Media-icmal 01.02.19

Son 15 ilin inkişaf uğurlarının modeli, Cümhuriyyət qurucularına münasibətə baxış, manatın məzənnəsinə mümkün təsirlər və s. məsələlər bugünki (1 fevral 2019-cu il) medianın aparıcı mövzularındandır...

Son 15 ilin uğurlu inkişaf modeli

"Azərbaycan" qəzeti "İlham Əliyevin uğurlu regional inkişaf modeli" sərlövhəli məqalədə son 15 ildə ölkədəki quruculuq və abadlıq işlərini dəyərləndirir.

Müəllifə görə, son 15 ildə əldə edilən uğurların əsasında strateji hədəflərin, prioritetlərin düzgün müəyyənləşdirilməsi və bu hədəflərin məqsədyönlü şəkildə reallaşdırılması durur.

Ölkə regionlarında inkişaf, problem və sosial məsələlərin həlli naminə dövlət proqramlarının icrasından danışan müəllif deyir ki, 3 dövlət proqramı (2004-2018ci illər-red) qarşıya qoyulan hədəflərə uğurla çatdı.

Yazı müəllifi deyir ki, bu proqramların icrasına başlanılan 2004-cü ildə Azərbaycanın valyuta ehtiyatları cəmi 1,8 milyard dollar olub, hazırda isə ölkənin valyuta ehtiyatları 45 milyard dollara bərabərdir.

Müəllifin sözlərinə görə, icrası başa çatan dövlət proqramı çərçivəsində 2014-2018-ci illərdə regionların inkişafına ümumilikdə 24,2 milyard manat vəsait yönəldilib.

Yazı müəllifi yanvarın 29-da regionların 2014-2018-ci illərdə sosial-iqtisadi inkişafı Dövlət Proqramının icrasının yekunlarına aid konfransda Prezident İlham Əliyevin də bir daha bu uğurları dəyərləndirdiyini bildirir: "Prezident İlham Əliyevin yeni inkişaf konsepsiyasına uyğun olaraq həyata keçirilən siyasət ölkədə bazar iqtisadiyyatı prinsiplərini sosial ədalət prinsipləri ilə birləşdirdi. Dövlət başçısının söylədiyi kimi, Azərbaycanın uğurlu inkişafı məhz buna söykənir".

Müəllifə görə, reallıqlar Azərbaycanın bu gün ən qüdrətli dövrünü yaşadığını söyləməyə əsas verir.

Yazıda deyilir ki, həmin konfransda dövlət başçısı təkcə uğurları yox, həm də qarşıdakı hədəfləri də diqqətə çatdırıb, xarici investorlarda bu sahəyə böyük maraq olduğu üçün bərpa olunan enerji sahəsində görüləcək işləri xüsusi vurğulayıb.

Müəllif deyir ki, konfransda növbəti dördüncü proqram qəbul edilib və bu proqramda kənd təsərrüfatı və sənaye istehsalı xüsusi yer tutur, infrastruktur layihələrinin böyük hissəsi başa çatdığı üçün iqtisadiyyatın real sektoru, kənd təsərrüfatı, sənaye potensialının gücləndirilməsi və s. əsas məsələlərdən biri sayılır.

Müəllif vurğulayır ki, IV dövlət proqramına 17 milyard manatdan çox vəsait yönəldiləcəyi nəzərdə tutulur.

Onun qaldırdığı bayraq altında, amma...

"Moderator.az"da isə "Müdirlərimiz oğru, məmurlarımız rüşvətxor, ziyalılarımız isə bir-biri ilə didişməkdədir" sərlövhəli məqalə oxumaq olar.

Müəllif Məmməd Əmin Rəsulzadəyə və eləcə də 1918-20-ci illərdə mövcud olmuş Azərbaycan Xalq Cümhuriyyəti qurucularına münasibətlə bağlı tanınmış ictimai xadim, Tibb Universitetinin dosenti Rəşid Mahmudovla söhbətləşir.

Müəllif bu mövzuya əsas kimi xatırladır ki, bu gün (yanvarın 31-i nəzərdə tutulur - red.) Azərbaycan Xalq Cümhuriyyətinin banisi Məmməd Əmin Rəsulzadənin doğum günüdür, o, 1884-ci il yanvarın 31-də Novxanı kəndində anadan olub.

Rəşid Mahmudov "moderator.az"a açıqlamasında son zamanlar M.Ə.Rəsulzadəyə münasibətdə baş verən hadisələrlə bağlı narahatlıq keçirdiyini bildirib: "Allah rəhmət eləsin, ən çətin zamanda, 1918-ci ildə M.Ə.Rəsulzadə dövlət qurdu. Onda Azərbaycanın 114,6 min kvadrat kilometr sahəsi olub. Ruslar hücum edərkən qubalılar 350 nəfər adamla onların qarşısına çıxıb döyüşüblər və hamısı da şəhid olub. M.Ə.Rəsulzadə, Əlimərdan bəy Topçubaşov, Nəsib bəy Yusifbəyli müstəqilliyimizə görə can qoyub. Nəsib bəy Yusifbəyli Gəncədə Azərbaycan Demokratik Cümhuriyyətini elan edib".

