Gülalıyevdən Sabirabad polisinə gəlmək haqqında iltizam alaraq, sərbəst buraxıblar (YENİLƏNİB)

İyunun 23-də axşam 37-ci polis bölməsində hüquq müdafiəçisi Oqtay Gülalıyevdən iyunun 27-nə qədər mütləq Sabirabad rayon polisinə gəlmək haqqında iltizam alaraq, onu sərbəst buraxıblar. Bu barədə hüquq müdafiəçisi Turan agentliyinə bildirib.

37-ci bölmədə ona bildiriblər ki, barəsində axtarış elan edilməyib, amma ölkədən çıxışına qadağa qoyulub.

“Onda aydın deyil, niyə məni ASAN xidmətdə saxlayıblar? Sadəcə deyə bilərdilər ki, mənim ölkədən çıxışıma qadağa qoyulub. Sən demə, ASAN xidmətlər deyil, vətəndaşların total izlənməsi sistemidir.

Sənədlərimi təqdim edən kimi dərhal polis gəldi və məni ASAN xidmət nəzdindəki bölməyə apardı”, deyə Gülalıyev qeyd edib.

“4 il əvvəl başlamış cinayət işinin bütün araşdırma müddəti çoxdan başa çatıb. İşə xitam verilməli və ya məhkəməyə göndərilməlidir”, deyə Gülalıyev bildirib.

Hüquq müdafiəçisi dəfələrlə DİN və Baş Prokurorluğa müraciət edib, amma hələ də cinayət işinə xitam verilib-verilmədiyi barədə suala cavab ala bilməyib. -06B-

2016 İyun 23 (Cümə axşamı) 16:33:13

“Siyasi məhbuslarsız Azərbaycan” İctimai Alyansının koordinatoru, MSAŞ Koalisiyasının Şura üzvü  Oqtay Gülalıyev xarici pasport almaq üçün “ASAN” xidmətinə müraciət etdikdən sonra iyunun 23-də günün ikinci yarısında 37-ci polis bölməsinə aparılıb.

ASAN-da Gülalıyevə bildiriblər ki, onun barəsində Sabirabad rayon polisi tərəfindən axtarış elan olunub və bu barədə yerli polisə məlumat verilib.

Gülalıyev barəsində axtarış 2012-ci il aprelin 8-də onun həbsindən sonra hakimiyyət orqanlarına tabe olmamağa və kütləvi iğtişaşlara təhrik etmə ittihamı (AR CM-in 220.2-ci maddəsi) üzrə açılmış işlə bağlı elan edilib. İş Sabirabad rayon icra hakimiyyətinin və paytaxtda korrupsiyaya uğramış yüksək vəzifəli məmurların təşəbbüsü ilə bu rayonun polisində saxtalaşdırılıb.

 Amma Prezident Administrasiyasının müdaxiləsindən sonra o, elə həmin il iyunun 13-də Sabirabad rayon məhkəməsinin qərarı ilə azad edilib.

Həbs edildiyi zaman Gülalıyev Kürətrafı 8 rayonun daşqından ziyan çəkmiş sakinlərinin hüquqlarının müdafiəsi ilə məşğul olan “Kür” vətəndaş cəmiyyəti qərargahının koordinatoru idi.

Qərargah Fövqəladə Hallar Nazirliyinin nəzarəti altında daşqının nəticələrinin aradan qaldırılması zamanı mənimsəmə və məmurların yüz milyonlarla dollardan sui-istifadəsi faktlarını aşkar edib. Buna görə qrargah üzvləri təqib olunub, bir sıra fəallar  həbs olunub və sonradan azad edilib.

Amma qərargahın korrupsiya, sui-istifadə və daşqının süni xarakterli olması ilə bağlı yüksək dövlət instansiyalarına bütün rəsmi müraciətləri lazımi qaydada araşdırılmayıb və nəticə çıxarılmayıb, Gülalıyevin işi isə qanunazidd olaraq indiyədək bağlanmayıb. 2012-ci il iyunun 13-də məhkəmədə Gülalıyevə böhtan atanlar ona qarşı yalançı şahidlik etdiklərini etiraf ediblər.

2012-2016-cı illər ərzində müxtəlif vaxtlarda Gülalıyevin oğulları soyuq silahdan istifadə ilə fiziki zorakılığa, habelə polis təzyiqinə məruz qalıblar. -0-