İlan gördükdə nə etməliyik?

Bakı/24.05.21/Turan: Mərdəkan və Qala qəsəbələri arasında yerləşən bağın sakini gürzə görüb. Evdə uşaqlar var, buna görə o, ilanı öldürüb və şəklini sosial şəbəkədə paylaşıb, bu yaz bir neçə ilan öldürdüyünü əlavə edib.

Turan Azərbaycan Milli Elmlər Akademiyasının Zoologiya İnstitutunun baş elmi əməkdaşı Təvəkkül İsgəndərovdan Abşeronda çox sayda ilan peyda olmasının səbəblərini izah etməyi və zəhərli heyvandan qorunmaq üçün zəruri tədbirlər haqqında məlumat verməyi xahiş edib.

Ekspert hesab edir ki, insanlar ilanların təhlükəsini şişirdirlər. Onların sayı çoxalmayıb, isti ayların başlaması ilə və pandemiyadan qaçan insanlar bağlara köçürlər. Yazda – yaya yaxın isə ilanlarda qış yuxusundan sonra canlanma baş verir, heyvanlar cütləşir, fəallaşır, buna görə də insanlara tez-tez rast gəlir. İlanların qeyri-adi şəkildə çoxaldığı barədə şaiyələr buradan irəli gəlir.

“Qeyri-adi heç nə baş verməyib. İlanlar çoxalmayıb. İlan gördükdə onu öldürmək deyil, mütəxəssislərə zəng etmək lazımdır ki, gəlib ilanı onun üçün və sakinlər üçün təhlükəsiz olan yerə aparsınlar”.

İsgəndərov onun 050 338 9567 nömrəsinə zəng etməyi təklif edib.

Serpentoloq kirpilər və pişiklər haqqında geniş yayılmış sualları cavablandırıb. Kirpilər ilan yemirlər və onları ovlamırlar. İlanlar kirpinin üstündəki iynələrdən qorxur, onları sanca bilmir və kirpilərin yaşadığı yerdən gedir. Pişiklər və itlər ilanlara qarşı həssasdırlar, onlara hücum edə bilərlər. Amma gürzə tərəfindən dişləndikdə bu heyvanlar ölür. İtlər ona görə faydalıdır ki, hürərək sahiblərinə ilanın gəldiyi barədə məlumat verirlər.

İsgəndərov ilanların yaşadığı regionların sakinlərinə gürzəni digər sürünən heyvanlardan ayırd etməyi öyrənməyi məsləhət görür ki, panikaya qapılıb təhlükəsiz ilanları və ayaqsız kərtənkələləri öldürməsinlər.

“İnsanlar Azərbaycanda yeganə zəhərli ilanı – gürzəni təhlükəsiz ilankimilərdən fərqləndirə bilmirlər və buna görə qorxu ilə bütün ilanları öldürürlər. Gürzəni təhlükəsiz heyvanlardan seçməyi öyrənmək üçün İnternetdə bir neçə şəklə baxmaq kifayətdir”, deyə o, Turan-a bildirib. -0-