Etnoqraf: 2050-ci ilə qədər Ermənistanın əhalisi 1,5 milyona qədər azala bilər

Yerevan/05.04.13/Turan-Armİnfo: Hazırki miqrasiya tempi davam edərsə, 2050-ci ilə qədər Ermənistan əhalisinin sayı 1,5 milyon nəfərə qədər azala bilər, bu barədə “Delovoy Ekspress” qəzetinə müsahibəsində məşhur erməni etnoqrafı Qranuş Xaçatryan bildirib.

O qeyd edib ki, rəsmi məlumatlara görə, 2013-cü ilin yanvarında ölkə əhalisinin miqrasiyasının mənfi saldosu 7 min nəfər təşkil edib, fevralda isə 15 min nəfərə çatıb. Xaçatryanın hesablamalarına görə, Ermənistan əhalisinin real sayı təxminən 2,5 milyon nəfər təşkil edir, baxmayaraq ki, rəsmi statistik məlumatlara görə bu rəqəm 3,5 milyon nəfər təşkil edir.

Etnoqrafın fikrincə, ölkənin demoqrafik strukturu müntəzəm olaraq təkcə kəmiyyət deyil, həm də keyfiyyət dəyişikliklərinə məruz qalır və gələcəkdə Ermənistan əhalisinin yaşlanma miqyası daha güclü xarakter alacaq. “Bizim əhalinin yaşlanma göstəricisi çox yüksəkdir – 20% təqaüdçülərdir, bir halda ki, əhalinin yol verilən yaşlanma norması 7-8%-dən çox olmamalıdır”, deyə o qeyd edib.

Əhalinin coğrafi tənasübsüzlük də narahatlıq doğurur, ekspert bunu “dəhşətli” adlandırır. Belə ki, 1,% milyona yaxın insan paytaxtda yaşayır, regionlarda təxminən 1 milyon nəfər yaşayır, həm də region sakinlərinin əksəriyyəti Ararat vadisində cəmləşib, belə ki, burada torpaqlar dağlıq və dağətəyi rayonlara nisbətən daha məhsuldar və gəlirlidir.

ER Dövlət Miqrasiya Xidmətinin məlumatına görə, 2013-cü ilin yanvar-fevral aylarında Ermənistanda miqrasiyanın mənfi saldosu 22 min nəfər təşkil edib, illik hesaba görə 7,7 min nəfər və ya 53,7% artıb. Bu müddət ərzində 272.9 min nəfər ölkəni tərk edib, ölkəyə 250.8 min nəfər gəlib. -02D-