Media-icmal 03.02.21

Sühməramlıların davranışlarından artan narazılıq, prezidentin konkret məmur adları çəkməsinin səbəbləri,  koronavirus infeksiyasının yeni mutasiyasının Azərbaycana gələ bilməsi ehtimalı, qiymət artımına gedilməsinə baxış, atəşkəsin pozulması ehtimalları və s. məsələlər medianın aparıcı mövzuları sırasındadır....

"Müsavat.com" saytında "Rus sülhməramlılarının davranışlarından narazılıq artır - ekspertlərdən açıqlamalar" sərlövhəli məqalədə Qarabağdakı Rusiya sülhməramlılarına münasibətdən bəhs edilir.

Müəllif vurğulayır ki, Rusiya sülhməramlılarının Qarabağda mandatlarından kənar bəzi davranışları Azərbaycan ictimaiyyətində qıcıq və narahatlıq doğurur.

Müəllif buna misal olaraq ötən həftəsonu rus hərbiçilərin Azərbaycanın yük maşınlarını Suqovuşandan Kəlbəcərə buraxmamasını göstərir. "Rus sülhməramlılar Ağdərədən Kəlbəcərə getmək üçün Azərbaycan maşınlarına rus nömrəsi taxılması və Azərbaycanın dövlət bayrağının maşınların üzərindən yığışdırılması şərtini irəli sürüblər", deyə müəllif  sülhməramlıların davranışlarını yada salır.

Azərbaycanın ictimai-siyasi cameəsinin təmsilçiləri belə davranışa münasibət ifadə ediblər. Onlar Rusiya sülhməramlılarının təkbaşına qərar verməsini, ermənilərin əəsassız iddialarını dərhal rədd etməməsini mandatdan kənara çıxması kimi dəyərləndirir. Onlar deyirlər ki, rəsmi Bakı da belə hərəkətlərdən razı deyil, amma hələlik buna dözür.

Politoloqlar hesab edirlər ki, sülhməramlılar ya vaxtından əvvəl, ya da 4 il yarım müddətdən sonra Azərbaycandan çıxarılmalıdırlar, əks halda Azərbaycana potensial təhlükə yaradılacaq. 

Cameə təmsilçiləri bəyan edirlər ki, sülhməramlı qüvvələr azərbaycanlıların Xankəndi, Ağdərə, Xocavəndə qayıtmamasına çalışırlar. Politoloqlara görə,

Rusiya burada yalnız öz geosiyasi maraqlarını güdür, iki icma arasında sülh və təhlükəsizliyin yaranmasına çalışmır. Odur ki, Rusiya sülhməramlılarının Qarabağda olması zərərlidir və gələcək üçün təhlükədir.

"Yenisabah.az" saytında "Əgər Prezident konkret adlar çəkirsə, deməli…" sərlövhəli məqalədə müəllif dövlət başçısı İlham Əliyevin fevralın 1-də "AZtv"yə müsahibəsində Azərbaycanın iri ranqlı məmurlarını tənqid etməsinin səbəblərini deputat Vahid Əhmədovla dəyərləndirir.    

Deputata görə, bu, çox unikal bir çıxış olub, konkret adlar çəkilib: "Mən düşünürdüm ki, müharibədən sonra məmurlar rüşvətxorluq, ərazi zəbt etmək kimi əməllərindən əl çəkərlər. Amma bunu görmədim. Hər şey öz axarında gedir", deyə deputat məmurların öz mənafelərini dövlət mənafeyindən önə qoyduqlarını bildirir.

V.Əhmədov adı çəkilən və digər məmurların bu çıxışdan nəticə çıxarmalı olduqlarını vurğulayır.

Deputat əlavə edir ki, məmurlar hamısı köhnə ampluasındadır, elə bilirlər, ki, elə belə də davam etməlidir, amma belə davam edə bilməz.

V.Əhmədov hesab edir ki, insanlar bu məskənlərə köçməyənə qədər, yaşayış binaları, sosial obyektlər açılana qədər orada heç kimə nə torpaq vermək, nə də ki, nəsə tikməyə icazə vermək lazım deyil.

