Media-icmal 07.04.21

“Bizimyol.info”  saytı  “Hazırkı taksi xidmətləri kimi razı salır, kimi narazı: Boykot, yoxsa alqış...” sərlövhəli məqalədə “taksi şirkəti-sürücü” problemlərini müzakirəyə çıxarır.

Məsələnin mahiyyəti ondan ibarətdir ki, Azərbaycanda çoxları taksi xidmətinin ucuz olduğu düşüncəsindədir, amma ekspertlər bunun əksini deyirlər.

Onların fikrincə,   ölkədə taksi xidməti ucuz deyil, əksinə bahadır: “Taksinin ucuz olduğunu iddia edənlər yalan deyirlər. Bunu taksi xidmətlərini ələ almaq istəyənlər deyirlər. Monopoliya yaratmağa, istədikləri qiymətləri qoyaraq vətəndaşları da soymağa çalışırlar”, - ekspertlər bəyan edirlər.

Ekspertlər deyirlər ki, taksidə hər kilometrə xidmət 50-70 qəpikdir,  “Bolt” və “Uber” taksi xidmətlərində qiymətin nisbətən ucuz olmasını bu şirkətlərin sürücüyə maaş vermələrilə əlaqələndirirlər.

Sahə ekspertləri hesab edirlər ki, taksi şirkətləri qanundakı boşluqlardan istifadə edərək qeydiyyatdan qanunsuz keçiblər və buna görə də keyfiyyətli xidmət yox, qiymət üzərindən bir-biri ilə rəqabət aparırlar.

Ekspertlər belə bir məqama toxunurlar ki, şirkətlərin avtomobilləri var,  pulu olan şəxslər maşınlar alaraq şirkətə qoşurlar və ümumilikdə bazarı belə ələ alırlar.

Onların deməsinə görə, bir çox sürücülər isə məcburiyyət qarşısında qalaraq qoşulub işləyir ki, evinə çörək pulu apara bilsin. Digər tərəfdən isə bu şirkətlərin arxasında qeyri-rəsmi qaydada oliqarxlar dayanırlar.

Taksi şirkətlərinin sürücülərə haqsızlığına gəlincə, sürücülərin şikayətləri eşidilmir, onlarla müqavilə imzalanmır, yüksək faiz tutulur, sürücülər seçim hüququndan məhrum edilir, haqsız olaraq cərimələnirlər. 

Sürücülərn tələbi isə budur ki, istismar olunmalarına son qoyulsun, ən azından benzinin 70 qəpik olduğu vaxtda verilən 73 nömrəli qərarda hesablanmış qiymət tətbiq edilsin.

“Yeniçağ.az”  saytı isə "Koronavirusa yoluxma sayında artımın əsas səbəbi məktəblərin fəaliyyəti deyil” - ekspertdən etiraz” sərlövhəli məqalədə koronavirus infeksiyasına yoluxmanın artması səbəbləri araşdırılır.

Təhsil eksperti Adil Vəliyev birmənalı olaraq deyir ki, pandemiya ilə bağlı qaydalara riayət edilmədiyi üçün fevralın əvvəlindən başlanmış əyani təhsilə fasilə verilərək distant təhsilə keçmək zərurəti yarandı.  

“Yoluxmanın sayının artmasına səbəb məktəblərin əyani təhsilə keçməsi yox, pandemiya ilə bağlı qaydalara əməl olunmaması, ictimai yerlərdə qaydaların düzgün təşkil edilməməsidir”, - ekspert vurğulayır.  

Adil Vəliyevə görə, əyani təhsilə keçidlə bağlı qərar doğru olsa da qaydalara əməl olunmaması yenidən Bakı, Gəncə, Sumqayıt, Şəki şəhərlərində və Abşeron rayonunda təhsili distant formata keçirdi: “Ümumilikdə virusa yoluxma sayının məhz məktəblərdə əyani təhsilə keçidlə bağlı artdığını düşünmürəm. Çünki kafe və restoranlarda sosial məsafəyə əməl edilməməsi, maskadan istifadə olunmaması halları müşahidə edilir”, - ekspert yoluxma artımına səbəb göstərir.

