Media-icmal 03.04.21

Rusiya Federasiyası müdafiə nazirinin müavini Bulqakovun  Azərbaycan ərazilərinə səfəri fonunda Rusiyanın sülhməramlı missiyasına münasibət, yenidən əyani tədrisə qayıdışın mümkünlüyü, uşaq doğumu ilə bağlı ailələrə verilən müavinətlərin yetərsizliyi,COVİD-19 pandemiyası ilə bağlı qapanmaya gedilməsi  və s. məsələlər medianın aparıcı mövzuları sırasındadır.  

“Müsavat.com” saytı “Rusiya Federasiyası müdafiə nazirinin müavini Bulqakov Xankəndinə hansı yolla və razılıq alaraq gəlib...” sərlövhəli məqalədə Rusiya müdafiə naziri müavininin Azərbaycana səfəri şərh edilir.

Müəllif deyir ki, Rusiya müdafiə nazirinin müavini Xankəndində blok-modul tipli şəhərciyin açılışını edib, Laçın və Şuşada da tikiləcəyini açıqlayıb: “1960 sülhməramlı olduğu halda, hərbi şəhərciklərin sayı artır” deyə şərh verən siyasətçilər və ekspertlər bu məsələyə şübhəli yanaşırlar.   

Şərhçilərə görə, Rusiya sülhməramlı sayı az, modul tipli şəhərciklərin sayı isə çoxdur və burada Rusiyanın hansısa gizli mətləbinin olmasına işarə edilir. Diqqət həm də ona çəkilir ki, Rusiya müdafiə naziri müavininin Xankəndinə bu səfəri barədə Azərbaycan Müdafiə Nazirliyi hər hansı açıqlama yaymayıb.

“Nazir müavininin hansı yolla Xankəndinə gəldiyi isə məlum deyil. Onun Gəncəyə, oradan isə Xankəndinə səfər etməsi, yaxud Bakıda olub-olmaması, ümumiyyətlə, hərəkət trayektoriyası haqda informasiya yoxdur. Niyə Azərbaycan Xarici İşlər Nazirliyi və ya Müdafiə Nazirliyi səfərlə bağlı məlumat yaymır?”, - şərhçilər sual edirlər.

Şərhçilər Rusiya tərəfin Şuşada, Laçında sülhməramlılar üçün şəhərcik tikəcəyi bəyanatı ilə bağlı məsələyə aydınlıq gətirməsini istəyirlər.

Şərhçilər buna da diqqət çəkirlər ki,  Rusiyanın bəzi rəsmiləri və sülhməramlıları Dağlıq Qarabağı məsələsini Azərbaycan kontekstindən ayırırlar, özlərini az qala həmin ərazilərin sahibi kimi aparır, daha çox işğalçı davranışı nümayiş etdirirlər.

“Yeniavaz.com”  saytı  “Məktəblərdə əyani tədrisin bərpası yoluxmaların sayından asılıdır - Təhsil Nazirliyi” sərlövhəli məqalədə yenidən əyani tədrisə qayıdışın mümkünlüyü müzakirə edilir.

Təhsil Nazirliyi bildirir ki, distant tədrisə keçmiş təhsil müəssisələrinin yenidən əyani tədrisə geri dönüşü mövcud sanitar-epidemioloji vəziyyətdən, yəni koronavirusa yoluxmanın azalmasından asılıdır.

Məqalədə qeyd olunur ki, Səhiyyə Nazirliyinin bu günlərdəki rəyi əsasında Təhsil Nazirliyi yoluxmanın daha çox olduğu 5 region üzrə ümumtəhsil və məktəbdənkənar təhsil müəssisələrinin distant təhsilə keçməsi barədə qərar verib: Həmin təhsil müəssisələrinin yenidən əyani tədrisə geri dönüşünə yoluxma sayından asılı olaraq qərar veriləcək.  

