Jurnalist polis bölməsində fiziki təzyiqlərə məruz qaldığını bildirib

Bakı /04.10.18/Turan: Jurnalist Aytac Əhmədova polis bölməsində fiziki təzyiqlərə məruz qalıb. Bu barədə o, Facebook səhifəsində yazıb.

Onun sözlərinə görə, Zabrat qəsəbəsində bir qrup sakinin keçirdiyi etiraz aksiyası ilə bağlı reportaj hazırlayarkən saxlanılıb. Zabrat sakinlərinin sosial narazılığı barədə videoreportaj "Meydan"TV-nin saytında yerləşdirilib.

https://www.facebook.com/aytac.ehmedova1?fref=mentions

Zabrat qəsəbəsində Nəriman Nərimanov küçəsində yaşayan qadınlar jurnalistin suallarını cavablandırarkən dövlətdən qəzalı vəziyyətdə olan evlərinin təmir olunmasını tələb ediblər. Qadınlar dövlətin diqqətini bu duruma cəlb etmək üçün əl-ələ tutaraq avotmobil yolunu bağlayıblar. Etirazçılardan biri deyib ki, FHN-də onlara bildiriblər ki, evləri qəzalı vəziyyətdədir və təmir olunmalıdır.

"Polislər məndən tələb etdilər ki, dərhal çəkilişi dayandırım. Mən jurnalist olduğumu bildirsəm də onlar məni zorla maşına əyləşdirib Sabunçu Rayon Polis İdarəsinin 15-ci bölməsinə apardılar", - o deyib.

A.Əhmədovanın sözlərinə görə, bölmənin dəhlizində Qabil adlı mülki geyimli şəxs onu şillə vurub.

"O, mənimlə hədələyici və alçaldıcı tonda danışırdı. Məni vuranda qışqırdım və məni rəis İsmayıl Məmmədovun yanına apardılar. O, mənimlə normal danışdı", - A.Əhmədova bildirib.

A.Əhmədova izahat yazıb və baş verənləri orada qeyd edib. Baxmayaraq ki, ona polis tərəfindən zorakılığa məruz qalması faktını göstərməməyi məsləhət ediblər.

O deyib ki, aksiya zamanı etdiyi qeydləri silməyə məcbur ediblər. Jurnalist polis bölməsində onunla zorakı davranışa görə müvafiq instansiyalara şikayət etmək niyyətindədir.

Media hüququ sahəsində ekspert Ələsgər Məmmədlinin fikrincə, polis işçisinin jurnalistə şillə vurması cinayət əməlidir.

Ə.Məmmədli hesab edir ki, DİN həmin əməkdaşı orqanlardan xaric etməli və ona qarşı cinayət işinə başlamalıdır.

Həmçinin bölmə rəisi vəzifəsindən azad edilməlidir.

Hələlik 15-ci polis bölməsi və DİN A.Əhmədovanın müracətinə reaksiya verməyiblər.

15-ci polis bölməsinin növbətçi hissəsindən Turan-a bildiriblər ki, dünənki hadisədən xəbərləri yoxdur. DİN mətbuat xidmətinin əməkdaşı Orxan Mansurzadə isə Turan-a bildirib ki, A.Əhmədova ilə baş verənlərlə bağlı bəyanatla çıxış edəcək, ancaq o, bəyanatın nə zaman veriləcəyini açıqlamayıb.0-