ADNA terror aktının qurbanlarına ithaf

2009-cu ilin aprel ayının son günündə əksər aparıcı media resursları səhəri Azərbaycan gələn xəbərlə açır: ölkənin qabaqcıl ali məktəblərinin biri olan Dövlət Neft Akademiyasına silahlı basqın baş verib.

Müxtəlif mənbələrdən gələn təzadlı məlumatlardan sonra Respublika Baş Prokurorluğu və Daxili İşlər Nazirliyi Azərbaycan Dövlət Neft Akademiyasında baş vermiş basqın barədə rəsmi məlumat yayıb. Məlumatda deyilir ki, tədris korpusuna daxil olan naməlum şəxsin binanın birinci mərtəbəsindən altıncı mərtəbəsinədək qarşısına çıxan hər bir kəsə «Makarov» tipli tapançadan atəş açması nəticəsində 13 nəfər ölüb, 13 nəfər müxtəlif dərəcəli bədən xəsarətləri alıb. Cinayəti törətmiş şəxsin üstündən 1980-ci il təvəllüdlü Gürcüstan vətəndaşı Qədirov Fərda Əsəd oğluna məxsus şəxsiyyət vəsiqəsi, habelə hər biri 40 güllə tutumlu və içərisində 71 güllə olan xüsusi üsulla hazırlanmış 3 ədəd patrondaş, 2 tapança sandıqçası aşkar edilərək götürülüb. Faktla əlaqədar Cinayət Məcəlləsinin 120.2.2 (xuliqanlıq niyyəti ilə adam öldürmə), 120.2.4 (xüsusi amansızlıqla adam öldürmə), 120.2.7 (iki və ya daha çox şəxsi öldürmə), 29, 120.2.7 (adam öldürməyə cəhd) və 228.1 (qanunsuz olaraq odlu silah saxlama və gəzdirmə) maddələri ilə cinayət işi başlanıb. İstintaq-əməliyyat qrupu yaradılıb.

 “Şərq Qərb” Araşdırmalar Mərkəzinin rəhbəri Ərəstun Oruclu hesab edir ki, bu terror daxili qüvvələrin birbaşa iştirakı və xaricdən təşkilatçılıq dəstəyi ilə həyata keçirilib.

“Təhlükəsizlik Araşdırmaları” Mərkəzinin rəhbəri İlham İsmayıl isə qeyd edir ki, Sovet dönəmində terror aktları olduqca nadir hadisə idi. “Məsələn, Moskvada Zatikyanın metronun partladılması (1977-ci il yanvar ayının 8-də Moskv metrosunda baş verən partlayış nəzərdə tutulur. Terror aktı ilə bağlı SSRİ-də yayılan rəsmi məlumatlara görə, erməni terrorçular Akop Stepanyan, Zaven Baqdasaryan və Stepan Zatikyan tərəfindən Moskva metrosunun “İzmaylovskaya” və “Pervomayskaya” stansiyaları arasında, partlayış həyata keçirilmişdir. red.) aydın səmada ildırım çaxmasına bəznəyirdi. O zamanlar bu çox nadir hadisə idi. Ümumiyyətlə dünya aləmində belə terrorun miqyası bu səviyyədə deyildi. 1972-ci il Olimpiadasından sonra, belə demək olarsa, terrorçular tərəfindən təyyarə qaçırmaları dəbə düşdü. Ancaq bu cür təşkilatlanmaq, bu cür silahlanmaq ümumiyyətlə beynəlxalq siyasətdə rol oynamaq səviyyəsində deyildi”, - deyə o bildirir.

Akademiyada baş verən terror aktı zamanı yaralananlardan biri də Elşən Mustafayevdir. Elşən son bir neçə ildir ki, Şirvan şəhərində yaşayır. O, 13 nəfərin həyatına son qoyan, onun həyatını isə bir anda dəyişən hadisədən danışır. Elşənin sözlərinə görə, o, terrorçu ilə əlbəyaca olan üç nəfərdən biridir və terroru həyata keçirməkdə ittiham edilən Fərda Qədirovla üz-üzə gəlib.

