Media-icmal 07.10.17

Azərbaycan-Avropa İttifaqı münasibətləri, xaricdə müalicəyə axının səbəbləri, istilik təhcizatı problemi bugünkü medianın (07 oktyabr, 2017-ci il) aparıcı mövzularındandır.

Genişlənən əməkdaşlıq: Azərbaycan-Avropa İttifaqı

"Azərbaycan " qəzeti "Avropa İttifaqı Azərbaycanla əməkdaşlığı genişləndirir" (http://www.azerbaijan-news.az/index.php?mod=3&id=131333) sərlövhəli məqalədə tərəflər arasında münasibətləri dəyərləndirir.

Məqalədə Avropa İttifaqı (Aİ) ilə əsası 1993-cü ildən qoyulan diplomatik münasibətlərin son illərdə yeni mərhələyə keçdiyi vurğulanır.

Müəllif 2006-cı ilin noyabrında Avropanın "Yeni qonşuluq siyasəti üzrə fəaliyyət planı" nın təsdiq edildiyini və sənəddə Aİ-nın Azərbaycanın ərazi bütövlüyünü tanıdığını bir daha bəyan etdiyini vurğulayır: "Sənəddə Avropa qonşuluq siyasətinin əsas istiqamətləri - iqtisadi inteqrasiya, mütəmadi siyasi və mədəni əlaqələr, eləcə də sərhəd əməkdaşlığı nəzərdə tutulmuşdur".

Müəllif deyir ki, bu Plan çərçivəsində Azərbaycan Aİ-nın daxili bazarlarına çıxış kvotası, işçi, əmtəə, xidmət, investisiya-kapital resurslarının sərbəst dövriyyə imkanını əldə edib.

Müəllif vurğulayır ki, 2015-ci ilin noyabrında bəzi "antiislam, antitürk və antiazərbaycançı qüvvələr" Aİ ilə münasibətləri zədələyiblər, bu münasibətlər bir də 2016-cı ildə bərpa edilib.

Məqalədə deyilir ki, rəsmi Bakı Aİ ilə əməkdaşlığa dair assosiativ üzvlük sazişini imzalamayıb, bunun əvəzinə yeni strateji sənəd təqdim edib və hazırda bu sənədin üzərində iş gedir: "Azərbaycan və Aİ arasında əməkdaşlıqda mühüm mərhələ başlanıb və bu əlaqələr Azərbaycanla yanaşı Avropa üçün də kifayət qədər əhəmiyyətlidir", müəllif bu münasibətləri belə dəyərləndirir .

Müəllif deyir ki, prezident İlham Əliyevin bu günlərdə Aİ Şurasının Siyasi və Təhlükəsizlik Komitəsinin nümayəndə heyətini qəbul etməsi də əlaqələrin inkişafından xəbər verir.

Müəllifə görə, adı çəkilən görüşdə tərəflər münasibətlərin indiki səviyyəsindən razılıq ifadə ediblər.

Məqalədə Aİ-nın Azərbaycanın əsas xarici ticarət tərəfdaş olması, 2016-cı ildə Azərbaycanın xarici ticarətindəki payının 35 faiz, 2017-ci ilin 4 ayında isə 38 faiz təşkil etdiyi, son 10 ildə Azərbaycanda əsas kapitala təqribən 20 milyard dolları investisiya yatırdığı, Azərbaycanda Aİ-nin 1300-dən çox şirkətinin fəaliyyət göstərdiyi yada salınır.

Müəllif deyir ki, Azərbaycan və Aİ arasında imzalanması gözlənilən saziş əməkdaşlığın yeni mərhələyə keçməsinə imkan yaradacaq.

Cəzasızlığın xaricə "axın" istiqaməti

"Exo" qəzetində isə "Azərbaycanda həkim səhvləri xaricdə müalicəyə təhrik edir" (http://ru.echo.az/?p=63297) sərlövhəli məqalə oxumaq olar.

Müəllif öncə diqqəti belə bir məsələyə yönəldir ki, səhlənkarlığa yol verən həkimlərə qarşı ciddi cəzalar tətbiq edilmir və zərər çəkən xəstələr belə həkimləri məsuliyyətə cəlb etməyin mümkünlüyünə inanmırlar.

"Həkim səhvi düzgün fəaliyyət planı seçə bilməməkdən tutmuş düzgün plan seçmiş amma ona ardıcıl əməl edilməmiş və nəticədə xəstənin zərər çəkməsinə kimi bütöv bir müstəvini əhatə edir. Buna səbəb çox şey ola bilər, həm naşılıq, həm həkimin çox işləməsi, demək olar ki, yata bilməməsi, onu əvəz edəcək həkim çatışmazlığı və s.". Bunu isə qəzetə ekspertlər şərh edirlər və deyirlər ki, Azərbaycanda vətəndaşlar belə səhvlərlə tez-tez rastlaşırlar.

