Keçmiş XTPDçilərin məhkəməsi noyabra qalıb

Bu gün Bakı Apellyasiya Məhkəməsində keçmiş XTPDçilərin işi üzrə ilkin baxış iclası keçirilib.

Vəkil Elçin Sadıqov Turan-a  bildirib ki, məhkəmə noyabrın 4-nə təyin edilib.

Onun sözlərinə görə, hazırda həbsdə olan keçmiş XTPDçilər Elçin Əmiraslanov, Səfa Poladov və Arif Kazımovun barəsində ömürlük həbs cəzasının 15-20 illik cəza ilə əvəz edilməsi haqda Qaradağ Rayon Məhkəməsi önündə vəsatət qaldırıb.

“Bundan əlavə, vəsatətdə 2000-ci ilə kimi qüvvədə olan Cinayət Məcəlləsinin 23-cü maddəsinə  tövsif verilməsi üçün Konstitusiya Məhkəməsinə müraciət olunmasını da vəsatətdə qaldrımışdım”, - vəkil qeyd edib.

E.Sadıqov deyib ki, Qaradağ Rayon Məhkəməsi bu işi icraata qəbul etmədi və indiki apellyasiya şikayəti Qaradağ Rayon Məhkəməsinin həmin qərarından qaynaqlanıb.  E.Sadıqov deyib ki, Azərbaycanda ölüm hökmü aradan qaldırılandan sonra bu şəxslərə ömürlük cəza təyin edilib və qərar əsassızdır.

E.Əmiraslanov,  S.Poladov, A.Kazımov 1995-ci ilin mart hadisələrində təqsirli biliniblər və 1996-cı ildə uzun müddətə azadlıqdan məhrum ediliblər. 1998-ci ildə ölüm hökmü ləğv edildikdən sonra bu şəxslərə ömürlük həbs cəzası tətbiq edilib. Hazırda ölkədə 17 məhbusun barəsində müddətli cəza ömürlük cəza ilə əvəzlənib. –0--