanın sosial qrupunu rekord sahibi adlandırmaq olar. Bu qrup 16 aprel də daxil olmaqla, pandemiya dövründə 500 ünvana ərzaq paylamağa müvəffəq olub. Milenanın yaratdığı Həyata Ümid layihəsinə Heydər Əliyev Fondu, ərzaq məhsulları istehsal edən şirkətlər və şəxsi avtomobili olan bir neçə tanışı kömək edir.

"Başlanğıcda heç olmasa 100 ailəyə kömək etmək qərarına gəldim. Amma dostlarımın dəstəyini və heç tanımadığım insanların kömək etmək istəyini gördükdə başa düşdüm ki, davam etmək lazımdır. Özü də ehtiyac sahibləri gündən günə artırdı. Özümü tamamilə yardımın təşkilinə həsr etdim. Yeməyə, yatmağa imkan vermirdilər. Kömək etməyi xahiş edirdilər, mən də çatdırdığım hamıya kömək edirdim. Bir çox müsbət emosiyalar olurdu, əlbəttə, xoşagəlməzliklər də ötüşmürdü", deyə Nəbiyeva Turan-a bildirib və əlavə edib ki, dəfələrlə sahiblərinin ərzağa ehtiyacı olmadığı açıq-aydın görünən bahalı, yaxşı təchiz edilmiş mənzillərdə yaşayan ailələr onlardan yardım istəyib.

Mütəxəssislər hesab edirlər ki, bu gün mövcud olan pandemiya ilk və son deyil. Həkimlər payızda koronavirusu qane edən hava şəraiti qayıtdıqda onun yenidən canlanacağını xəbər verir. Koronavirus heç yerə gedən deyil, sadəcə bir müddət gizlənəcək.

Əmək və Əhalinin Sosial Müdafiəsi Nazirliyi virusun növbəti hücumu zamanı öz öhdəliklərinin öhdəsindən gələcək, doğru nəticələr çıxarılacaq? Hələlik yalnız prezident İ.Əliyevin fərmanı ilə 65 yaşdan yuxarı vətəndaşlara qulluğu həyata keçirən sosial xidmət işçilərinin əmək haqqının artırıldığı məlumdur.