Media-icmal 05.11.20

“Azərbaycan” qəzeti  “Qarabağı yenidən cənnətə çevirəcəyik” sərlövhəli məqalədə erməni işğalından azad edilən Qarabağ torpaqlarında quruculuq işlərinə başlanacağını dəyərləndirir.

Müəllif vurğulayır ki, 30 illik işğal dövründə təkcə bu torpaqlar işğal altında qalmayıb, onun həm yeraltı və həm də yerüstü sərvətləri talan edilib, dağıdılıb.

Müəllif  əlavə edir ki, Ermənistanın ayaqda qalmasının bir səbəbi də elə işğal altında qalan torpaqlardakı sərvətlərn talan edilməsi olub.              

Yazı müəllifi vurğulayır ki, Ermənistanın  dövlət büdcəsinin 51 faizi Azərbaycan ərazisindən talan edilən təbii sərvətlər sayəsində formalaşırdı, artıq bu mənbə əlindən alınır və  onsuz da zəif olan iqtisadiyyatı tamamilə çökəcək, əhalinin sosial vəziyyəti daha da pisləşəcək.

Müəllif deyir ki, Azərbaycan dövləti tərəfindən görülən müvafiq tədbirlər sayəsində tezliklə bu yataqlar istismar edilərək ölkəmizin iqtisadi qüdrətini daha da artıracaq.

Müəllif  yada salır ki, bu il oktybrın 29-da "Azərbaycan Respublikasının işğaldan azad olunmuş ərazilərində müvəqqəti xüsusi idarəetmənin təşkili haqqında” fərman imzalanıb, sənədin əsas hədəflərindən biri də işğaldan azad olunmuş ərazilərdə böyük qayıdışı təmin etməklə iqtisadiyyatı yenidən dirçəltməkdir.

“Yenisabah.az” saytı “Hazırda hərbi əməliyyatlar davam edir və gərgin... – açıqlama” sərlövhəli məqalədə müəllif  deyir ki, Azərbaycan ordusunun sentyabrın 27-dən başlayaraq həyata keçirdiyi əks-hücum əməliyyatı nəticəsində bu günədək 200-dən çox yaşayış məntəqəsi işğaldan azad edilib.

Müəllif güman edir ki, son günlər döyüşlərin intensivliyi bir qədər zəifləyib və bəzi müşahidəçilərə görə, bu ABŞ-dakı prezident seçkilərilə əlaqəlidir.

Keçmiş xarici işlər naziri, siyasi şərhçi Tofiq Zülfüqarov isə ABŞ-dakı seçkilərlə Qarabağdakı əməliyyatların səngiməsi arasında hər hansı əlaqə görmədiyini deyir.

“Hesab edirəm ki, hazırda da hərbi əməliyyatlar davam edir və gərgin şəkildə həyata keçirilir. Əməliyyatların səngiməsi döyüşlərin dağlıq hissələrdə olması ilə bağlıdır. Bunun öz xüsusiyyətləri var, Gəlin, nəticəni gözləyək, hərbçilər öz işlərini görməlidirlər”.

T.Zülfüqarov tələsməyin tərəfdarı olmadığı, hərbçilərə inandığı, onların öz işlərini yüksək səviyyədə gördükləri düşüncəsindədir.

“Mətbuat.az”  saytı isə “İran ikibaşlı siyasət həyata keçirir''  sərlövhəli məqalədə politoloq Məhəmməd Əsədullazadə İranın ali dini rəhbəri Seyid Əli Xamneyinin, İran prezidenti Həsən Ruhaninin Azərbaycanaın ərazi bütövlüyünü dəstəkləməsi barədə mövqeyini dəyərləndirir.  

Politoloq hesab edir ki, belə bir məqamda verilən bu bəyanat gecikmiş olsa da müəyyən siyasi əhəmiyyəti var. Bununla belə politoloq deyir ki, bu bəyanat İranın manevr siyasətinə söykənir. ''Əgər İran öz siyasətində səmimidirsə, Ermənistanla sərhəddi bağlayıb, işğala son qoymaq üçün Yerevana təzyiqlər etsin”, - o bildirir.

M.Əsədullazadə hesab edir ki, amma İran Norduz sərhəd keçidinin bağlanmasına getməyəcək, çünki burada Rusiya amili də müəyyən rol oynayır.

Politoloq bildirir ki, İran yerli istehsal olan PUA -ları nümayiş etdirir, səbəb də budur ki, Azərbaycanın Qarabağda Ermənistan Silahli Qüvvələrinə qarşı tətbiq etdiyi PUA-lar İranı narahat etməyə bilməzdi.

''İranın bu situasiyada təlimlər keçirərək PUA-larını nümayiş etdirməsi müəyyən suallar doğurur. Çünki BMT İrana qarşı silah embarqosuna razılaşmadı və bu halda İran istənilən silahı sata bilər. Sirr deyil ki, Qarabağda müharibənin ilk günündə İran Ermənistana silah tranziti rolunu həyata keçirirdi, Odur ki, İranın PUA -larını Ermənistana verməməsinə zəmanət yoxdur... Çünki İran Qarabagada uğurlu hərbi əməliyyatlardan məmnun deyil''.

“Oxu.az” saytı isə “Millət vəkilindən nəqliyyatda sıxlıqla bağlı həyəcan təbili” sərlövhəli məqalədə müəllif son vaxtlar  koronvirus pandemiyasının yayılması səbəbləri barədə deputat Musa Quliyevlə söhbətləşir.

Deputatın fikrincə, koronavirusun yayılmasının qarşısını almaq üçün ictimai nəqliyyatla bağlı daha ciddi tədbirlər görülməlidir.

O, hesab edir ki, nəqliyyatda sıxlıq ciddi fəsadlarla nəticələnə bilər, buna görə də pik saatlarda avtobuslarda sosial məsafənin saxlanmasını müşahidə etmir, əksinə, avtobuslarda sıxlıq görünür: “Təbii ki, bu da koronavirusun yayılması üçün çox təhlükəlidir. Amma bununla bağlı effektiv tədbirlər görmürük”.

Yada salaq ki, son günlər Azərbaycanda koronavirusa (COVID-19) yoluxma dörd rəqəmli həddə yüksəlib. 1242 yeni yoluxma faktı qeydə alınıb, 551 nəfər müalicə olunaraq sağalıb və evə buraxılıb, 15 nəfər COVID-19-dan vəfat edib. Aktiv xəstə sayı 12484 nəfər olub. Ölkədə son sutka ərzində 11159, hazırkı dövrədək isə 1 379 779 test aparılıb. Ölənlərin ümumi sayı 768 nəfərdir. Yoluxanların ümumi sayı 58 282 nəfər, sağalanların sayı 45 030 nəfərdir.