“Fairmont Baku” otelində saxlanılanlarla profilaktik söhbət aparılıb (YENİLƏNİB)

Saxlanılan şəxslərin hər biri ilə profilaktik, izahedici söhbətlər aparılaraq onların diqqətinə çatdırılıb ki, bu əməllər ölkədə tətbiq olunan epidemiya əleyhinə rejimin, sanitariya-gigiyena və karantin qaydalarına zidd olmaqla, insanların həyat və sağlamlığı üçün risk daşıyır. Bu barədə DİN-in məlumatında bildirilir.  Onlar izahatlarında bu hərəkətlərindən səmimi peşmançılıqlarını ifadə ediblər.

Saxlanılan şəxslər İnzibati Xətalar Məcəlləsinə uyğun olaraq məsuliyyətə cəlb ediliblər.

*   *   *

2020 İyul 05 (Bazar) 22:21:12

“Fairmont Baku” otelində polis əməliyyatı 

Bakı/05.07.20/Turan: Polis Bakıdakı dəbdəbəli otellərdən birində, “Fairmont Baku” otelində karantin rejimini pozanlara qarşı əməliyyat keçirib. Pozucuların bir hissəsi şöbələrə aparılıb.

Polis reydi sosial şəbəkələrdə hovuzun kənarında çoxlu sayda istirahət edənlərin foto və videogörüntüləri yayıldıqdan sonra keçirilib.

Maraqlıdır ki, mehmanxana administrasiyası öz İnstaqram səhifəsində istirahət günlərində 399 manata “Espape” paketini açıq şəkildə təklif edib.  

Xidmət paketinə açıq hovuza giriş də daxil edilib.

Halbuki, sərt karantin rejimi şəraitində hakimiyyət vətəndaşlara çimərliklərə getməyi, ümumiyyətlə, 5 nəfərdən çox qruplarla toplaşmağı qadağan edib.

Adətən sosial şəbəkələri diqqətlə izləyən güc qurumları nədənsə bunu nəzərdən qaçırıblar və əməliyyat yalnız bu gün mehmanxana hovuzu kənarında istirahət edənlərlə bağlı kadrların yayılmasından sonra həyata keçirilib.–06D--