Media-icmal - 03.09.18

Azərbaycanda rəsmi siyasətin uğurları, qanunsuz tikintilərin artması, Azərbaycan və Rusiya rəhbərliyinin Soçi görüşünə baxış və s.məsələlər bugünki (03 sentyabr, 2018-ci il) medianın aparıcı mövzularındandır...

Lider ölkə olmağın siyasət formulu

"Azərbaycan" qəzeti "Müstəqil siyasət kursu Azərbaycanın etibarlı tərəfdaş mövqeyini möhkəmləndirib" sərlövhəli məqalədə dövlət siyasətini dəyərləndirir. (http://www.azerbaijan-news.az/view-153435/M%C3%BCst%C9%99qil-siyas%C9%99t-kursu-Az%C9%99rbaycan%C4%B1n-etibarl%C4%B1-t%C9%99r%C9%99fda%C5%9F-m%C3%B6vqeyini-m%C3%B6hk%C9%99ml%C9%99ndirib)

Müəllif hesab edir ki, Azərbacan sabit və uğurlu inkişafı ilə dünya düzənində özünəməxsus yer tutur, tam müstəqil siyasət yürüdən dövlət kimi tanınır, həm də ölkənin daxil olduğu Cənubi Qafqaz regionu qlobal qüvvələrin diqqət mərkəzindədir: "Bu baxımdan, son illərdə ölkəmizin rolu əhəmiyyətli dərəcədə artmaqdadır. Bu gün qlobal və regional səviyyədə geosiyasi gücə çevrilməyə çalışan hər hansı bir dövlət regionun qabaqcıl ölkəsi olan Azərbaycanla mövcud olan münasibətlərini daha da gücləndirməyi prioritet məsələ hesab edir".

Müəllif ölkəyə rəhbərlik etdiyi ilk gündən dövlət başçısı İlham Əliyevin Azərbaycanın müasir dövlətə çevrilməsi və tam müstəqil siyasət yürütməsini, milli ideyanın başlıca hədəfi kimi müəyyən etməsini, bu sahədə sadəcə deklarativ bəyanatlar verməməsini, həm də konkret icra mexanizmlərinin müəyyənləşdirilməsi istiqamətində də mühüm addımlar atmasını xüsusi vurğulayır.

Yazı müəllifi deyir ki, İlham Əliyev ölkənin iqtisadi müstəqilliyini də möhkəmləndirib, bu iqtisadi müstəqillik Azərbaycanı etibarlı tərəfdaşa, böyük nüfuza malik olan bir ölkəyə çevirib.

Müəllifə görə, dövlət başçısının son 15 il ərzində yürütdüyü uğurlu diplomatiya sayəsində Azərbaycan dünya siyasətinə təsir imkanlarını, tərfdaşlarının sayını artırıb və dünya birliyi üçün açıq ölkəyə çevrilib.

Məqalə müəllifi deyir ki, milli maraqlara əsaslanan xarici siyasət strategiyasının prioritet istiqamətini nüfuzlu dövlətlərlə və beynəlxalq təşkilatlarla bərabərhüquqlu tərəfdaşlıq, çoxvektorlu əməkdaşlıq təşkil edir.

Müəllif deyir ki, bu mənada Azərbaycan hazırda regionda və dünyada baş verən əsas iqtisadi, siyasi, mədəni hadisə və proseslərdə layiqincə təmsil olunur, öz mövqeyini bildirir və mənafelərini qoruyur.

Müəllifə görə, təkcə son 8 ayda Azərbaycana səfər edən dövlət və hökümət başçıları ilə keçirilən görüşlər, verilən bəyanatlar göstərir ki, Azərbaycan dövlətinin tam müstəqil siyasəti ölkənin əhəmiyyətli dərəcədə yüksəldib.

Yazı müəllifi əlavə edir ki, eləcə də İlham Əliyevin xarici səfərləri yürüdülən siyasətin dövlətin və xalqın maraqlarına layiqincə xidmət etdiyini göstərir.