R.Mahmudov təəssüflə hazırda M.Ə.Rəsulzadəyə dəyərincə qiymət verilmədiyindən narahatlığını da ifadə edib və M.Ə.Rəsulzadə kimi türk xalqını sevən, dövlət yaradan insanıın layiqincə qiymətləndirilmədiyini vurğulayıb: "Onun bayrağını, himnini daşıyırıq, amma adı heç bir dəftərdə yoxdur. Onun evindən barelyefini oğurlayanlar da normal adam deyil", münasibətini ortaya qoyur.

R.Mahmudov dəyərlərə münasibət baxımından bu günümüzlə o qədər də uzaq sayılmayan tarixi keçmiş arasında bir paralel apaırır və görkəmli türkçü ideoloqlardan biri Əhməd bəy Ağaoğlu ilə bağlı maraqlı tarixi bir hadisəni nəql edir: "Əhməd bəy Ağaoğlu 1907-ci ildə Həsən bəy Zərdabinin dəfn mərasiminə gəlib və pambıq bəylərinə deyib ki, "Köməklik edin, uşaqlarımızın gələcəyi üçün məktəb açaq". Amma bunların heç birisi köməklik etməyib. Eşşəklə turş su satan erməni isə pul verib deyib ki, "mənim uşağıma və qonşum kasıb azərbaycanlı ailəsinin uşağına məktəb açın. Əhməd bəy Ağaoğlu Həsən bəy Zərdabinin cənazəsi önündə deyib ki, "Ey müqəddəs ruh! Müdirlərimiz oğru, məmurlarımız rüşvətxor, ziyalılarımız isə bir-biri ilə didişməkdədir".

Əhməd bəy Ağaoğlunun bu deyimindən irəli gələrək, R.Mahmudov haqqında bəhs olunan münasibətin bu gün də cəmiyyəti xarakterizə etdiyini söyləyib.

Kimdir əsassız danışan?

"Novoye Vremya" qəzetində isə "Həddən artıq özünə vurğunluq çox vaxt adamı güdaza verir" sərlövhəli məqalə diqqət cəlb edir.

Müəllif dünya bazarında neftin sabit olmayan qiyməti, bunun neft hasilatçısı olan ölkə kimi Azərbaycana mümkün təsirlərini müzakirə müstəvisinə gətirir.

Müəllif xatırladır ki, 4 il bundan öncə dünya bazarında neftin qiymətinin kəskin enməsilə Azərbaycan iki devalvasiya yaşadı və bundan sonra ölkə əhalisində "neftin qiyməti"nə həssaslıq yaranıb.

Müəllif iddia edir ki, dünya neft bazaında qiymətlər indi də çalxalanır, onun enəcəyi deyilir, bununla bağlı deyilənləri isə Azərbaycan Mərkəzi Bank rəhbərliyi əsası olmayan şaiyə adlandırır: "Boş-boş, əsassız danışırlar, bu gün manata münasibətdə dolların bahalaşması üçün heç bir əsas yoxdur, ölkədə makro-iqtisadi sabitlik var", deyə MB rəhbəri Elman Rüstəmovdan sitat gətirir.

Müəllif deyir ki, manatın məzənnəsinin sabit qalması faktdır, inkarolunmazdır, amma bu məzənnənin belə saxlanmasının özünün ölkəyə neçəyə başa gəlməsi kimi problem yaşanır.

Müəllifin sözlərinə görə, dünya reytinq agentlikləri də daxil olmaqla, beynəlxalq maliyyə institutları manatın məzənnəsinin sabit saxlanması üçün tənzimləyicinin vallyuta müdaxiləsi barədə ehtimallarını bidiriblər və buna əsas kimi indki neft qiymətlərinin əlverişli olmasını göstəriblər.

Bundan irəli gələrək, müəllif manatın məzənnəsinin perspektivilə bağlı əhalidə narahatlıq yaranmasını əsaslı sayır və MB rəhbərinin hətta dünya bazarında neftin qiymətinin enməsinin dolların məzənnəsinə təsir etməyəcəyi iddiasını təəccüblə qarşılayır.

Müəllif hesab edir ki, bu MB rəhbərliyinin özünə vurğunluğu və arxayınlığıdır və bu keyfiyyət özünü 2015-ci ildə Azərbaycanda iki dəfə baş vermiş devalvasiya ərəfəsində də göstərmişdi və heç birində də doğrultmamışdı.

Yazı müəllifi xatırladır ki, o zaman da manata hər hansı təhlükə olmadığı barədə danışırdılar, amma əvəzində xalq iki devalvasiya "qazandı".

Məqalə müəllifi yaxın keçmişdə baş vermiş iki devalvasiyadan irəli gələrək, manatın sabtilyi ilə bağlı MB-nin nikbinlik nümayiş etdirməsinə inamsız yanaşır və verilən vədləri ciddi qəbul etmir.

Son olaraq isə müəllif vurğulayır ki, manatın iki devalvasiyasından məhz xalq əziyyət çəkdi, xalq əziyyət çəkdiyi zaman isə məmurlar öz "cibləri"ni pulla doldururdular, odur ki, xalq da boş-boş danışan məmurlara inanmır.