Keçmiş prezident və onun həyat yoldaşı ömürlük diplomatik pasport alacaq

Mayın 31-də Milli Məclis Azərbaycanın keçmiş prezidenti və həyat yoldaşına əlavə imtiyazlar verilməsi ilə bağlı “İcra haqqında”, “Ölkədən getmək, ölkəyə gəlmək və pasportlar haqqında”, “Əmək pensiyaları haqqında”, “Milli arxiv fondu haqqında” qanuna, Cinayət-Prosessual Məcəlləsinə, İnzibati Xətalar Məcəlləsinə, “Sosial müavinətlər haqqında” qanuna əlavə və dəyişikliklər edib. 

“İcra haqqında” qanunun 68-ci maddəsinə edilən dəyişiklərə görə, keçmiş prezident və onun həyat yoldaşına ayrılmış pensiyaya, sosial müavinətə qarşı mülki tələb yönəldilə bilməz. Belə ki, məhkəmələr onların pensiyalarına, sosial müavinətlərə qarşı hər hansı borc tələbi, vurulan ziyanın ödənilməsi ilə bağlı tələb yönəldə bilməz.

“Ölkədən getmək, ölkəyə gəlmək və pasportlar haqqında” qanunun 6-cı maddəsinə edilən dəyişikliyə görə fəaliyyətdə olan prezident kimi keçmiş prezident və onun həyat yoldaşı da ömürlük diplomatik pasportla təmin olunacaq.

“Milli arxiv haqqında” qanuna edilən əlavəyə görə keçmiş prezidentin yazışmaları ilə bağlı sənədlər onun sərəncamında saxlanacaq.

“Əmək pensiyaları haqqında” qanuna da əlavələr edilib.

Azərbaycanın keçmiş prezidenti fəaliyyətdə olan prezidentin aylıq əmək haqqının yarısını, 7500 manat pensiya alır. -03D-