Lamiyə Quliyeva: Qisas alanlar, ədalətsiz ittiham verib hökm çıxaranlar günahkardır

Fevralın 20-də Bakı Apellyasiya Məhkəməsində hakim Qədim Babayevin sədrliyi ilə həbsdə olan Lamiyə Quliyevanın işi ilə bağlı Baş Prokurorluğun verdiyi protestə baxıb. Məhkəmə protesti təmin edib və Lamiyə Quliyeva məhkəmə zalından azadlığa buraxılıb.

Baş Prokurorluq fevralın 4-də Lamiyə Quliyeva barəsində Xətai Rayon Məhkəməsinin hökmündən apellyasiya şikayəti verilməsi ilə bağlı protest verib.

Lamiyə Quliyeva 2003-cü ildə həbs edilib. O və nişanlısı Vüqar Əliyev Şəmkir rayon İcra Hakimiyyətinin keçmiş başçısı Aslan Aslanovun oğlunu öldürməkdə ittiham edilib.

Ağır Cinayətlər Məhkəməsinin hökmü ilə Vüqar Əliyev ömürlük, Lamiyə Quliyeva 10 il azadlıqdan məhrum edilib. Sonradan L.Quliyevanın barəsində Cinayət Məcəlləsinin 317-ci (cəzaçəkmə müəssisəsinin və ya istintaq təcridxanasının normal fəaliyyətini pozma) maddəsi ilə cinayət işi başlanıb. Həmin cinayət işi ilə onun cəzası 5 il 6 ay artırılıb.

Lamiyə Quliyeva həbs edilərkəın 15 yaşında olub. O, həbsaxana həyatının 12-ci ilində ana olub. Həbsxanada uşağın dünyaya gəirilməsi geniş ictimai müzakirəyə səbəb olub. Bundan sonra ictimai diqqət Quliyeva ilə bağlı istintaq və məhkəmələrin ədalətsiz qərarları üzərində fokslaşıb. Hətta ölkənin siyasi xadimləri də məhkəmə ədalətini şübhə altına alıb.

Bu gün Lamiyə Quliyeva yenə məhkəmə zalına uşağı ilə birgə çoxsaylı mühafizə xidmətinin əhatəsində gətirilib. Məhkəmədə isə ana və balanın hıçqırtı ilə ağlaması hər kəsi sarsıdıb.

Zərərçəkmiş Aysel Ağayeva Lamiyə Quliyevanı bağışladığını bildirib. Belə ki, Aysel Ağayeva cəzaməkmə müəssisəində nəzarətçi işləyərkən Lamiyə Quliyeva ona çaynik atıb və məhkəmə Quliyevaya 5 il 6 ay həbs verib. “Mən də anayam. İstəmərəm ki, Lamiyə uşağını həbsxanada böyütsün”, deyə o qeyd edib.

Ağayevadan fərqli olaraq, onun nümayəndəsi Sücəddin Hacıbalayev prokurorun protestini düzgün hesab etmir. O, məhkəmə qərarını ədalətli hesab etdiyini bildirib. “Prokurorluq ürəyi yanan idisə, ədalətli idisə, niyə məhkəmələrdə ittihamları müdafiə edib”, nümayəndə prokurorluğun protesinin əsassız olduğunu belə izah edib.

Bu da məhkəmə praktikasında fərqli yanaşmadır, nümayəndə müdafiə etdiyi şəxsin tərəfindən çıxış etmir.  

Quliyevanın vəkili Fəxrəddin Mehdiyev nümayəndənin münasibətini ədalətli saymır. “Məhkəmələr ədalətli hökm çıxarmayıb. Hökmlər prosesual pozuntularla qəbul edilib və humanizm prinsiplərinə əsaslanmır. Hər-hansı cinayəti xarakterik edən onun ictimai təhlükəliliyidir. Burada xəta olub və onun da ictimai təhlükəliliyi yoxdur. Lamiyə ilə nəzarətçi arasına mübahisə olub və buna görə o, 10 gün karserə salınıb”, deyə vəkil qeyd edib.

Vəkil məhkəmədən bəraətverici əsaslarla cinayət işinə xitam verilməsini xahiş edib.

“Lamiyə qanunsuz, əsassız, qərəzli hökm nəticəsində cəzalandırılıb. Lamiyə azadlıda olmalıdır. Onun körpəsi dünyaya azadlıqdan baxmaq istəyir. Lamiyənin gözlərində illərin əzabı görünür. Onun azadlığını ədalət, azadlıqsevər ictimaiyyət, haqsevər insanlar gözləyir”, deyə Mehdiyev qeyd edib.

Vəkil Lamiyə Quliyevanın işində ədalətə söykənən hakimlərə, prokurorlara təşəkkür edib. “Onlar yaşadıqları zamanın ədalət dastanını yazıblar”.