Hər bir səfər Azərbaycanın ayrı-ayrı dövlətlərlə və təşkilatlarla ikitərəfli və çoxtərəfli əlaqələrinin daha da genişlənməsinə təkan verir.

Rüşvət və korrupsiyanın "qanunsuz tikintilər" bərabərliyi

"Novoye Vremya" qəzetində isə "Qanunsuz tikintilərin söküntüsü: kampaniya, yoxsa, ciddi?" sərlövhəli məqalə oxumaq olar (http://novoye-vremya.com/w140842/.../#.W4wxy-gzbIU).

Müəllif bu günlərdə Bakı Şəhər İcra hakimiyyətinin paytaxtdakı qanunsuz tikintilərin sökülməsi haqda qərarı fonunda Bakıda qanunsuz tikintilərin artması səbəblərini araşdırır.

Müəllif deyir ki, Bakıda qanunsuz tikintilər başlanğıcını Azərbaycanda "neft bumu" dövründə (2006-2014-cü illər) götürüb və həmin vaxtdan da bu mövzu daim gündəmdədir, gah qanunsuz tikintilərə qarşı mübarizə aparılır, gah da belə tkintilərin artdığı bildirilir: "Odur ki, qanunsuz tkintilərə qarşı mübarizənin yeni mərhələsinin növbəti kampaniyaya dönməsini istəmirik".

Daha sonra isə müəllif Bakı meriyası təmsilçilərinə istinadən paytaxtda söküləcək qanunsuz tikintilər barədə və təkcə Xətai rayonuna aid 7 ərazidə belə qanunsuz tikintilər aşkarlanmasından danışır.

Müəllif də hesab edir ki, ağacların qanunsuz kəsilməsi kimi qanunsuz tikintilər də yolverilməzdir, amma Azərbaycanda "qanunsuz tikinti" şərti anlayışdır: "Azərbaycanda heç bir icazə almadan böyük tikinti aparmaq bir yana, heç əlavə "balkon" artırmaq da mümkün deyil. Başqa sözlə isə "şifahi icazə institutu" həmin bum dövründə işləyib, indi də işləməkdə davam edir. Heç kəsə də sirr deyil ki, korrupsiya, rüşvət bütün gücü ilə fəaliyyətdədir. İcazə isə müəyyən məbləğə görə verilir. Aydın olmur ki, qanunsuz tikintilərin bu həcmə çatmasına görə kim daha çox günahkardır - tikənlərmi, yoxsa, baş verənlərə göz yumanlarmı?".

Bu məqamlara görə, müəllif deyir ki, qanunsuz tikinti məsələsi çox "cəncəl" məsələdir və burada hər şeyi bir buldozerlə həll etmək olmaz, burada sahibkarların da və sadə vətəndaşların da maraqları nəzərə alınmalıdır: "Nə deyərsək deyək, 20 il ərzində rüşvət verib tikintiyə icazə almaq kimi sistemin olması onların günahı deyil. Bununla rüşvət verilməsini təqdir etmirik, amma vətəndaşlar öz obyektlərinin tikintisi üçün az pul xərcləməyiblər. Bir tərəfdən ölkədə kiçik və orta sahibkarlığın inkişafından danışılır, digər tərəfdən kommersiya obyektlərinin sökülməsi buna ziyan verə bilər".

Müəllif hesab edir ki, indiki halda təkcə tikinti sahibi olan sadə vətəndaş və ya iş adamı deyil, həm də buna icazə verən məmur da cavabdeh kimi tanlnmalıdır və onların bir çoxları hələ də vəziflərini davam etdirirlər.

Yazıda deyilir ki, bu məsələdə məhkəmələr kənarda qalmamalı, vətəndaş hüquqlarının pozulmaması üçün söküntü məhkəmə qərarına əsasən aparılmalıdır.

