Media-icmal 05.04.21

Ikinci Qarabağ müharibəsinin gedişində Şuşaya raket atılması, Rusiya sülhməramlılarının fəaliyyətində ayrı-seçkilik, Bakı meriyası Mərkəzi Aparatının keşmiş rəhbərinin həbsi, karantinin sərtləşdirrlməsinin səbəbləri və s. məsələlər medianın aparıcı mövzuları sırasındadır.

“Kaliber.az” saytı “Şuşa “İskəndər”lə işğaldan azad edildikdən sonra vurulub – ANAMA” sərlövhəli məqalədə son günlər medianın əsas mövzularından olan Şuşaya raket atılması araşdırılır.

Azərbaycan Minatəmizləmə Agentliyi İdarə Heyəti sədrinin müavini Samir Poladov deyir ki, 2021-ci il martn 15-də Şuşada təmizləmə əməliyyatı zamanı 2 ədəd partlamış raketin qalıqları aşkar edilib.

Onun deməsinə görə, Agentliyin mütəxəssisləri tərəfindən raketin üzərində olan identifikasiya nömrəsinə (9M723) baxış zamanı və aparılmış əlavə araşdırma nəticəsində onun “İsgəndər-M” raketi olduğu müəyyən edilib.  

S.Poladov əlavə edir ki, hər iki raket partlasa da Şuşa şəhəri ərazisində raketlərdən birinin çalası aşkar edilib.

O deyir ki, raketin tam gücü ilə partlamaması barədə də əsaslı ehtimallar irəli sürmək olar, çünki, raketin iddia edilən gücü ilə törədilmiş dağıntı arasında qeyri-proporsionallıq var. Onun fikrincə, tam gücü ilə partlama şəraitində raketin hissələri belə böyük həcmdə qala bilməzdi.

Onun deməsinə görə, raketlərin konkret olaraq hansı tarixdə atıldığını demək  bir az çətin olsa da böyük ehtimalla Azərbaycan ordusunun Şuşa şəhərini azad etməsindən sonra (2020-ci il 8 noyabrın ) istifadə edilib.

“Moderator.az” saytı isə “Xocalı aeroportunda Rusiya və Ermənistan bayraqları dalğalanır, üstəlik...” sərlövhəli məqalədə Rusiya sülhməramlılarının ədalətsiz münasibətindən bəhs edilir.

Müəllif deyir ki, Azərbaycan ordusu Laçın dəhlizindən keçəndə sülhməramlılar Azərbaycan dövlət bayrağının endirilməsini tələb edir, amma Xocalı rayonu ərazisində Rusiya və Ermənistan bayraqları qaldırılır.

Ona görə Xocalı aeroportu Xocal rayonuna aid olduğu üçün Xankədi aeroprotu adlandırıla bilməz.

Müəllif deyir ki, Azərbaycan İkinci Qarabağ savaşında qələbə qazandıqdan sonra da orada Azərbaycan bayrağı yox, Rusiyanın, Ermənistanın bayraqları və Qarabağdakı separatçı-terrorçu rejimin əski parçası dalğalanır.

Müəllif əlavə edir ki, inzibati-hüquqi cəhətdən aeroport Azərbaycan ərazisində salınsa da faktiki olaraq birabaşa hərbi-siyasi və inzibati nəzarət imkanı hələ ki yoxdur: “Lakin bu o demək deyil ki, Azərbaycan ərazisinə rəsmən sülhməramlı missiya ilə gəlmiş bir dövlət  işğalçı kimi Xocalı aeroportu üzərində öz bayrağını ucaltmalı, üstəlik, həmin ərazinin 30 ilə yaxın işğalını həyata keçirmiş qəsbkar ölkənin və separatçı qurumun əski parçalarının yer almasına şərait yaratmalıdır.  Necə olur, Azərbaycan ordusu Laçın dəhlizindən keçəndə öz  dövlət bayrağını endirməlidir, amma Xocalı rayonu ərazisində Rusiya və Ermənistan bayraqları qaldırılmalıdır?..” deyə müəllif sual ünvanlayır.

“Müsavat.com” saytı isə “Abutalıbov həbsə getmir, amma istintaqda...” sərlövhəli məqalədə Bakı Şəhər İcra Hakimiyyəti Mərkəzi Aparatının keçmiş rəhbəri (2010-2018-cu illər-red) Rasim Quliyevin həbsi və bunun perspektivi dəyərləndirilir..

