Azərbaycana qarşı müharibə cinayətlərində günahlandırılan ermənilərin işi məhkəməyə göndərilib

Bakı/24.05.21/Turan: Qarabağda həbs edilən ermənilər – Lüdvik Mkrtiçyan və Alyoşa Xosrovyanın cinayət işi üzrə hazırlıq iclası iyunun 2-də hakim Elbəy Allahverdiyevin sədrliyi ilə Bakı Hərbi Məhkəməsində olacaq.

Mayın 20-də iş üzrə ittiham aktı təsdiq edilərək baxılması üçün Bakı Hərbi Məhkəməsinə göndərilib.

Ermənistan vətəndaşları Lüdvik Mkrtiçyan və Alyoşa Xosrovyan Azərbaycanın Cinayət Məcəlləsinin 113 (işgəncə), 115.2 (müharibə qanunlarını və adətlərini pozma), 279.1 (qanunvericiliklə nəzərdə tutulmayan silahlı birləşmələri və ya qrupları yaratma), 318.2-ci (Azərbaycan Respublikasının dövlət sərhədini qanunsuz olaraq keçmə) maddələri ilə günahlandırılır.

Hər iki şəxs 2020-ci il döyüşləri zamanı Azərbaycan Silahl Qüvvələri tərəfindən ələ keçirilib.

Lüdvik Mkrtiçyan və Alyoşa Xosrovyan birinci Qarabağ müharibəsi zamanı azərbaycanlı əsir və girovlara işgəncə verməkdə, qeyri-insani davranışda, Azərbaycan sərhədlərini qanunsuz yolla keçərək erməni silahlı qruplaşmalarında Azərbaycana qarşı döyüşlərdə iştirakda günahlı bilinir. -03-