Media-icmal 01.08.2016

İdman hərəkatı lideri  

“Azərbaycan” qəzeti dövlət başçısı İlham Əliyevin fotosu fonunda “Olimpiya hərəkatının lideri” (http://www.azerbaijan-news.az/index.php?mod=3&id=102077)

Sərlövhəli məqalədə ölkədə olimpiya hərəkatının inkişafından və bu inkişafda dövlət başçısı İ.Əliyevin rolundan bəhs edir.

Müəllif 19 il bundan öncə İlham Əliyevin Milli Olimpiya Komitəsinin (MOK) prezidenti seçilməsini xatırladır və bununla da ölkədə idmana qayğının yeni mərhələsinin əsasının qoyulduğunu bildirir. Müəllif İ.Əliyevin MOK prezidenti seçilməsini və nəticələrini belə dəyərləndirir: “Beləliklə, cənab İlham Əliyevin MOK-un prezidenti seçilməsindən sonra ölkədə bədən tərbiyəsi və idman geniş vüsət aldı, respublikamız beynəlxalq Olimpiya Hərəkatına qoşuldu, bu sahədə sistemli şəkildə işlər görüldü”.

Məqalədə ölkədə idmanın maddi- texniki bazasının möhkəmləndirilməsinə toxunulur və 2000-ci ildən bu yana 40-dan çox olimpiya idamn kompleksinin tikilidyi vurğulanır.

Müəllif  bu maddi-texniki bazanın yaradılmasını idman qələbələri üçün əsas sayaraq 2000-ci il Afina olimpiadasından başlayaraq 2012-ci il Londonda keçirilən olimpiada oyunlarında iştirak da daxil olmaqla qazanılan uğurlar barədə danışır. Hazırda Azərbaycanın 202 ölkə arasında olimpiya nəticələrinə görə 30-cu yerdə qərar tutduğunu bildirir.  Müəllif həm də bu günlərdə Braziliyada başlanacaq XXXI Yay Olimpiya Oyunlarında idmançıların yeni uğurlara imza atacağına ümid etdiyi vurğulanır.

Daha sonra müəllif 2015-ci ilin iyununda Bakıda keçirilmiş İ Avropa Oyunlarına, bu oyunların təşkili səviyyəsinə toxunur. Müəllif bu oyunların təşkililə bağlı Azərbaycanın uğurunu belə dəyərləndirir: “Avropanı bir araya gətirən idman və dostluq bayramından sonra Azərbaycanın idman ölkəsi kimi nüfuzu qitənin sərhədlərini aşdı və dünyada daha da artdı”.

Çörəyin bahalaşması və səbəblər

“Azadlıq” qəzeti “Çörək bahalaşdı” (http://www.azadliq.info/149248.html) məqaləsində ekspertlərlə  bu məhsulun satış qiymətinin qaldırılmasının nə dərəcədə əsaslı olduğunu araşdırır.

Məqalədə deyilir ki, satıcılar təchizatçıların iyulun 31-dən etibarən satış nöqtələrinə çörəyi yeni qiymətlərlə gətirdiyini bildirirlər: “Daha çox istehlak olunan və “zavod çörəyi” kimi tanınan məhsul bu gündən etibarən bizə 46 qəpiyə gətirilir. Təbii ki, biz də qiymət artımına getməyə məcbur olduq. Bundan öncə 40 qəpiyə satılan çörək hazırda 50 qəpiyə satılır. Çəkisindən asılı olmayaraq, çörəyin qiyməti 10 qəpik artıb”.

Kənd təsərrüfatı üzrə ekspert Vahid Məhərrəmov deyir ki,  çörəyin qiymətinin qalxması taxılın və ya buğdanın qiymətinin artmasıyla bağlı deyil. Ekspert dünya bazarında buğdanın  qiymətində 30 faizdən çox azalmanın müşahidə olunduğunu deyərək bu artımın başqa bir əsaslara görə baş verməsi qənaətindədir: “Suyun, elektrik enerjisinin qiyməti artıb, manatın məlum devalvasiyası baş verib”. Ekspertə görə, çörək istehsalçıları bir müddət çəkini azaltmaqla, keyfiyyəti aşağı salmaqla, nəmliyi artırmaqla bu məsələləri birtəhər kompensasiya edirdilər. Onun fikrincə, bundan sonra isə bu vasitələrə əl atmaq mümkün olmadığından məcburiyyət qarşısında qalıb çörəyin qiymətini artırırlar. V.Məhərrəmovun düşüncəsinə görə, rəsmi Bakı alternativ tədbirlər görməlidir, əhalinin sosial çörək istehsalına başlamalı və kasıb təbəqə üçün ucuz qiymət tətbiq etməlidirlər.

