Media-icmal 01.12.20

İkinci Qarabağ Müharibəsinin nəticələri haqqında düşüncələr, azad edilmiş torpaqlarda görüləcək fəaliyyətlər, İkinci Qarabağ Müharibəsində iştirak etmiş əsgər və zabitlərə bankların güzəştlər nəzərdə tutması və s. məsələlər medianın aparıcı mövzuları sırasındadır...

"Azərbaycan" qəzeti  "İlham Əliyevin şərtləri ilə başa çatan savaş" sərlövhəli məqalədə 44 gün çəkmiş İkinci Qarabağ Müharibəsinin nəticələrini dəyərləndirir.

Məqalədə vurğulanır ki, Azərbaycanın parlaq qələbəsilə başa çatan İkinci Qarabağ müharibəsi bütövlükdə dünyanın ən mühüm hadisələrindən biridir, bu savaşda Azərbaycan xalqı ərazi bütövlüyünü təmin etdi, Ermənistanın işğal siyasətinə son qoydu.

Müəllif yada salır ki, Azərbaycan Ermənistanla 28 il nəticəsiz bitən danışıqlar apardı, böyük dövlətlər beynəlxalq hüququn dövlətlərin ərazi bütövlüyünün toxunulmazlığı prinsiplərinə göz yumdular, öz siyasi və iqtisadi maraqlarını güddülər. 

"Lakin Prezident İlham Əliyev bütün dünyaya sübut etdi ki, bu ədalətsizliyi təkbaşına, Qərbin köməyindən istifadə etmədən də yoluna qoymaq mümkündür. Eyni zamanda, bu qələbə ilə sübut edildi ki, Qərbin ədalətinə güvənmək olmaz", deyə müəllif aparıcı dövlətlərin mövqeyinə münasibət ifadə edir.

Məqalədə deyilir ki, Azərbaycanın bu uğurunda həm hərbi güc, həm də Prezident İlham Əliyevin uzaqgörən siyasi-diplomatik gedişləri əsas rol oynayıb, elə buna görə də son 17 ildə dövlət rəhbərliyi ordu quruculuğuna daha çox diqqət yetirib, ordu müasir silah növlərilə təmin edilib.

Müəllif əlavə edir ki, 44 gün davam edən İkinci Qarabağ Müharibəsi Prezident İlham Əliyevin diktə və şərtləri əsasında başa çatdı, Azərbaycan ərazi bütövlüyünü bərpa etdi.

"Müsavat.com" saytında isə "Azad olan torpaqlarda nə etməliyik? - mühüm təkliflər" sərlövhəli məqalədə işğaldan azad olunmuş torpaqlarda görüləcək işlərin müəyyən edilməsindən bəhs olunur.

Torpaqlar işğaldan azad edildikdən sonra bu torpaqların iqtisadi potensialı əsas müzakirə obyektinə çevrilib, çoxsaylı təhlillər verilir. 

İqtisadçı Rövşən Ağayev bildirir ki, azad olunmuş bölgələrdə təbii ehtiyatlar var, lakin həmin ehtiyatların iqtisadiyyatımız üçün yüksək həcmdə əlavə dəyər yaradacağı ilə bağlı gözləntilər real hesablamalara əsaslanmır.

Ekspertlərə görə, Azərbaycanda təbii ehtiyatlara əsaslanan mədən sənayesinin yaratdığı əlavə dəyərin 95%-ni neft-qaz sektoru təmin edir: "Qiymətli və digər növ metalların yaratdığı əlavə dəyərin illik həcmi heç 100 milyon manatı da keçmir. Bu da mövcud Ümumi Daxili Məhsulun 0.12 faizi qədər. Kəlbəcər və Zəngilan qiymətli metal istismarı baxımından Gədəbəy və Daşkəsənin mədən sənayesindən daha böyük potensiala malik olsa belə, bu, yeni iqtisadi dövriyyəyə qoşulmuş ərazilərimizin sahəsi və əhalisi baxımından yenə də böyük məbləğ deyil".

Ekspertlər hesab edirlər ki, əgər doğru təşkil edilərsə, azad olunmuş bölgələrin ən böyük potensialı turizmlə bağlı olacaq, söhbət ən azı 1.5 milyard dollardan gedir.

İqtisadçıların hesablamalarına görə, ikinci böyük potensialı olan sahə aqrar sektordur, 7 rayonun kənd təsərrüfatına yararlı torpaqlarının ümümi həcmi 535 min hektar təşkil edir ki, bu da bitkiçilik və heyvandarlıq üçün əlverişlidir.

"Bizimyolinfo.az" saytında isə Alxan Xələfov: Ödənişlər 6 ay müddətinə dondurulsun" sərlövhəli məqalədə İkinci Qarabağ Müharibəsində iştirakı olan əsgər və zabitlərin kredit borcları ilə bağlı məsələ müzakirəyə çıxarılır.

Marketinq və Strateji Planlama üzrə mütəxəssislər hazırda hərbi xidmətdə olan və vətən muharibəsi iştirakçısı olan əsgər və zabitlərin ödənişlərinin ən az 6 aylıq bir müddətə dondurulmasını təklif edirlər.

Azərbaycan banklarına əsgər və zabitlərin kredit borcları ilə bağlı deyilib ki, əsgərlərin valideyinləri, uşaqları və ailələri var: "İndiki durumda onların ailələrinin hər hansı maliyyə problemlərinin olması əsgərlərimizin gözlərinin arxada olması deməkdir. Bankların bu məsələni dərindən incələyərək, bununla bağlı 6 aylıq ödənişlərin dondurulması və gecikmələrə görə hesablanmış faizlərin silinməsi ilə bağlı qərar qəbul etməsi çox yaxşı addım olardı".

Statistik analiz göstərir ki, 20 min əsgər və zabitin kredit ödənişi ola biləcəyi ortaya çıxır ki, bu da banklar üçün heç də böyük bir maliyyə problemi deyil.

Mütəxəssislər deyirlər ki, bankların kredit muqavilələrində 6-cı bənd var ki, fors-major halları nəzərdə tutur, 45 günlük müharibə dövrü də bu bəndə daxildir, bu qərarın yerinə yetirilməsi həm də bankların xalqın rəğbətini qazanmasına səbəb ola bilər.