Futbolçu Cavid Hüseynov 4 il azadlıqdan məhrum edilib

Bu gün Səbayel Rayon Məhkəməsi “Qəbələ” futbol klubunun kapitanı Cavid Hüseynovu   4 il azadlıqdan məhrum edib. O, CM-in 307.1. (hazırlanmaqda olan ağır cinayət barədə xəbər verməmək) və 307.2. (ağır cinayətin ört-basdır edilməsi) maddələri üzrə təqsirli bilinib.

Söhbət futbolçunun bir qrup yaxın adamının jurnalist Rasim Əliyevi döymək niyyətindən gedir.

Xatırladaq ki, R.Əliyev və C.Hüseynov arasında münaqişəyə jurnalistin Facebook-da futbolçunun xoşagəlməz hərəkətləriylə bağlı yazısı səbəb olub. Bundan sonra jurnalist C.Hüseynovun qohumu tərəfindən hədələrə məruz qalıb. C.Hüseynov özü də jurnalistə telefon edərək danışıb. Mərhum ölümündən öncə bildirib ki, C.Hüseynov ona barışıq təklif edib, lakin görüşə gələndə  o, artıq döyülmüşdü. Bu, avqustun 8-də baş verib. Bir gündən sonra R.Əliyev xəstəxanada vəfat edib. Jurnalistin döyülməsində iştirak edən beş nəfər 9 ildən 13 ilədək azadlıqdan məhrum edilib.

Qeyd edək ki, jurnalistin yaxınları Cavid Hüseynovu cinayətin təşkilatçısı hesab edirlər və belə yüngül cəza ilə razı deyillər. Bundan əlavə, futbolçu bu yaxınlarda qəbul edilmiş amnistiya çərçivəsində tezliklə azadlğa çıxa bilər.-16/06D-