Yerevan KİV erməni dövləti və ordusunun idarə edilməsində yaranmış böhran barədə məlumat verirlər

Bakı/05.11.20/Turan: Hazırkı hakimiyyət müxalifətin təklifini qəbul etməkdən və Dövlət Müdafiə Komitəsi yaratmaqdan, yəni baş verənlərə görə məsuliyyəti bölməkdən imtina edib. Paşinyan təbliğatında məğlubiyyətə görə məsuliyyətin üzərindən atılması xətti yürüdülür. Bu barədə Yerevanın “İrates” qəzeti yazır.  

“Hakimiyyət dairələri tərəfindən belə bir dəqiq mesaj formalaşdırılıb və dövriyyəyə buraxılıb ki, guya bütün bunlarda əvvəlki hakimiyyət günahkardır və baş verənlər onların siyasətinin nəticəsidir. Deyirlər ki, bununla günahı bölüşməyə və yaranmış vəziyyətə görə məsuliyyət  yaratmamağa çalışırlar, çünki müharibədən sonra çox suala cavab vermək lazım gələcək və hakimiyyət bu yükü öz üzərinə götürmək istəmir”, - Yerevan qəzeti yazır.

 Mətbuat təcili ümumxalq səfərbərliyinə zərurət olduğunu bildirən, lakin özləri döyüşmək istəməyən erməni məmurlara istehza edirlər.

Belə məlumatlardan biri: “Ermənistanın ədliyyə naziri Rüstəm Badasyan hələlik cəbhəyə getməyi planlaşdırmır”. “Mənim belə planım yoxdur”, - Rüstəm Badasyan cəbhəyə getmək niyyətində olub-olmaması barədə jurnalistlərin sualının cavabında bildirib.

“Əgər zərurət yaranarsa, mən vətənə xidmət etməyə hazıram, heç bir problem yoxdur”, - o qeyd edib.

Ermənistanın qeyri-hökumət siyasi qüvvələri də  durğun vəziyyətdədir. “Joxovurd” qəzeti yazır ki, oktyabrın 29-dan Moskvada olan Çiçəklənən Ermənistan Partiyasının nümayəndə heyəti Yerevana qayıdıb, ancaq səfərin nəticələri barədə məlumat vermək istəmir.

“Bizim məlumatımıza görə, Çiçəklənən Ermənistan fraksiyasının nümayəndələri Moskvada hakim partiyanın və müxalifət partiyalarının nümayəndələri ilə görüşlər keçirsələr də Moskvaya səfərin nəticələri barədə danışmamağa qərar veriblər. Çoxsaylı görüşlər olub, amma nə qədər effektiv olduğunu söyləmək hələlik tezdir”, - qəzet yazır.

Nəşr qeyd edir ki, elə ilk gün onlar Vladimir Jirinovski partiyasının nümayəndələri və şəxsən onunla, həmçinin Dövlət Dumasının deputatları və Vahid Rusiya Partiyasının nümayəndələri ilə görüşüblər.

Nümayəndə heyətinə parlamentin vitse-spikeri Vahe Enfiacyan, Regional məsələlər və Avrasiya inteqrasiyası üzrə daimi komissiyanın sədri Mikael Melkumyan, Çiçəklənən Ermənistan fraksiyasının katibi Arman Abovyan və fraksiyanın deputatı Naira Zöhrabyan daxil olub.

Erməni jurnalistlərin istehza mərkəzində Ermənistan ordusunun mətbuat katibi Artsrun Ovannisyan da var. “Qraparak” qəzeti yazır ki, Müdafiə Nazirliyində Ovannisyanın vakant olan nazir müavini postuna təyinatı barədə söhbətlər gedir.

“Yaxın günlərdə bu postu bu günlər bəzilərinin kumiri olan Artsrun Ovannisyan tutacaq. O, hər gün cəbhədə vəziyyətə dair informasiyanı (bəzən gerçəkliklə heç bir əlaqəsi olmayan) təqdim edir  və cəbhədə hökm sürən vəziyyətdən asılı olmayaraq ruhlandırır: “Biz qalib gələcəyik!”, - qəzet yazısından sitat.

“Qraparak” yazır ki, mənbələrə görə, Ovannisyanın bu vəzifəyə təyinatı məsələsində baş nazirin xanımı Anna Akopyan maraqlıdır.

“Bu, qeyri-ciddidir, mümkün deyil”, - Artsrun Ovannisyan bildirib. “Niyə mümkün deyil, nazir müavini vəzifəsinin tələblərinə uyğun gəlmirmi?” sualına isə Ovannisyan cavab vermək istəməyib.

Ovannisyanın qanadlı ifadələrindən birini Aysor.am erməni saytında oxumaq olar: “Bu gün erməni tərəfi 15 gün öncəkindən daha inamla hərəkət edir”.

“Mən demək istəmirəm ki, ən ağır günlər artıq arxada qalıb, bəlkə belə günlər hələ olacaq. Ancaq indi bizim özünütəşkil işi və idarəçiliyimiz daha yaxşı vəziyyətdədir.

Biz çaxnaşma, qeyri-təşkilatçılıq görmürük”, - Müdafiə Nazirliyinin nümayəndəsi deyib. Halbuki, erməni KİV-i Ermənistan və Qarabağ arasında yeganə yolun bağlandığını bildirirlər.  Yaxınlıqdakı yüksəkliyə çıxmış Azərbaycan ordusunun atəşi səbəbindən “Laçın dəhlizi” ilə təhlükəsiz gediş mümkün olmayıb. Erməni ordusunun bütün işğalçı korpusu Qarabağ tələsinə düşüb.--0--