Media-icmal 03.08.2016

Azərbaycanda aparılan islahatlar ...

http://www.azerbaijan-news.az/index.php?mod=3&id=102231

Azərbaycan qəzetinin baş məqaləsi "Azərbaycanda aparılan islahatlar nüfuzlu maliyyə qurumları tərəfindən təqdir olunur" adlanır.

Məqalədə qeyd edilir ki, iqtisadi aktivliyin hökumət tərəfindən dəstəklənməsi iqtisadiyyatın dayanıqlığını təmin edib, xaricdən gələn müəyyən inflyasiya meyllərinə baxmayaraq, makroiqtisadi sabitlik qorunub.

"Ölkələrin biznes mühitini qiymətləndirən və ən mühüm hesabatlardan olan “Doing Business 2016” hesabatında Azərbaycanın mövqeyi 17 pillə yaxşılaşaraq 189 ölkə arasında 63-cü pilləyə yüksəlmiş, dünyada 3 və daha çox islahat aparan 24 ölkədən biri olmuşdur. “Qlobal Rəqabət Qabiliyyəti 2015-2016” hesabatında Azərbaycan iqtisadiyyatı rəqabətqabiliyyətlilik səviyyəsinə görə 140 ölkə arasında 40-cı yerdə qərarlaşaraq MDB məkanında 7-ci ildir ki, lider mövqeyini qorumuş, “G-20”yə üzv olan 8 ölkəni qabaqlamışdır", - məqalədə bildirilir.

Məqalədə ABŞ Dövlət Departamentinin 2016-cı il üçün Maliyyə Şəffaflıq Hesabatına da istinad edilib. Deyilir ki, həmin hesabatda da Azərbaycandakı islahatlar təqdir edilir.

"Bu gün qarşıda duran ümdə vəzifələrdən biri də ixracın həm məhsulların çeşidi, həm də coğrafiyası baxımından şaxələndirilməsidir. Bu məqsədlə ixracın təşviqi, o cümlədən geri ödəmə dəstəyinin verilməsi, “Made in Azerbaijan” brendinin xarici bazarlarda təşviqi, yerli şirkətlərin ixracla bağlı xarici ölkələrdə sertifikat və patentlərin alınması istiqamətində işlər görülür".

Məqalənin sonunda ilin altı ayında Azərbaycanda 78 min daimi iş yeri açıldığı vurğulanır.

Qiymət artımının arxasında İlham Əliyev dayanır

http://www.azadliq.info/150000.html

Azadlıq qəzeti isə diqqəti son zamanlar müşahidə olunan qiymət artımlarına yönəldib. Qəzet əsas məqalələrindən birinin sərlövhəsində yazır ki,"Qiymət artımının arxasında İlham Əliyev dayanır". Məqalədə sual edilir ki,  yumurtanın qiymətindən narahat olan ölkə başçısı, çörəyin qiymətinin qalxmasına niyə susur?

"Ölkənin ağır böhranla üz-üzə qalmasının yeganə səbəbi yarıtmaz idarəçilikdir. Normal düşüncəyə malik olan hər bir vətəndaş bu acınacaqlı vəziyyətin izahatını bilir. Amma hökumət ortaya heç bir izahat qoya bilmir. Nə yarıtmazlığı etiraf etməyə qətiyyətləri, nə də biabırçılığa don geyindirmək üçün fantaziyaları var", - məqalə müəllifi vurğulayır.

Müəllif yazır ki, işığın, suyun, çörəyin, ətin qiyməti qalxsa da hökumət heç bir izahat verə bilməyib.

"Yumurtanın qiyməti qalxanda ölkə başçısı “yumurta müşavirəsi” keçirdi. Bu addımla sübut etmək istədi ki, artımın ona aidiyyatı yoxdur, natəmiz adamlara qarşı barışmazdı. Bu dəfə isə hökumət imitasiya da etmir. Çörəyin, ətin qiyməti qalxıb, kütləvi narazılıq müşahidə olunur, bu hadisə ölkənin gündəminə çevrilib və hökumət susur. Deməli, bu dəfəki “sürpriz”in arxasında Əliyev özü dayanır."

Əhali kreditləri qaytara bilmir

http://musavat.com/news/olke/ehali-kreditlerini-qaytara-bilmir-bilerekden-odenish-etmeyenler-de-var_367641.html

“Yeni Müsavat” qəzeti isə yazır ki, əhali kreditlərini qaytara bilmir. Məqalədə vurğulanır ki, ölkədə vaxtı keçmiş kreditlər durmadan artır.

"Mərkəzi Bankın son hesabatına görə, may ayında problemli kreditlərin həcmi 132,9 milyon manat artıb. İyunun 1-i bu rəqəm 1 milyard 514 milyon manata çatıb. Problemli kreditlərin ümumi kredit portfelindəki payının da kəskin artdığı deyilir. Bunun ümumi portfeldə çəkisinin 8,3 faiz olduğu qeyd edilib. Bir ay əvvəl isə bu göstərici 7,4 faiz idi".

Yazıda qeyd edilir ki, əvvəllər problemlər əsasən xarici valyutada götürülən kreditlərlə bağlı yaranırdı. Ancaq indi manat kreditləri də artıq qaytarılmır.

Mövzunu ekspertlərlə analiz edən məqalə müəllifi keçən ilin fevral ayı ilə müqayisədə vaxtı keçmiş kreditlərin bu ilin beş ayı ərzində 33 faizdən çox artdığını qeyd edir. İlyarım ərzində baş vermiş bu artım kifayət qədər böyükdür.

Məqalədə deyilir ki, banklar problemin daha da böyüməməsi üçün gərəkli addımlar atmalıdırlar. 

"Problemin həllinin bir yolu var. Mərkəzi Bank daxili borclanma hesabına bankların xarici valyutada verdikləri kreditlər üzrə yaranmış məzənnə fərqini onlara ödəməli və bundan sonra banklar xarici valyutada olan kreditləri köhnə məzənnə ilə manatla olan kreditlərə çevirməlidirlər. Bu, məsələnin həllinin ən optimal yoludur", - məqalədə vurğulanır.