“Səhər saat 9.30 radələrində qəribə səs eşitdik. Dəhlizə çıxdıq. Tələbələrdən biri gəlib bildirdi ki, aşağıda azərbaycanlılarla xaricilər dava edir. Biraz sonra məlum oldu ki, xaricilər silah gətiriblər. Yeddi-səkkiz səfər toparlanıb aşağı düşdük. Pilləkənləri düşəndə, qatil məni gördü. Uşaqlar foyeyə düşmədiyi üçün, pilləkənlərlə geri qaçdılar. Mən isə onunla üz-üzə qaldım...”.

Elşən danışır ki, Qədirov ona iki dəfə atəş açıb: bir güllə əlinə, biri isə çənəsinin altına dəyib. Xoşbəxtlikdən, Elşən sağ qalıb.

Ərəstun Oruclu deyir ki, vaxti ilə ANS telekanalında İradə İsaqın müəəlif verilişində də bu mövzunun müzakirəsində iştirak edib və veriliş zamanı bildirib ki, bu hadisənin üstü açılmayacaq. “Ona görə yox ki, onun təşkilatçıları Ermənistandandır. Məhz ona görə ki, təşkilatçılar Azərbaycandandır və yüksək dövlət vəzifələrindədir”. Ə.Oruclu əlavə edir ki, bu gün o şəxslər artıq vəzifələrdə olmamağına, hətta biabırçı şəkildə qovulmaqlarına baxmayaraq, bu terrorun açılmasında heç kəs maraqlı görünmür.

Bu hadisədə həlak olanlardan biri də Nəzəri Mexanika fakültəsinin laboratoriya müdiri Tamilla Əzizova olub. Tamilla xanımın həyat yoldaşı Çingiz Əzizov hadisə haqqında danışarkən qeyd edib ki, aprelin 30-u Bakıdan kənarda auditorlarla Sabirabadda idi. İşlərini bitirib, Salyana gediblər. Oranı da tərk edib Şirvana gələrkən, oğlundan həyat yoldaşının ölüm xəbərini alır.

“Çox fantastik, qeyri adi insan idi Tamilla xanım. Allah ona ev xanımı, həyat yoldaşı, ana kimi hər bir xüsusiyyət versə də, vaxt vermədi”, - deyə o bildirir.

Dövlət Neft Akademiyasında törədilən terror aktının baş vermə səbəbi bu günə qədər sual altındadır. Bir neçə versiya mövcuddur: xarici xüsusi orqanlarının Azərbaycana təzyiq etmək məqsədi ilə terror aktının həyata keçirməsi, xuliqanlıq məqsədi ilə adamöldürmə, daxili dartışmalar...

Hadisənin törədilməsində təqsirli bilinən Fərda Qədirovun bibisi Rəna Qədirova isə 2010-cu ildə məhkəmə istintaqı müddətində Bakıda olduğu zaman bildirib ki, axtarışa verilən erməni əsilli Gürcüstan vətəndaşı Mardun Qumaşyan heç yerə qaçmayıb, heç yaşadığı kəndi belə tərk etməyib: «Həmin erməni hazırda Şulaver stansiyası adlanan yerdə yaşayır. O, çörək bişirib satmaqla məşğuldur. Hadisə baş verəndən sonra yoldaşım, kəndçilərin bir çoxu onun yanına getdi. Qumaşyan kəndlilərə and-aman elədi ki, bu uşaqlardan heç birini tanımır. O, günahının olmadığını bildirib. Hətta o, kəndçilərə heç yerə qaçmayacağını da söyləyib. Deyir ki, qaçsa, hamı ondan şübhələnəcək».

2011-ci ildə isə Milli Məclisin deputatı İqbal Ağazadə belə bir fikirlə çıxış edir: "Necə olur ki, terrorda günahlandırılan kənddə kartof əkir?"

Hazırda Azərbaycan Dövlət Neft Akademiyası yeni - Azərbaycan Dövlət Neft və Sənaye Universiteti adı altında fəaliyyətini davam etdirir. ADNSU-nun  yeni rəhbərliyi cari ilin fevralında terror aktının qurbanlarının xatirəsinə memorial quraşdırıb.