Hilal Məmmədovun hüquqlarının Müdafiə Komitəsinin həmsədri bəzi hüquq müdafiəçilərinin hərəkətlərini pisləyib

 “Doktor  Hilal Məmmədovla bağlı yalnız onun müdafiə komitəsi və ailəsinin əməkdaşlıq etdiyi hüquq müdafiəçisi Leyla Yunus  bilgilər verə bilər. Digər şəxslərin verdikləri bilgilərin heç bir hüquqi əsası yoxdur və hesab edirik ki, düşünülmüş şəkildə söylənilən bu bilgilər H. Məmmədovun əleyhinə hesablanıb”, - Hilal Məmmədovun hüquqlarını Müdafiəsi Komitəsinin həmsədri Rafiq Cəlilovun bəyanatında deyilir. 

Sənəddə bildirilir ki, oktyabrın 31-də Avropa Şurasının Bakı nümayəndəliyində hüquq müdafiəçilərinin  Avropa Şurası baş katibinin müavini Qabriela Bataina-Dragoni ilə görüşündə bəzi hüquq müdafiəçiləri, xüsusən də Səadət Bənənyarlı, Novella Cəfəroğlu və Səidə Qocamanlı “Tolışi Sədo” qəzetinin baş redaktoru Hilal Məmmədovun həbsinin motivlərini bilərəkdən qeyri-dəqiq məcralara yönəldib, həbsin siyasi sifarişli olduğunu təkzib etməyə çalışıblar. 

Bəyanatda hüquq müdafiəçilərinin H.Məmmədovu “separatçı Talış Partiyasının lideri” adlandırmasını pislənir. 

H.Məmmədovun hüquqlarının Müdafiəsi Komitəsinin həmsədri Rafiq Cəlilov bildirir ki,  o, məhz talış mədəniyyətinin, folklorunun, tarixinin tədqiqində göstərdiyi səylərə görə həbs edilib. 

“Belə ki, Hilal Məmmədov 2012-ci ilin iyunun 13-də Astara rayonunda “Talış Folklor Gecəsi” təşkil edərkən bir sıra qurumlardan “bunu etmə, nəticəsi pis olar” kimi hədə-qorxular alıb, bütün bunlara baxmayaraq, həmən folklor gecəsini keçirib. Folklor gecəsindən bir həftə sonra H.Məmmədov həbs edilərkən onun milli kimliyi ağır söyüşlərlə təhqir edilib, ona “özfəaliyyətinin cəzası veriləcəyi” barədə xəbərdarlıqlar edilib”. 

Sənəddə deyilir ki, Hilal Məmmədovun həbsi siyasi sifarişlidir və birbaşa onun milli kimliyi ilə əlaqəlidir. -03D-