Jurnalistlərə problemlər yaradıla bilər

Bakı/29.04.17/Turan: Azərbaycanda görünməmiş məhkəmə prosesi başlayıb – Nəqliyyat, Rabitə və Yüksək Texnologiyalar Nazirliyi bir neçə müstəqil və müxalifət saytına qarşı.

Nazirlik Səbayel Rayon Məhkəməsinə müraciət edərək meydan.tv, azadliq.info, azadliq.org, azerbaycansaati.com  saytlarının Azərbaycan ərazisində yayımının bloklanmasını xahiş edib.

Qeyd edək ki, bir müddət öncə bu saytlara giriş bloklanıb və İnternet istifadəçiləri onlara lazım olan informasiyanı oxumaq üçün alternativ yollar axtarmağa, məsələn, proksi-serverlərdən istifadə etməyə məcbur olub.

Saytlara giriş nəqliyyat, rabitə və yüksək texnologiyalar naziri Ramin Quluzadənin məktubu əsasında bloklanıb. Məktubda deyilir ki, sözügedən saytlar “İnformasiya, informasiyalaşdırma və informasiya təhlükəsizliyi haqqında” qanunun tələblərini kobud şəkildə pozublar: “Konstitusiya quruluşunun dəyişdirilməsinə, ictimai sabitliyin pozulmasına, kütləvi iğtişaşların təşkilinə açıq çağırışlara, qanunsuz radikal dini qruplaşmaların təbliğinə və qanunla qadağan edilmiş digər məlumatların yayılmasına yönələn hərəkətlərə görə həmin resurslara giriş dərhal və müvəqqəti olaraq məhdudlaşdırılsın”. 

Belə olan halda, onsuz da bloklanmış saytları bloklamaq və məhkəmədə iddia qaldırmaq nəyə lazımdır? Saytların dövlət səviyyəsində bloklanması nələrə gətirib çıxara bilər?

“Əgər İnternet-saytlara giriş dövlət qurumlarının müraciəti əsasında bloklanırsa bu, müvəqqəti xarakter daşıyır və sonradan dövlət qurumları, indiki halda Nəqliyyat, Rabitə və Yüksək Texnologiyalar Nazirliyi hostinq və IP saytların qadağan edilməsi üçün məhkəməyə müraciət etməlidir”, - hüquqşünas Ələsgər Məmmədli Turan-a bildirib.

“Hazırda bu qadağa icra və praktiki xarakter daşıyır. Ancaq məhkəmənin qərarından sonra bu, hüquqi baxımdan möhkəmləndiriləcək və hüquqi məsuliyyətlı olacaq. Əlbəttə, qadağadan sonra bu İnternet-resurslara proksi-serverlər, VPN və s. vasitəsilə giriş mümkün olacaq. Ancaq düşünürəm ki, hakimiyyət həmin saytlarla əməkdaşlıq edən jurnalistlərə problemlər yaradacaq. Məsələn, informasiya verməkdən imtina edəcəklər. Onlar bunu indi də edirlər, ancaq saytlar öz fəaliyyətini davam etdirir. Ona görə də hakimiyyət bu yolu seçib. Azərbaycanda jurnalist fəaliyyəti üçün hüquqi məhdidiyyət yoxdur. Onlar qanun çərçivəsində istənilən məlumatı toplayıb hətta ölkə ərazisində bloklanmış saytlara da verə bilər. Qanun baxımından problem yoxdur. Ancaq hesab etmirəm ki, bloklanmış saytlarla əməkdaşlıq edən jurnalistlərə qanuni yollarla problemlər yaradılsın.  Bu, çox güman ki, praktikada olacaq. Məsələn, qanunsuz olaraq onlara informasiya verməyəcəklər. Əgər bu, baş verərsə qanunsuz xarakter daşıyacaq”,- Ə.Məmmədli bildirib.

“Saytların bloklanması üçün əsas götürülən amillər – şəxsi həyatın toxunulmazlığı, dövlət sirrinin açıqlanması, narkotik maddələrin təbliği və s. müxtəlif qanunlarda əksini tapıb və bunlara görə  cəza mexanizmi müəyyən edilib”,- jurnalist Seymur Kazımlı Turan-a bildirib.

“Qanun hamı üçün nəzərdə tutulub, təkcə jurnalistlər üçün yox. Bu ilin martında 2 qanuna əlavə və dəyişikliklərdə hədəf məhz xəbər saytları olub.  Deyək ki, hakimiyyət şəxsi həyata müdaxiləyə, narkotik maddələrin təbliğinə, dövlət sirrinin mediada açıqlanmasına qarşı mübarizə aparmaq istəyir. Bundan ötrü jurnalistlərin Peşə Etikası Məcəlləsi var. Sənəddə bu cür hərəkətlərin yolverilməz olduğu əksini tapıb.

Etika məsələsində ən böyük cəza jurnalistin işdən çıxarılması ola bilər, saytların bloklanması yox”,- S.Kazımlı vurğulayıb.–0--