Söhbət ondan gedir ki, Hacıbala Abutalıbov 2001-2018-ci illərdə Bakı Şəhər İcra Hakimiyyətinin başçısı olduğu dövrdə Rasim Quliyev ərazi və idarəetmə təşkilatları ilə iş şöbəsinə, 2010-2018-ci illərdə isə meriyanın Mərkəzi Aparatına rəhbərlik edib. Bu günlərdə Rasim Quliyev həbsə alınıb, ona qarşı Cinayət Məcəlləsinin 314-2.3-cü (qanunla müəyyən olunmuş qaydaları pozmaqla torpaq sahələri ayırma, yaxud tikinti və ya quraşdırma işlərinin aparılmasına icazə vermə) və 308.2-ci (Vəzifə səlahiyyətlərindən sui-istifadə) maddələri ilə ittiham irəli sürülüb, barəsində 3 aylıq həbs qət imkan tədbiri seçilib.

Bu kontekstdə Hacıbala Abutalıbovun da həbsə alınmasını ekspertlər bir neçə səbəbdən real hesab etməsələr də istintaqın ondan soruşacaq çox mətləblər olduğunu bildirirlər.

Müəllifin deməsinə görə, Abutalıbov vəzifədən azad olunan kimi meriyada yoxlamalar başlayıb, həm də Bakı Şəhər İcra Hakimiyyətinin  tabeliyində olan müəssisələrdə baş verən korrupsiya ilə bağlı ölkə mətbuatında çoxsaylı məlumatlar dərc olunub. Bakı Şəhər İcra Hakimiyyətində korrupsiya və rüşvətxorluğun ən çox tüğyan etdiyi  sahələrdən biri isə təmir-tikinti sahəsi olub. 

Müəllif vurğulayır ki, yeni mer Eldar Əzizov meriyada araşdırma və “təmizləmə” işinə prezidentin tapşırığı ilə başlamışdı. Prezident daha çox qanunsuz tikililərdən narazılıq edirdi, bu məsələdə bələdiyyələr təqsiri rayon icra hakimiyyətlərinin, rayon icra hakimiyyətləri Bakı şəhər meriyasının, meriya isə bələdiyyələrin üzərinə atırdılar, əslində isə hamısı əlbir idilər, çünki qanunsuz tikililərdən böyük qazanc əldə edirdilər”.

Müəllifə görə, şəhərdə qanunsuz tikililər davam edibsə belə, bu işi Rasim Quliyev nə təkbaşına, nə də özbaşına həyata keçirə bilməzdi.

Abutalıbovun taleyinə gəlincə, ekspertlər onun həbsini bir neçə səbəbdən real hesab etməsələr də istintaqda ondan soruşulacaq çox mətləblərin olduğunu iddia edirlər.   

“Sfera.az” saytı isə “Azərbaycanda sərt karantin” - Vəziyyət pisləşir və...” sərlövhəli məqalədə ölkədə COVİD-19 pandemiyası ilə bağlı vəziyyəti professor Adil Qeybulla ilə dəyərləndirir.

Adil Qeybulla deyir ki, karantin qaydalarının sərtləşdirilməsi epidemioloji vəziyyətə görə qəbul edilir, indi isə vəziyyət pisləşməyə doğru gedir və yoluxma potensialı artır.

Onun ikrincə, mümkün qədər təmasların qarşısı alınmalıdır, əgər canlı təmaslar minimuma enməsə karantin qaydalarının birtərəfli sərtləşdirilməsi fayda verməz.

“Hesab edirəm ki, karantin göstərişlərini (maska taxmaq, əlləri dezinfeksiya etmək, sosial məsafə saxlamaq) gözləməklə vəziyyəti sabit saxlamalıyıq. Amma yoluxma artarsa sərt karantin olacaq. Çünki biz ikinci dalğa zamanı da gördük ki, xəstəxanalarda yer tapılmır, ölənlərin sayı çox olur, ambulator xidmət üçün dərman ajiotajı yaranır. Firkimcə, nə qədər ki vəziyyət pisləşməyib, müəyyən qaydalar qəbul olunmalıdır. Amma qaydalar elə qəbul olunmalıdır ki, hər tərəfi əhatə etsin”, -Adil Qeybulla bildirir.  

O hesab edir ki, sosial həyatın bir tərəfində sərt karantinə gedilirsə, digər tərəfində müəyyən təmaslar üçün imkanlar olmamalıdır, əksinə, belə halda  karantinin faydası olmayacaq.