Hacı Cavad məscidi sökülüb

Bakı/01.07.17/Turan: İyunun 30-da axşamüstü Bakının Yasamal rayonu ərazisindəki Hacı Cavad məscidinin sökülməsinə başlanılıb. Bu haqda Turan xəbər verir.

Hazırda əraziyə texnika cəlb edilib. Məscidin sökülməsinə hazırlıq getdiyi bildirilir.

Ancaq məsciddə ibadət edənlər söküntü işlərindən narazıdırlar.

"İlk dəfə aprel ayında sökməyə gəlmişdilər. Həmin vaxt burada ibadət edənlər narazılıq etdi, hökumət də söküntüyə ara verdi. Sonradan məscidin nümayəndələrini icra hakimiyyətində də qəbul etdilər. Bizə söz verdilər ki, bizim üçün təzə məscid tikiləcək. Yalnız təzə məscid tikiləndən sonra söküntü işlərinə başlanacağını bildirdilər. İndi də belə...", deyə sakinlərdən Əfqan Həzrətov Turan-a bildirib.

Məscidə ibadətə gələn digər vətəndaşlar da narazılıqlarını bildiriblər.

"Ötən illərdə Azərbaycanı "İslam paytaxtı" elan etmişdilər. Azərbaycanı ona görə "İslam paytaxtı" elan etmişdilər ki, bu cür tarixi, gözəl məscidləri söksünlər?", deyə başqa bir vətəndaş sual edib.

İbadətə gələnlər deyir ki, günorta namaza toplaşıblar. Hər hansı xəbərdarlıq olmayıb. Günortadan sonra xəbər gəlib ki, artıq məscidi boşaldırlar.

"İndi də biri deyir, təmir ediləcək, digəri deyir, sökürük. Bir rəsmi şəxs yoxdur ki, çıxıb camaatın qarşısına desin ki, nə məsələdir. Həm də, axı niyə bu cür məscid sökülməlidir, başqa yerdə tikilməlidir? Hazır var da burda...", deyə əraziyə toplaşanlardan biri qeyd edib.

Hazırda Hacı Cavad məscidinin ətrafına 100-dən artıq inanclı vətəndaş toplaşıb. Əraziyə polis qüvvələri də gətirilib.

Qeyd edək ki, bu ayın əvvəlində Hacı Cavad məscidinin söküləcəyi açıqlanmışdı. Məscidin icması bildirmişdi ki, başqa ünvanda yeni məscid inşa olunacaq.

"Artıq bununla bağlı Dini Qurumlarla İş üzrə Dövlət Komitəsi ilə qarşılıqlı razılaşma əldə olunub", deyə məscidin icmasından bildirmişdilər.

Dini Qurumlarla İş üzrə Dövlət Komitəsi isə açıqlamışdı ki, yeni məscid Yasamal rayonu ərazisində inşa olunacaq.

Bu il aprelin 12-də Bakının Yasamal rayonu ərazisindəki Hacı Cavad məscidini sökməyə cəhd etmişdilər.

Həmin vaxt əraziyə Yasamal rayon İcra Hakimiyyətinin işçiləri və polis əməkdaşları gəlmişdi. Ancaq məscidin daxilində və önündə dayanan yüzlərlə insan söküntüyə imkan verməmişdi.

Prezident İlham Əliyev isə aprelin 13-də inanclı insanların reaksiyasını nəzərə alaraq, məscidin söküntüsünün dayandırılması, məsələnin hərtərəfli araşdırılması və binanın texniki vəziyyətinin tam obyektiv qiymətləndirilməsi məqsədilə xüsusi komissiyanın yaradılması barədə tapşırıq vermişdi.

Yerli camaatın bildirdiyinə görə, bu məscidi Hacı Cavad adlı tacir tikdirib. Məscidin giriş qapısının üstündə üç daş kitabə həkk olunub. Həmin kitabələrdən birinə əsasən, məscidin inşa tarixi hicri-qəməri təqvimi ilə 1305-ci ilə aiddir. Bu, miladi təqvimi ilə XIX əsrə düşür. -0-