Media-icmal 02.07.20

Koronavirusa yoluxmuş əlamətsiz xəstələrin ev müalicəsi, su qıtlığı yaranmasının səbəbləri, işsiz sayının səviyyəsi və s. məsələlər medianın aparıcı mövzuları olmaqda davam edir...

Pandemiyanın ev müalicəsi

"Azərbaycan" qəzeti "Bəzi xəstələr evdə müalicə olunacaq" sərlövhəli məqalədə koronavirus infeksiyasına yoluxmuş, amma əlamətsiz olan xəstələrin ev şəraitində müalicəsini dəyərləndirir. 

Müəllifə görə, bu vəziyyətin yaranmasına virusa yoluxmanın qarşısını almaq üçün maska taxılmaması, sosial məsafənin gözlənilməməsi, gigiyena qaydalarına əməl edilməməsi səbəb olub. Bunun nəticəsində virusa yoluxma artıb, xəstəxanalarda sıxlıq olmasın deyə yngül xəstələrin evdə müalicəsi ön plana çıxıb. 

Müəllif əlavə edir ki, Səhiyyə Nazirliyi belə xəstələrin aşkarlanması üçün müvafiq ilkin səhiyyə müəssisələrini artıq müəyyən edib. Onların müayinə və müalicəsinə dair xüsusi metodik tövsiyələr hazırlanıb, poliklinikalara əlavə təlimatlar təqdim olunub.

Təlimata görə, simptomsuz pasiyentlərin evdə müşahidəsi üçün yaşadıqları ünvana uyğun olaraq, müvafiq poliklinikarla əlaqə saxlayacaqlar, PZR testinin aparılması üçün tibbi briqadalar evlərə səfər edərək testlər üçün nümunələr götürəcəklər: "Ümumiyyətlə, Bakı şəhəri üzrə bütün poliklinikalara verilmiş tövsiyə və təlimatlara əsasən, simptomsuz pasiyentlərin evdə müşahidəsi, yüngül gedişatlı xəstələrin müalicəsi təmin ediləcək".

Müəllif hesab edir ki, bütün bu tövsiyələrin yerinə yetirilməsi nəticəsində ilkin səhiyyə xidməti olan poliklinikalar COVID-19 xəstələrinə daha yaxşı tibbi yardım göstərə biləcək. Hazırda Bakı və Bakıətrafında qeydiyyatda olan 2 minə yaxın şəxs poliklinika nəzarətindədir.

Su qıtlığı - səbəblər nədir?

"Oxu.az" saytı "Azərsu" sədri su qıtlığı barədə: "Bir sıra mənbələr tikililərin altında qalıb" sərlövhəli məqalədə ölkədə su ehtiyatlarının vəziyyətini qiymətləndirir.

Bu məsələnin aktuallaşmasına səbəb son vaxtlar Kür çayında suyun azalması, Neftçala rayonunda yaranmış vəziyyət və ölkənin su ehtiyatlarının perspektivini müəyyən etməkdir.

İyulun 1-də Milli Məclisin Təbii ehtiyatlar, energetika və ekologiya komitəsinin iclasında "Azərsu" ASC sədri Qorxmaz Hüseynov ölkədə su təminatının mövcud vəziyyəti barədə danışıb.

Onun sözlərinə görə, Qafqazda cəmi 310 milyard kubmetr su ehtiyatı var, bunun da Azərbaycan üzrə adambaşına düşən payı qonşu ölkələrlə müqayisədə ən aşağı səviyyədədir.

Sədr deyib ki, Azərbaycanın əsas su mənbələri olan Araz və Kür çaylarının qonşu dövlətlər tərəfindən çirkləndirilməsi də vəziyyəti ağırlaşdırır.

ASC sədri bu vəziyyətin yaranmasına səbəb kimi iqlim dəyişikliklərini, quraqlığı, son illərdə yağıntıların azalmasını göstərir: "Azərbaycanın qiymətləndirilən su ehtiyatı 30,9 milyard kubmetrdir. Bunun 33 faizi yerli daxili, 66 faizi transsərhəd çayların hesabına formalaşan sulardır: Bu, o deməkdir ki, bizim şirin sulara əlçatanlığımız daha böyük investisiya tələb edir".

"Azərsu" sədri əlavə edib ki, bu məsələdə son onilliklərdə bir sıra su mənbələrinin tikililərin altında qalması, son 30 ildə bunun 2,6 dəfə artması,  Bakıda əhali artımı, turizmin inkişafı, israfçılıq kimi səbəblər də var.

Gizli işsizlik necə üzə çıxdı... 

"Azadlıqinfo"da yer alan "Pandemiya dövrü gizli işsizliyi necə üzə çıxardı?" sərlövhəli məqalədə isə elə verilən sual cavablandırılır.

İqtisadçı Məhəmməd Talıblı deyir ki, koronavirus pandemiyası ilə bağlı karantin rejimi, bu çərçivədə sosial izolyasiya tətbiq edildi, işsiz əhaliyə maliyyə yardımı aktuallaşdı.

Müəllif əlavə edir ki, hökumət ölkədə qeydə alınan 200 min işsizə iki ay ərzində (2020-ci ilin aprel-may ayları, hər işsizə 190 manat nəzərdə tuturdu - red.) bu yardmı nəzərdə tuturdu, bu da 70 milyon manat vəsait demək idi.

Amma görünən bu oldu ki, ölkədə real işsizlər daha çoxdur: "Sonradan bu rəqəm artırılaraq 600 min nəfəri əhatə etdi. Bu da son olmadı. Məlum oldu ki, Əmək və Əhalinin Sosial Müdafiəsi Nazirliyinə işsiz statusunda olan 1 mln. 250 min nəfər müraciət edib. Bu faktın özü sübut edir ki, ölkədə azı bu qədər işsiz var. Deməli, əvvəllər 30-50 min arasında dəyişən rəsmi işsizliklə bağlı məlumatlar yalan imiş".

Müəllif deyir ki, rəsmi rəqəmlərə görə, 2018-ci il üzrə məşğulluq xidməti orqanlarında rəsmi işsiz statusu verilmiş şəxslərin sayı 20 min 88 nəfər, işsizliyə görə müavinət alanların sayı 1117 nəfər olub.

Müəllifə görə, "Covid-19"la bağlı ƏƏSMN-ə edilən rəsmi müraciətlər göstərdi ki, ölkədə işsiz sayı rəsmi rəqəmlərdən dəfələrlə çoxdur.

Müəllifə görə, isə böhran təkcə itki deyil, həm də fürsətdir, pandemiya da təkcə ölkə iqtisadiyyatına ciddi zərbələr vurmadı, eyni zamanda gizli işsizliyi qaranlıqdan aydınlığa çıxardı.