Hüquq- müdafiə qurumu müxalifətçilərin həbsini və Operativ Qərargahın qərarlarını pisləyib

Bakı/30.08.20/Turan:  Siyasi Məhbusların Monitorinq Mərkəzi hesabat yayıb. Sənəddə 15 iyul Qarabağ aksiyası ilə əlaqədar həbs edilən fəalların hüquqlarının pozulduğu qeyd olunur. 

Sənəddə xatırladılır ki, Ermənistan Silahlı Qüvvələrinin Azərbaycanın mövqelərini ələ keçirmək cəhdinə etiraz olaraq Bakıda keçirilən yürüş dinc xarakter daşıyırdı.

Aksiya iştirakçıları Azərbaycan ordusuna dəstəyini ifadə edib və hökumətdən erməni təcavüzünün dayandırılması, işğal olunmuş ərazilərin azad edilməsi üçün qətiyyətli tədbirlər görməyi tələb ediblər.

Aksiya zamanı bir qrup şəxs güc qurumlarının tamamilə fəaliyyətsizliyi şəraitində parlamentin binasına daxil olub.

Sonrakı günlərdə müxalifət fəallarının, hətta nümayişdə olmayanların kütləvi həbsləri həyata keçirilib.

AXCP - nin 18 üzvü, “Müsəlman Birliyi” Hərəkatının 2 üzvü, Demokratiya və Rifah Hərəkatının 1 üzvü və digərləri  cinayət məsuliyyətinə cəlb edilib.

Həbs olunanlara qarşı “əmlakın məhv edilməsi”, “polisə müqavimət”, “ictimai asayişin pozulması” kimi “standart” ittihamlar irəli sürülüb.

Parlamentə “müdaxilə” hakimiyyətin planlaşdırılmış təxribatına bənzəyirdi. Videogörüntülərə güc strukturlarının mülki geyimli yüksək rütbəli nümayəndələri düşüblər, onlar parlamentə “hücum” edənlərin arasında olublar. Bu təxribat şübhəsiz ki, vətənpərvərlik aksiyasının dağıdılmasına, müxalifət fəallarının sonradan repressiyaya uğramasına bəraət qazandırmaq məqsədilə edilib. Əksinə, həbs olunanların  deyilən hərəkətləri törətməsinə dair dəqiq sübutlar göstərilməyib”, - Siyasi Məhbusların Monitorinqi Mərkəzinin rəhbəri Elşən Həsənov bildirib.

AXCP Rəyasət Heyətinin iki üzvü Fuad Qəhrəmanlı və Məmməd İbrahimə qarşı CM-in 278-ci maddəsi (hakimiyyətin zorla ələ keçirilməsinə yönələn hərəkətlər) ilə ittiham irəli sürülüb.

Hesabat müəllifləri bu ittihamın tutarsız olduğuna işarə edirlər.

“Hakimiyyətin ələ keçirilməsi və ya onu saxlamaq vasitəsi kimi zorakılıq həbs, zorakı fiziki təcrid, fiziki alçaltmalar, döyülmə, hakimiyyət orqanlarını təmsil edən şəxslərin səhhətinə ziyan vurmaqdan ibarət ola bilər. İndiki halda göstərilən əlamətlər və müvafiq cinayətin tərkibi yoxdur”, - sənəddə deyilir.

Saxlanılanların çoxu işgəncələrə məruz qalıb, ailələri tərəfindən cəlb edilmiş vəkilləri onların yanına buraxmayıblar. Təyin edilmiş vəkillər isə faktiki olaraq müstəntiqlərin tərəfində çıxış ediblər.

Hesabatda həmçinin koronavirus infeksiyasının yayılmasına qarşı mübarizə aparmaq üçün yaradılmış Nazirlər Kabineti yanında Operativ Qərargah tənqid olunur.

“Bu gün Operativ Qərargah qanunvericilik və icra orqanlarının səlahiyyətlərini mənimsəyib. Operativ Qərargahın göstərişləri və sərəncamları vətəndaşların inzibati və cinayət təqibi üçün əsas kimi götürülür  ki, bu da Konstitusiyaya və qanunlara ziddir.

Operativ Qərargahda ictimai xadimlərin, müstəqil KİV nümayəndələrinin, vətəndaş cəmiyyəti fəallarının olmaması ölkə vətəndaşlarının etimadını sarsıdır. Təcrübə vətəndaşların, xüsusilə əhalinin yaşlı kateqoriyasının sağlamlığı üçün ağrılı nəticələrə səbəb olan sərt karantin rejiminin səhv olduğunu göstərdi”, - E.Həsənov qeyd edib.

Hesabatda həmçinin Aşura günü ilə əlaqədar dindarların kütləvi şəkildə saxlanılması da göstərilir.

“Açıq səma altında kafe  və restoranların fəaliyyət göstərməsinə, parklara getməyə icazə verilməsinə baxmayaraq, dindarların məscidlərin həyətlərində belə tədbir keçirməsinə icazə verilməyib. Onlarla adam saxlanılıb, cərimələnib, bəziləri həbs olunub. Operativ Qərargah faktiki olaraq diktatura yaradıb. Biz, keçmiş siyasi məhbuslar və vicdan məhbusları Operativ Qərargahın fəaliyyətini qanunsuz, konstitusiyaya zidd, hesab edirik. Bu qurum səlahiyyətlərini aşması ilə əlaqədar buraxılmalı və onun üzvləri məsuliyyətə cəlb edilməlidir. Operativ Qərargahın tətbiq etdiyi məhdudiyyətlərlə əlaqədar həbs olunanların hamısı azad edilməlidir”, - hesabatda bildirilir.

Siyasi Məhbusların Monitorinq Mərkəzi 2014-cü ilin oktyabrında Elşən Həsənovun rəhbərliyilə bir qrup keçmiş siyasi və vicdan məhbusu tərəfindən yaradılıb.–06B-