Ekspertə görə, dərslərin ənənəvi qaydada davam etməsi pandemiya qaydalarına əməl etməkdən keçir.

“Azpolitika.info”   saytı “Prezidentin fərmanından 2 il ötdü - Azərbaycan məhkəmələrində nələr dəyişib?” sərlövhəli məqalədə  məhkəmə-hüquq sahəsində görülən islahatlardan danışılır.

Müəlllif yada salır ki, prezident İlham Əliyevin məhkəmə-hüquq sistemində islahatların dərinləşdirirlməsinə dair 2019-cu ilin aprelində imzaladığı fərmandan iki il ötür.

Hüquqşünas-ekspert Hafiz Həsənov fərmanın imzalanmasından ötən müddətdə görülmüş işlər haqda deyir ki, cinayətlərin dekriminallaşdırılması sahəsində bəzi tədbirlər həyata keçirilib, inzibati-iqtisadi məhkəmələr bazasında kommersiya məhkəmələri yaradılıb, məhkəmə tərəflərinin ekspertiza təyin etməklə bağlı hüquqları bir qədər genişləndirilib, audioyazı aparılması ilə bağlı müəyyən tədbirlər görülüb və s.    

Eyni zamanda eskpertə görə, nəzərdə tutulan xeyli əhəmiyyətli məsələlər  indiyə kimi həllini tapmayıb.   

Onun deməsinə görə, ədalət mühakiməsinin prinsirplərinə əməl edilməsi, məhkəmələri fəaliyyətinə müdaxilələrin qarşısının alınması, müdaxilələrə görə məsuliyyətin artırılması, qeyri-prosessual münasibətlərin yolverilməzliyinin təmin edilməsi, sistemli xarakter daşıyan nöqsanların aradan qaldırılması, məhkəmə qərarlarının icrası, icra məmurlarının süründürməçilik və sui-istifadə hallarına yol vermələrinin qarşısının alınması və s. kimi fundamental məsələlər öz həllini tapmayıb: “Bütün bunlardan irəli gələrək hesab edirik ki, ötən 2 il ərzində fərmanın nəzərdə tutduğu məqsədə- ədalət mühakiməsini  keyfiyyət və səmərəliliyinin arıtıtlmasına nail olunmayıb”, - H.Həsənov bildirir. 

“Moderator.az” saytı isə "Həbs edilən generallar istintaq üçün yeri gələrsə, açar fiqurlar ola bilər...” sərlövəhli məqalədə bu günlərdə keçmiş Milli Təhlükəsizlik Nazirliyi generalları Mövlan Şıxəliyevin və Nizami Şirinovun həbslərini təhlükəsizlik məsələləri üzrə ekspert İlham İsmayıl şərh edir.   

Bu həbslərin bu sistemdə daha yüksək vəzifə tutmuş  şəxslərin həbslərinə səbəb ola bilməsi ehtimalı ilə bağlı eskpert bunu istisna etmir və misal olaraq ordu generalı Rövşən Əkbərovun həbsini göstərir. Bu mənada İlham İsmayıla görə, indiki halda Mövlan Şıxəliyevin, Nizami Şirinovun həbsi yeni həbslərə açar fiqurlar ola bilər. 

Ekspert belə həbslərin tezliklə ola biləcəyi barədə qəti fikir ifadə etmir. 

Ekspert bu həbslərin bu yaxınlarda generallar Rövşən Əkbərovun və Nəcməddin Sadıkovun ordudan kənarlaşdırılması ilə bağlı ola bilməsi haqda deyir ki, həbs olunanlardan biri Milli Təhlükəsizlik Nazirliyi Hərbi Əks-kəşfiyyat İdarəsinin rəisi olub və bu mənada  həmin versiya mümkündür: “Ordu daxilində neqativ halların aşkar edilməsindən tutmuş cinayət əməllərinin zamanında  aşkar edilməsi, uyğun tədbirlərin görülməsi Hərbi Əks-kəşfiyyat İdarəsinin vəzifəsi idi”, - eskpert bildirir.