Əvəz Zeynallının işi üzrə məhkəmədə qalmaqal

Bazar ertəsi “Xural” qəzetinin redaktoru Əvəz Zeynallının Ağır Cinayətlər üzrə Məhkəmədə keçirilən məhkəməsi dava-dalaşla müşayiət edilib. 

    Belə ki, deputat Gülər Əhmədova məhkəmə zalına daxil olan kimi tərəflər arasında söz atışması başlayıb, deputat özü müttəhim Ə.Zeynallıya hücum edib, qardaşı, teleaparıcı İlqar Mikayıloğlu isə Ə.Zeynallının qardaşı ilə dava-dalaşa çıxıb. 

    Hakim prosesə fasilə verib. 

    Deputat G.Əhmədova Ə.Zeynallını “Xural” qəzetində barəsində şok açıqlamalar anonsu verməklə şantaja məruz qoymaq ittihamı səsləndirib. Deputat deyib ki, məsələni yoluna qoymaq üçün qəzetin redaksiyasına gəlib, barəsində heç nə yazılmaması müqabilində qəzetə 10 min manat yardım edəcəyini vəd edib. Bu danışığı audio-kassetə yazdırdığını söyləyib. Amma qəzetdə şantaja məruz qalmasının davam etdiyini deyən deputat bundan sonra prokurorluğa müraciət etdiyinji və Ə.Zeynallının həbsinə nail olduğunu söyləyib.

    Buna qədərsə “Azərbaycan” nəşriyyatının direktoru, prosesdə zərərçəkən  kimi tanınan Ağabəy Əsgərov dindirilib. A.Əsgərov Ə.Zeynallının redaktoru olduğu qəzetdə şərəf və ləyaqətinin tapdanmasına məruz qaldığını söyləyib. Məhkəməyə müraciət edib, məhkəmə qəzetin cərimə olunması, həm də təkzib verməsi qərarı çıxarıb. A.Əsgərovun sözlərinə görə, Ə.Zeynallı nə təkzib verib, nə də cəriməni ödəyib. Buna cavab olaraq Ə.Zeynallı qəzetin 2-ci səhifəsində həmin məsələ ilə verilən təkzibi, cəriməini ödənməsinə dair qəbzi A.Əsgərova göstərib.

  Növbəti məhkəmə prosesi iyulun 11-nə təyin edilib.-05B-