İstintaq zamanı öldürülən zabitlərin ailələri Müdafiə Nazirliyini məhkəməyə verir

Bakı/12.06.19/Turan: Mərhum zabit Səxavət Binnətovun xanımı Azərbaycan Müdafiə Nazirliyini məhkəməyə verərək 200 min manat kompensasiya tələb etdikdən sonra 2017-ci ildə dövlətə xəyanətdə ittiham olunaraq işgəncələr nəticəsində ölən digər hərbçilərin dul xanımları da belə etmək qərarına gəliblər.

Zabit Elşən Mirzəyevin dul xanımı Günay İbrahimova Müdafiə Nazirliyini ərinin ölümündə günahlandırır.

"Onu dövlətə xəyanətdə ittiham ediblər və ölüncəyə qədər işgəncə veriblər. Bundan sonra məhkəmə qərar çıxarıb ki, ittiham təsdiqlənməyib. Buna görə kim cavab verəcək? Mənim maddi durumum çətinləşib. Evimiz yoxdur, ailə başçısını itirmişik, azyaşlı övladım var. Uşaq keçirdiyi stressdən ürək xəstəliyi tapıb, dərman sayəsində yaşamağa məcburdur", - o bildirib.

Digər zabit Sahib Qafarovun dul qalmış xanımı Natəvan Qafarova da Müdafiə Nazirliyini məhkəməyə vermək niyyətindədir.

"2018-ci ildə məhkəmə həyat yoldaşımın günahsız olması barədə qərar çıxarıb. Ancaq biz kompensasiya, ərimə şəhid statusunun verilməsini və bizə mənzil ayrılmasını tələb edilik", - o deyib.

*Xatırladaq ki, 2017-ci il mayın 7-də Azərbaycan Baş Prokurorluğu, Dövlət Təhlükəsizliyi Xidməti, DİN və Müdafiə Nazirliyi birgə bəyanat yayaraq Tərtər rayonunda erməni kəşfiyyatı ilə əməkdaşlıq edən bir qrup hərbçi və mülki şəxsin ifşa olunduğunu bildirmişdi.

İstintaq zamanı onlarla şəxs həbs edilib. Qeyri-rəsmi məlumatlara görə, istintaq zamanı 8 nəfərə dəhşətli işgəncə verilib. Sonradan onlardan 4-ü günahsız olduğuna görə məhkəmə tərəfindən bəraət alıb.

Qeyri-rəsmi məlumatlara görə, ittihamları saxtalaşdıran və həbs olunanlara işgəncə verən müstəntiqlər və hərbçilər 6 il azadlıqdan məhrum ediliblər.

Lakin hakimiyyət hələ də bu işin detallarını açmayıb və hadisəyə qiymət verməyib.06D--

Rəy yaz

Cəmiyyət

Taksi sayı azaldılır, bəs köhnə taksiçilər nə ilə dolanacaqlar? – Rauf Ağamirzəyev Çətin sualda



Bizi sosial şəbəkələrdə izləyin

Xəbər lenti