Media-icmal 04.02.21

Azərbaycanın İnternet resursları ölkə gündəminin aktual məsələlərini müzakirə, təhlil və şərh müstəvisinə gətirirlər.  Bu müstəvidə  əhaliyə verilən suyun və tullantı sularının tariflərinin artırılmasına baxış,  oliqarx məmurların tənqidindən doğa biləcək mümkün nəticələr,  işğaldan azad edillən ərazilərin minalardan təmizlənməsi vəziyyəti  s. mövzular əksini tapır.   

“Redaktor.az”  saytı  “Azərsu” zərərini xalqın pulu ilə ödəməyə çalışır" – ekspert rəyi” sərlövhəli məqalədə müəllif  Tarif Şurasının bu il 31 yanvar qərarı ilə qiymətlərin bahalaşdırılmasını iqtisadçı-ekspert Natiq Cəfərli ilə dəyərləndirir.

Belə ki, yanvarın 31-də Tarif Şurasının qərarı ilə Bakı, Sumqayıt və Abşeronda əhaliyə verilən suyun bir kubmetri 35 qəpikdən 70 qəpiyə, tullantı sularının qiyməti isə 15 qəpikdən 30 qəpiyə qaldırılıb. 

Amma müəllif  vurğunu bunun üzərinə qoyur ki, bu qiymət artırılması əhali ilə müzakirə edilmədən qəbul olunub, bu addımı atmağın zərurəti əsaslandırılmayıb.

Ekspert Natiq Cəfərli isə bu düşüncədədir ki, “Azərsu” ASC-nin qiymətləri birdən-birə 100 faiz artırması vətəndaşlar üçün maddi sıxıntılar yaradacaq.  

N.Cəfərli deyir ki, bu artım ən çoxu 20-30 faiz arta bilərdi, amma bunun üçün öncə əhaliyə izah verilməli idi. 

N.Cəfərliyə görə, “Azərsu” ASC bu sahə üçün hər hansı vəsait xərcləməyib, dövlət vəsaitləri xərclənib, odur ki, bu qurumun suyun maya dəyərinin baha olmasını nəyə əsasən deyirsə, məlum deyil.

Ekspertə görə, burada səbəb başqadır: “Burada nə maya dəyəri artıb ki, suyun qiymətini bahalaşdırırlar? Bu baxımdan hesab edirəm ki, qiymət artımı əsassızdır. ASC, sadəcə, öz ziyanlarını dövlətin və xalqın hesabına bağlamağa çalışır” deyə bahalanmanın korporativ maraqlardan irəli gəldiyini söyləyir.

“Yenisabah.az”  saytı isə “Oliqarx məmurların “qara günü” başladı – hədəfdə onlardır” sərlövhəli məqalədə müəllif dövlət başçısı İlham Əliyevin bu günlərdə iri ranqlı məmurları konkret olaraq tənqid etməsini şərh edir.   

Müəllif deyir ki, bu çıxış ən çox müzakirə olunan məsələlər sırasında yer alır.

Müəllifə görə, dövlət başçısının tənqidlərindən irəli gələn məsələlərdən biri də konkret ünvanla  tənqid edilən məmurların vəzifələrini qoruyub, ya qoruya bilməyəcəkləri sualıdır.

Müəllifin deməsinə görə, siyasi analitiklər bu çıxışı ölkədə rüşvət və korrupsiyaya qarşı aparılan mübarizə çərçivəsində dəyərləndirirlər.

Onun fikrincə, hakimiyyət mənfi reputasiyaya malik bu məmurlardan xilas olmaqda israrlıdır, həm də bu məmurlar cəmiyyətdə artıq çoxdan “arzuolunmaz şəxs”ə çevriliblər; “Onların hakim komandada yer almaları iqtidarın imicini zədələyir.

Bundan irəli gələrək müəllif hesab edir ki, bu, Azərbaycanın köklü dəyişikliklər astanasında olduğunu düşünməyə əsas verir, yeni dövrdə köhnə kadrlara ehtiyac qalmayacaq.

Bu məmurların dövlət başçısına müraciət edərək rəhbəri olduqları qurumların Şuşada  ofislərinin qurulması istəklərinin əks təsir göstərməsini isə müəllif belə ifadə edir: “Yolunu Şuşadan salmaq istəyənlərin “yol üstündə” olduqlarını söyləmək mümkündür.

“Sfera.az” saytı isə ”Ermənilər yalançı mina xəritələri də təqdim edə bilərlər – hərbi ekspert” sərlövhəli məqalədə Ermənistan tərəfinin məsuliyyətsiliyi hərbi ekspert Ədalət Verdiyevlə dəyərləndirilir.

Ə.Verdiyev deyir ki, hər bir hərbi əməliyyat sona çatdıqda,  işğalçı tərəf zəbt etdiyi torpaqlardan çıxanda və ya çıxarılanda orada yerləşdirdiyi mina xəritəsini təqdim etməlidir və bu, əksini hərbi qaydalarda tapır: “Lakin 4 ay müddətinə yaxındır ki, Qarabağda hərbi əməliyyatlar bitib, amma erməni tərəfi Azərbaycana bu xəritələri təqdim etməkdən boyun qaçırır” deyə Ə.Verdiyev məsələnin mahiyyətinə aydınlıq gətirir.

Ə.Verdiyevə görə, bu halın baş verməsi erməni ordusunda intizamsızlığın göstəricisidir.

Ekspert hesab edir ki, bir səbəb də ermənilərin minaları plansız şəkildə düzməsi və bunların heç birinin də sənədləşdirilməməsi ola bilər.

Ekspert vurğulayır ki, daha bir səbəb isə bunun qəsdən edildiyi də ola bilər, yəni, minalarla bağlı xəritə var, amma erməni tərəfi onu Azərbaycana vermir.