Lamiyə Quliyevanın çıxışı isə zalda çoxlarını göz yaşlarına qərq edib. O, ilk öncə dövlətə, baş prokuror Zakir Qaralova, hüquq müdafiəçilərinə, jurnalistlərə, ədaləti müdafiə edən insanlara, o cümlədən hakim və müstətiqlərə təşəkkür edib.

O, 15 yaşından başlanan həbs həyatından danışıb. “Mən cinayəti törədəndə uşaq olmuşam. Buna baxmayaraq, öz hüququmu özüm qorumuşam. Bu, onun atana, anana, qohumuna deyəcəm, səni belə eləsin, sözlərinə cavab idi”.

Quliyeva həbsdə ağır həyat keçirdiyini deyib. Hər dəfə 400-500 məhbusla bir yerdə yaşayıb, fikrini çatdırmaq çətindir. “Həbs müddətində başqa məhbuslara qarşı olan münasibət mənə qarşı olmayıb. Həmişə gözləyiblər ki, addımımı bir qədər səhv atım”, deyə hərkətlərinin daim izləndiyini diqqətə çatdırıb.

O, ictimaiyyətdən xahiş edib ki, həbsxanada uşaq dünyaya gətirməsinə görə onu bağışlasın. “Cəzamı artıranda düşündüm ki, kimin üçün yaşayıram? Uşaqlığım, gəncliyim həbsdə keçdi. Bir anamdan başqa bütün qohumlarım mənə baş çəkməkdən imtina edib. Onların hansı təsir altında olduğunu başa düşürəm. Mənim haqqımda düşünən insanlara deyirəm ki, mənim taleyimi öz həyatlarında hiss edib münasibət bildirsinlər. Mənim yerimdə olan insan özünü asıb öldürərdi. Mən mübarizə apardım və uşaq dünyaya gətirməklə ictimai diqqəti cəlb etdim. Bu, yeganə çıxış yolu idi. Mən əxlaqsız qadın deyiləm”, deyə o, hönkürtü ilə ağlayıb. 

O, həbsdə olarkən barəsində cinayət işi qaldırılmasını belə təsvir edib: “Bunu eşidəndə rəhbərliyin yanına getdim ki, mən nə etmişəm ki, cinayət işi qaldırılıb? Orada məıni sürüyə-sürüyə cəza kamerasına apardılar. Mən cəza kamerasında “Allah” deyib fəryad edirdim”.

Quliyeva göz yaşları içərisində məhkəmə heyətindən onu həbsdən azad etməsini xahiş edib. “Uşaqlığıma, gəncliyimə bağışlayın, körpəmə bağışlayın, məni buraxın. Mən azadlıq istəyirəm. Yalvarıram, məni azad edin…” deyə o, ağlayır və ağlayırdı. Bu zaman körpəsi də anası ilə birgə ağlayırdı.

Quliyeva həbsində və ağır həbsxana həyatında günahı olanları da yaddan çıxarmayıb. “Məni həyat bu addımı atmağa məcbur etdi. Mən uşaq idim, amma bağışlanmadım. Mənim ədalətsizliyə, haqsızlığa tuş gəlməyimdə qisas alanlar, ədalətsiz ittiham verib hökm çıxaranlar günahkardır”, deyə o qeyd edib.

Beləliklə, Bakı Apellyasiya Məhkəməsi Lamiyə Quliyeva barəsində Xətai rayon Məhkəməsinin hökmünü 3 ilədək azaldaraq, onu məhkəmə zalından azad edib.

Lamiyə Quliyeva və anası Kifayət Quliyeva bəzi jurnalistləri və media qurumlarını baş verənlərlə bağlı düzgün məlumat yaymamaqda günahlandırıb. “Mən yalan məlumat yayan media orqanları və Aslan Aslanovdav şikayət etməyəcəyəm. Onları Allaha tapşırıram”, deyə o qeyd edib.  

Lamiyə Quliyeva keçmiş nişanlısı Vüqar Əliyevin işinə məhkəmənin ədalətli baxacağına inanır. “Allah onun da qapısını açsın”, deyə o qeyd edib.

Vəkil Adəm Məmnədov bildirib ki, Vüqar Əliyevin işi ilə bağlı da araşdıma başlanıb. “Vüqar Əliyev də tezliklə azadlığa qovuşacaq”, deyə vəkil bildirib.

Bununla yanaşı, o, Aslan Aslanovun ondan Vəkillər Kollegiyasına şikayət verdiyini bildirib. “Amma şikayəti Aslan Aslanov yox, onun hüquq-mühafizə orqanlarında çalışan oğlu təqdim edib”, deyə Məmmədov qeyd edib. -03C-