"Bizimyolinfo.az" saytı isə "ÜST: Yeni mutasiyaların Azərbaycana gəlməyəcəyini düşünməyə dəyməz" sərlövhəli məqalədə koronavirus infeksiyasının mutasiyaya uğramasının fəsadları Ümumdünya Səhiyyə Təşkilatının (ÜST) Azərbaycandakı nümayəndəsi Hande Harmancı ilə araşdırılır.

ÜST-ün Azərbaycan nümayəndəsi Hande Harmancı deyir ki, koronavirusun yeni mutasiyasının xüsusiyyətlərinin öyrənilməsi istiqamətində tədqiqatlar davam etdirilir. O, hesab edir ki, koronavirusun yeni mutasiyalarının üzə çıxması qaçılmazdır: "Koronavirus çox sürətlə mutasiya edən virus olmasa da, biz onun yeni növlərinin çıxacağını gözləyirdik. Koronavirus bizim aramızda dünyada qaldıqca onun yeni mutasiyalarının üzə çıxması qaçılmazdır", deyə H.Harmancı bildirir. 

Onun sözlərinə görə, hazırda yeni variantın daha çox xəstələndirmə, daha çox öldürmə qabiliyyətinin öyrənilməsi, əldə olan diaqnostik testlərin onu aşkarlaması kimi suallara cavab axtarılır və yeni ştamma indiyədək təxminən 50 ölkədə rast gəlinib.

"Mətbuat.az" saytında "Qiymətlər Avropaya uyğun edilirsə, maaşlar da Avropaya uyğun təyin edilsin" sərlövhəli  məqalədə müəllif son qiymət bahalaşmasını iqtisadçı-ekspert Günay Hüseynova ilə dəyərləndirir.

Belə ki, 2021-ci il yanvarn 31-də Tarif Şurası əhaliyə verilən suyun 1 kubmetrinin qiymətini  35 qəpikdən 70 qəpiyə, tullantı suların qiymətini isə 15 qəpikdən 30 qəpiyə qaldırıb və qərar fevralın 1-dən qüvvəyə minib.

İqtisadçı-ekspert Günay Hüseynova isə hesab edir ki, pandemiya və müharibədən sonrakı vəziyyətdə qiymət artımına getmək doğru addınm6 deyil. "Tarif Şurasının bu dönəmdə qiymət artımı etməsi əsassızdır. Pandemiya, müharibə  şəraiti onsuz da əhalinin vəziyyətini alt-üst etdi, odur ki, belə çətin vəziyyətdə qiymət artımına getmək məqsədəuyğun deyil".  

Onun fikrincə, Tarif Şurası qiymət artımı edərkən əhalinin gəlirlərini nəzərə almalı idi. Odur ki, qiymət səviyyəsi, yaşayış minimumu əhalinin gəlirlərinə uyğun qaldırılmalıdır.

"Moderator.az" saytı isə "Bəlkə Qazaxda atəşkəsin pozulmasını Rusiya özü təşkil edib?" sərlövhəli məqalədə Ermənistan hərbiçilərinin fevralın 2-də Qazax rayonu istiqamətində atəşkəs rejimini pozmasını keçmiş xarici işlər naziri Tofiq Zülfüqarovla şərh edir.

Müəllifin təxribatı Rusiyanın özünün təşkil etməsilə bağlı sualını cavablandıran keçmiş nazir bu mülahizəni istisna etmir: "Bəli, ola bilər ki, bundan sonra Qazax-Tovuz istiqamətində də sərhədi (Ermənistan sərhədi nəzərdə tutulur - red.) Rusiyanın ixtiyarına versinlər. Bu, onların ikitərəfli razılaşmasından asılı məsələdir", deyə T.Zülfüqarov bildirir.

Keçmiş nazir deyir ki, hazırda Ermənistanın iqtisadi və hərbi imkanları çox miskin durumdadır, bu baxımdan da Rusiya sərhədçilərinin Qazax-Tovuz istiqamətində yerləşməsi mümkündür.

T.Zülfüqarov 2020-ci il 10 noyabr razılaşmasına əsasən, Qazax rayonunun işğal altındakı 7 kəndinin Azərbaycana qaytarılmsı məsələsinə də toxunub. "Ola bilər ki, Ermənistan daxilində hansısa qüvvələr o ərazilərin Azərbaycana qaytarılmasına müqavimət göstərmək üçün bu atəşkəs pozuntusunu təşkil edib", deyə T.Zülfüqarov ehtimalını dilə gətirir.