Ekspert deyir ki, əslində, iri çörək istehsalçıları olan oliqarxlar böyük zavodlar tikdirərək fərqli formada məhsul istehsal edib qiyməti çoxdan artırıblar. Qiyməti 30-40 qəpik olan çörək istehsalçıları bununla problemləri həll edə bilmədikləri üçün qiyməti qaldırırlar. Ekspert deyir ki, onlar avadanlıqları dəyişə bilmirlər, eyni zamanda, maliyyə problemləriylə üz-üzədirlər. Onun fikrincə, bu səbəblərdən irəli gələrək onlar qiymət artımına gedirlər. 

Avropaya inteqrasiya və “şahsevənlik”

“Yeni Müsavat qəzeti” “Yenə də yaş senzi” sərlövhəli məqalədə  (http://musavat.com/news/yazarlar/yene-de-yash-senzi_366740.html) dövlət başçısının müsbət rəy aldığı Referendum Aktındakı yaş senzi müzakirə obyektidir.   

Müəllif XX sərin 90-cı illərində yaşı 65-dən yuxarı olan şəxslərin prezidentliyə gələ bilmələrinin qarşısını almaq üçün yuxarı yaş senzinin tətbiq olunduğunu xatırladır.

Bundan sonra müəllif  indiki Referendum Aktında da yaş senzinin yenə müzakirə sırasında olduğunu bildirir: “İndi isə prezidentlik yaşının aşağı həddini yenidən müəyyənləşdirmək, bir də prezidentin səlahiyyət müddətinin 7 il edilməsi təşəbbüsü var”. 

Müəllif daa çox ayrı-ayrı rəsmi şəxslərin yaş senzinin aşağı salınmasını tarixi hadisələrlə, orta əsrlərlə izah etmək cəhdlərini doğru saymır: “ Birincisi, orta əsr xanədanlıqları ilə müasir dövrdə seçki yoluyla formalaşdırılmalı olan idarəetmə sistemlərini müqayisə etmək çox qüsurludur. Çünki qədim dövrlərdə hökmdar olmaq üçün heç 14 yaşa çatmağa da ehtiyac yox idi, xanədanlığın 1-2 yaşlı varislərinin də taxta çıxarıldığı hallar olub. Buna isə hakimiyyətə gəlmək deyilməz”.

Daha sonra müəllif  aktda nəzərdə tutulan prezidentlik müddətinin 7 il olması ətrafındakı müzakirələrə və bu müddəanı müdafiə edənlərin bir çox ölkələrdə belə təcrübənin olması haqda düşüncələrinə münasibət ifadə edir: “ O “bir çox ölkələr” hansılardır, hansı inkişaf etmiş, demokratiya örnəyi olan ölkələrdir, konkret bir şey yoxdur. Dünyanın ən demokratik ölkələrində artıq prezidentlik institutunun özü simvolik hala gəlib, heç onun səlahiyyət müddətinin nə qədər olması da mübahisə predmeti olmaqdan çıxıb”. 

Müəllif bu ideyaları müdafiə edənləri “şahsevənlər” adlandırır və belə düşüncə ilə Avropaya inteqrasiyanın mümkünsüzlüyünü vurğulayır.

Son olaraq müəllif bütünlükdə aktı belə dəyərləndirir: “Konstitusiya üzərində vaxtaşırı düzəlişlər aparmaqla, bu toxunulmaz qanunları hər dəfə arzuya, günün konyukturasına uyğunlaşdırmaqla xəyallarda olan, haqq-ədalətin bərqərar olduğu, dünya miqyasında adından yaxşı mənada söz etdirən dövləti qura bilməyəcəyik”.

Xatırladaq ki, bu il iyulun 18-də dövlət başçısı İlam Əliyev Konstitusiyaya dəyişiklikləri nəzərdə tutan Referendum Aktını rəy verilmək üçün Konstitusiya Məhkəməsinə ğöndərib, iyulun 25-də Konstitusiya Məhkəməsinin Plenumu sənədə müsbət rəy verib. İyulun 26-da isə dövlət başçısı İ.Əliyev sentyabrın 26-da referendumun keçirilməsilə bağlı fərman imzalayıb.