Güneyli fəallar etirazı aclıq aksiyası ilə bildirirlər

Güney Azərbaycan Milli Oyanış Hərəkatının (GAMOH) İranda həbsdə olan bir neçə üzvü milli fəalların həbslərinə etiraz olaraq iyulun 13-dən aclıq aksiyasına başlayıblar. 

Rəsmi Tehran bunun qarşısını almaq üçün müxtəlif üsullara əl atır. İyulun 17-də prokuror (dadistan) aclıq edənlərin bəzilərinin ailə üzvlərilə görüşüb. “Gedin, övladlarınızdan aclıq aksiyasını dayandırmağı tələb edin, yoxsa onları ayrı-ayrı yerlərə sürgün edərik”, - prokuror valideynlərə xəbərdarlıq edib.

Görüşə həbsdə olan Şəhram Radmehr və Behbud Quluzadənin ailə üzvləri gediblər. Hər iki məhbusun ailə üzvü aclıq edənlərin xeyli  arıqladığını deyiblər. Prokurorun sözləri fəallara çatdırılsa da onlar bununla razılaşmayıblar. Ş. Radmehr bildirib ki, bu ölüm ədalətsizlikdən yaxşıdır. Məhbus bu ədalətsizliyi təkcə özünə yox,  bütün Azərbaycan fəallarına aid edərək buna son qoyulmasını tələb edib. Aclığı dayandırmadıqları halda rəsmi Tehranın onları sürgün etmək istəyinə ağızlarını tikməklə cavab verəcəklərini, su belə içməyəcəklərini bildiriblər. Bu halda ölüm olarsa buna görə dövlətin məsuliyyət daşıyacağı qeyd olunub. 

Məhbusların mövqeyi prokuror və həbsxana rəisinə çatdırılıb.

Prokuror valideynlərə “hələ ölməyiblər ki?” sualı ilə rişxənd edib. Həbsxana rəisi məhbusların aclıq zamanı ölsələr intihar qrafası ilə həbsxanada dəfn olunacaqlarını bildirib. -05D-