Belə ki, aprelin 5-dən Bakı, Sumqayıt, Gəncə, Şəki şəhərləri və Abşeron rayonunun ümumi təhsil müəssisələrində tədris və təlim-tərbiyə prosesinin distant (məsafədən) formada təşkili nəzərdə tutulur.

“Bizimyolinfo.az”  saytı isə “Ailələr dünyaya uşaq gətiməkdən qorxur: 30 manat uşağın aylıq xərcini qarşılayırmı?” sərlövhəli məqalədə uşaq pullarının verilməsinin bərpa edilməli olduğunu müzakirəyə çıxarıblar. 

Məqalədə vurğulanır ki, son illərdə Azərbaycanda demoqrafik göstəricilərdə eniş müşahidə olunur, doğumların sayı aşağı düşür, ölümlərin sayı isə artıb.

Müəllif deyir ki, Azərbaycanda da çoxuşaqlı ailələrə müəyyən güzəştlər var. Belə ki, 5-dən çox uşaq dünyaya gətirib tərbiyə edən qadınlara uşaqların sağ olması şərtilə və axırıncı uşaq 1 yaşına çatdıqda hər uşağa 30 manat müavinət ala bilər.

Müəllifin deməsinə görə, dünyadakı ciddi böhran, iqtisadi çöküş və ölkədə yoxsulluq səviyyəsinin artması ilə bağlı Azərbaycanda çoxuşaqlı ailələrin sayı 10 ildə təxminən iki dəfə azalıb.

Müəllifə görə, artıq 3 və daha çox uşağı olan ailələrə rast gəlinmir, hətta  2-ci uşağı dünyaya gətirmək belə çox çətinləşib: “Belə bir zamanda 30 manat bir uşağın aylıq xərcini qarşılamağa yetirmi? Bu suala cavab vermək üçün heç uzağa getmədən, ən ucuz uşaq bezlərinin qiymətlərinə baxmaq kifayətdir” deyə uşaqlara verilən vsəaitin çox az olduğu vurğulanır.

Müəllif əlavə edir ki, dünya ölkələrinin çoxunda  3 uşaqlı ailələr çoxuşaqlı kimi qiymətləndirilir və müəyyən yardımlar göstərilir, mənzillər verilir, tibbi güzəştlər edilir: “Türkiyədə ilk uşağa 200, 2-ci uşağa 400 və 3-cü uşağa isə 600 lirə aylıq müavinət ödənilir”, - müəllif nümunə göstərir.

“Azpolitika.info” saytı “Yenidən qapanmaya ehtiyac varmı?”- “Qapanmalar özünü doğrultmayıb" sərlövhəli məqalədə son vaxtlar koronavirus infeksiyasına yoluxmaların artdığı üçün qapanmalara gedilməsi ehtimalına dair mütəxəssis və eskpertlərin şərhlərinə yer verilir. 

Müəllif yada salır ki, aprelin 5-dən Bakı, Sumqayıt, Gəncə, Şəki şəhərlərində və Abşeron rayonunda məktəblər distant təhsilə keçirilir və nazirlik bunu mövcud pandemiya şəraitilə əsaslandırıb.

Bəzi sahə mütəxəssisləri və ekspertlər hesab edirlər ki, epidemioloji vəziyyətlə bağlı bu və ya digər qərar qəbul edilə bilər.

Amma bəzi ekspertlər qapanmaya getmək istəyində tələsməyin lazım olmadığı düşüncəsindədirlər. Bu qisim eskpert deyir ki, keçən il bu vaxt Azərbaycanda xəstə sayı 60 min nəfər idi, indi isə 20 min nəfərdir. Odur ki qapanmaya getməklə bağlı tələsik qərar vermək olmaz.

Bir qisim ekspert isə hesab edir ki, ümumiyyətlə, qapanmaya getmək lazım deyil, çünki bu üsul özünü doğrultmur, hətta ictimai nəqliyyatın hərəkətinin məhdudlaşdırılması belə heç bir fayda vermir.