Müəllif belə bir çərçivə də göstərir ki, hər yeni gələn icra başçısı özündən əvvəlki "qanunsuz tikintiləri" sökdürür və qanunsuz tikintilər bundan sonra yenidən sürət götürür, real mübarizə əvəzinə təsir sferasının dəyişməsi baş verir və ümid edək ki, bu dəfə belə olmayacaq...

Bu da bir "nağıl" idi...

"Azadlıqinfo"da isə "Növbəti Qarabağ nağılının sonu" sərlövhəli məqalə (https://www.azadliq.info/222003.html) diqqət cəlb edir.

Müəllif Prezident İlham Əliyevin başçılığı ilə bu günlərdə Soçi şəhərində Rusiya rəhbərliyi ilə keçirilmiş görüşü müzakirə müstəvisinə gətirir.

Yazı müəllifi hələ bu görüş ərəfəsində Azərbaycanda hökumət sözçülərinin "Rusiyaya inteqrasiya maşını"nın sürətini artırdıqlarını, Rusiyanın Qarabağı Azərbaycana qaytaracağını, MDB-nin Kollektiv Təhlükəsizlik Müqaviləsi Təşkilatına üzvlüyünü təbliğ etdiklərini xatırladır.

Müəllifə görə isə, bu görüş ərəfəsi deyilənlər görüşdə özünü doğrultmadı, zaman yenə də hər şeyi yerbəyer etdi: "Soçi görüşü bütövlükdə iqtisadi görkəm aldı və Qarabağı yada salan olmadı. Daha doğrusu, hökumətimizin ülvi məhəbbət bəslədiyi Putin "Rusiya Qarabağ münaqişəsinin həllində səylərini davam etdirəcək" deməklə, məsələyə son qoydu. Yəni, kosmetik də olsa, hər hansı jestdən, mesajdan əsər-əlamət olmadı".

Müəllif deyir ki, bu görüşdə 25 ildir təkrarlanan ifadələr bir daha təkrarlanıb və heç bir ağıllı adam Soçi səfərindən Qarabağ uğuru gözləmirdi.

Məqalə müəllifi hesab edir ki, bunun səbəbi Rusiyanın Ermənistana münasibətini bütün dövrlərdə açıq etiraf etməsidir, Qarabağın işğalda qalması üçün Ermənistana maddi, mənəvi, siyasi dəstək verməsidir: "Təsadüfi deyil ki, Rusiya Müdafiə Nazirinin müavini "bizim Qafqazda əsas müttəfiqimiz Ermənistandır" demişdi. Hər iki ölkənin ordularının birləşdirilməsi, qondarma erməni soyqırımı abidəsinin ziyarət edilməsi, Qarabağda qan tökənlərin Rusiyada yüksək fəxri adlara layiq görülməsi də təsadüfi deyil".

Müəllifə görə, Soçi görüşündən əvvəl Azərbaycanda yaradılan səs-küy yalançının növbəti cəhdi olub, bu görüşdə nəinki göydən 3 alma düşməyib, axıra qədər nağıl da danışmayıblar.

Müəllif deyir ki, Rusiya üçün Qarabağ münaqişəsinin ədalətli həlli Cocuq-Mərcanlının, Günnütün, Lələ təpənin simasında təcəlla edib, bu isə Azərbaycana "kiçik uğurlarla təsəlli tapın və 20 faiz ərazini xırda-xırda unudun" mesajıdır, Soçiyə Qarabağı almaq üçün yollananlar isə nələrisə verib, geri qayıdıblar.

Rəsmi təbliğata gəlincə isə, müəllif bildirir ki, indi rəsmi təbliğat "səfərin sətiraltı mənası olmasını, Ermənistanın təşvişə düşməsini, torpaqları geri qaytarmaq üçün ciddi mərhələ başlamasını gözə soxmağa" başlayacaq.

Müəllif deyir ki, "qarnımız belə şeylərə tox olduğu" üçün, rejimin süfrəsindən "nuş etmirik", rüsvayçı bir təbliğatın rüsvayçı nəticələrini müşahidə edirik.