Ekspertlərə görə, həkim səhlənkarlığı nəticəsində xəstəyə kompensasiya belə ödənilmir, laqeydlik göstərilir və əksər vətəndaşlar bu səbəbdən xaricdə müalicə almağa üstünlük verirlər: "Problem cəzasızlıqdadır, kifayət qədər hallar var ki, həkim səhlənkarlığı səbəbindən çoxları şikəst olurlar və ya dünyalarını dəyişirlər". Bu da ekspertlərin gəldikləri qənaətdir.

Ekspertlər hesab edirlər ki, həkim səhlənkarlığı sübut olunduqda cəzalandırılmaları vacibdir, əks halda bu səhlənkarlığa son qoyulmayacaq və həkimlərə cəza növlərindən biri kimi müəyyən müddətə həkim fəaliyyətinin qadağan olunmasını göstərirlər.

Digər tərəfdən də ekspertlər vurğulayırlar ki, əgər qanun işləməyəcəksə ora cəzalanma ilə bağlı maddələr salmağın da əhəmiyyəti yoxdur: "Həkimlər cəzasız qalacaqlarını bilirlər, ona görə də xəstələrin keyfiyyətsiz xidmətə görə onları məhkəməyə vermələrindən belə qorxmurlar".

Ekspertlər bu məsələdə daha da dərinə gedərək burada korrupsiyanın da öz rolunu oynadığını deyirlər, belə ki, bir çox tibb klinikaları öz əməkdaşlarına havadarlıq edir, öz növbəsində sadə vətəndaşlara da həkimləri məsuliyyətə cəlb etməyin çox çətin olduğunu anladırlar və sadə vətəndaşlar da məhkəmələrə müraciət etmirlər, nəticədə fəaliyyətsizlik cəzasızlığı doğurur.

Ekspertlər Azərbaycanda həkim səhvlərinə dair statistikanın yoxluğunu, amma istənilən halda belə statistikanın dəqiq olmayacağını deyərək bu sahədə səhlənkarlığın həddini müəyyən etməyin mümkünsüzlüyünü bildirirlər, digər tərəfdən, daha bir səbəb kimi yerli xəstələrin öz hüquqları barədə məlumatlarının Qərb ölkələri bir yana, bəzi postsovet ölkələrilə müqayisədə də çox aşağı olmasıdır.

Qışın "istilik dərdi"

"Novoye Vremya" qəzetində isə "Qışda mənzillərimiz isti olacaqmı?" (http://www.novoye-vremya.com/w107535/.../#.WdfcDWi0PIU) sərlövhəli məqalə diqqəti cəlb edir.

Müəllif deyir ki, havaların soyuması ilə mənzillərin qızdırılması məsələsində "qaz olacaqmı?" sualının düşüncədən gündəmə kimi bütöv bir müstəvini əhatə edir: "Soyuqlar artdıqca qazın təzyiqi də azalır, Bakı, Sumqayıt, Abşeronda artıq qazın aşağı təzyiqlə gəlməsindən yox, bir neçə gündür ki,verilməməsindən şikayət edirlər".

Müəllif deyir ki, hələ indidən soyuqlar mənzillərdə istilik verilməsinə ehtiyac yaradıb, odur ki, mərkəzləşdirilmiş qızdırıcı sistemin necə işləyəcəyi də bir məsələdir: "Yenə də qızdırılma sisteminin qapını kəsdiyi vaxt məlum olur ki, "Azəristiliktəchizat" "Azəriqaz" a borcludur və 89,532 milyon manat borcu ödəməyi tələb edir".

Bundan irəli gələrək müəllif bu qurumun bu il də əhaliyə səmərəli xidmət göstərəcyinə inamsızlıq bildirir, "Azəriqaz"ın qazın ancaq borcu olmayan istilik qazanxanalarına veriləcəyi barədə bəyanatını xatırladır.

Müəllif daha bir problem kimi ölkədəki qaz ehtiyatının qış mövsümündə əhalinin tələbatını ödəyə bilməsini nəzərə çatdırır və deyir ki, buna əsas neft şirkətinin əhainin istehlakı üçün konsorsiumdan qazı dollarla almasıdır.

Müəllif həm də xatırladır ki, elə bununla bağlı bu ilin əvvəlində qazın əhaliyə satış tarifi qaldırılıb: "Bu il sentyabrın 1-nə yeraltı qaz anbarlarında 1,4 milyard kubmetr qaz ehtiyatı var, keçən il isə bu həcm 2,2 milyard kubmetr idi".

Müəllif bu məsələ ilə bağlı daha bir neçə rəsmi statistik rəqəm nümunə gətirərək ilbəil qaz ehtiyatının azaldığını bildirir, odur ki, qaza tələbatın yarandığı soyuq mövsümlər fəslində qazı artırmaq lazım gələndə qaz sahəsi işçiləri bütün qış mövsümündə qaza qənaət edirlər.