Jurnalist məmur olmağa borcludurmu?

Mediada İnnovativ Təşəbbüslərə Dəstək (MİTD) İctimai Birliyi cümə günü Beynəlxalq Mətbuat Mərkəzində (BMM) “İnformasiya təhlükəsizliyi milli təhlükəsizliyin elementi kimi” mövzusunda dəyirmi masa keçirib.

Layihə rəhbəri Müşfiq Ələsgərli bəhs edilən mövzu ilə bağlı çıxış edərək, jurnalistləri məsuliyyətli olmağa, “dövlət sirrini” yaymamağa çağırıb, əks halda cinayət məsuliyyətinə cəlb edilə biləcəkləri təhdidi edib. M.Ələsgərli haqlı olduğunu sübut etmək üçün 2014-cü ildə cəbhə bölgəsində baş verən “avqust hadisələri”nə “söykənib”. Onun fikrincə, o zaman “ordu düşmən hücumunu dəf etməklə situasiyadan üzüağ, ölkə jurnalistikası isə düşmən təxribatına uymaqla “üzüqara” çıxıb.

Üstündən bir ilə yaxın vaxt keçən hadisələr haqda danışan M.Ələsgərli yeni versiya ortaya atıb. Belə ki, o, həmin vaxt adı çəkilən hadisələrdə milli ordunun fəaliyyətilə bağlı ilk təxribatçı xəbərləri yayan inernet resursları erməni tərəfə məxsus olub. Sonradan həmin saytlar internetdən silinib. Bunun arxasınca Azərbaycan internet saytları bu “təxribatçı” xəbərləri tirajlamağa başlayıb. M.Ələsgərliyə görə, bu məqamda ölkənin adlı-sanlı agentlikləri, internet saytları ayıqlıq göstərməyiblər. İnternet saytlarında ordu texnika və canlı qüvvələrinin hərəkəti haqda videosüjetlər göstərildiyini deyən M.Ələsgərli konkert olaraq bunu hansı internet-resursaların tirajladığını söyləməyib və ad çəkməyib. Beləliklə, əslində bir neçə saytın siyasi naşılığı bütün ölkə jurnalistikasına aid edilib. Jurnalistləri bir daha məsuliyyətli olmağa çağıran M.Ələsgərli əks halda bu sahədə Cinayət Məcəlləsinə dəyişikliklər nəticəsində jurnalistlərin cinayət məsuliyyətinə cəlb ediləcəkləri anonsu verib. 

Layihə koordinatoru Ayaz Nizamioğlu isə Avropa Oyunları ərəfəsində “Atletlər kəndi”ndə baş verən avtobus qəzası, Cəlilabadda bir qızın atın quyruğuna bağlanması ilə bağlı xəbərləri yayanları “peşəkarlıqdan uzaq” sayıb. Ədalət naminə deyək ki, sonuncu informasiya həqiqətən yanlış olub. Burada atanın səhvi üzündən at uşağı dalınca sürüyüb və hər-hansı şəkildə qəsd və ya işgəncədən söhbət gedə bilməz. A.Nizamioğluna görə, Avstriyanın 3 idmançısının ciddi xəsarət almasına səbəb olan avtoqəza ilə bağlı videosüjetlər “ölkə üçün həssas dönəmdə” tirajlandığı üçün beynəlxalq miqyasda və kütləvi şəkildə Azərbaycanın tənqidinə səbəb olub. Ona görə bu məqamda jurnalistlər peşəkarlıq nümayiş etdirməyiblər.

Tədbirdə jurnalistlərin “dövlət sirri”ni qorumaq məsuliyyətindən danışılsa da, bu sirrin daşıyıcıları olan rəsmi qurumların məsuliyyətindən danışılmayıb. Dövlət sirrinin qorunması və informasiyanın operativliyi nisbətində jurnalistin necə hərəkət etməsi sualına cavab alınmayıb. Ümumiyyətlə, rəsmi münasibətlə jurnalistika maraqları müstəvisinə baxışlar məsələsinə aydınlıq gətirilməyib. Bir də, aydın olmayıb ki, ölkə jurnalistləri məhz hansı “dövlət sirri”ni “faş” ediblər və bu layihə mahiyyəti etibarilə nəyə lazımdır? -05C-