Media-icmal 08.04.2016

M.Əliyeva: “Onlar qəhrəman kimi yaşayacaq”

“Azərbaycan” qəzeti aprelin 2-5- arasında Qarabağ cəbhəsindəki döyüşlərdə həlak olan şəhidlərə deputat Mehrıban xanım Əliyevanın adından ehsan verilməsi mərasiminə və burada onun çıxışına yer verilir. M.Əliyeva döyüşdə həlak olan şəhidlərin anaları, xanımları qarşısında çıxışında deyib: “Əziz analar, mən bir ana kimi sizin qarşınızda baş əyirəm.”Siz elə övladlar böyütmüsünüz ki, bu gün xalq onlarla fəxr edir. Əlbəttə, heç bir ana istəməz ki, müharibə olsun, övladlarımız gənc yaşlarında dünyalarını dəyişsinlər.  Biz istəyirik ki, torpaqlarımız azad edilsin. Biz istəyirik ki, insanlarımız öz doğma yurdlarına qayıtsın. Biz işğalçı deyilik, biz işğalla mübarizə aparan millətik.

Azərbaycan xalqı üçün hər bir əsgərimiz dəyərlidir və əzizdir. Dünyanın ən böyük sərvəti olan ömrünü Vətən naminə qurban verən hər bir övladımız Azərbaycnın tarixində qəhrəman kimi yaşayacaq”.

Korrupsiya və rüşvət önlənməyincə...

Deputat Vahid Əhmədov “Antidempinq, kompensasiya və mühafizə tədbirləri haqqında” qanun layihəsini mahiyyəti və yazılıış stilistikasına görə ciddi tənqid edib. “Azadlıq” qəzetində dərc edilən “Deputatdan antidempinq qanununa sərt etiraz” adlı məqalədə belə deyilir.

“Mən buna iradlarımı bildirdim, çünki həddindən artıq qəliz yazılıb, heç nə başa düşmək olmur. Bunu elə yazın ki, heç olmasa biz mütəxəssislər bunu başa düşə bilək”. Deputat bunu sənədin yazılış dili ilə bağlı söyləyib.

Bu sənəd daxili bazarı qorumağı, dempinqə məruz qalan məhsulların miqdarını azaltmağı nəzərdə tutur. Bunun ardınca deputat Azərbaycanın dempinqə məruz qala biləcək məhsullarının miqdar və məbləğinin hansı həcmdə olmasının bilinməsini vacib sayır və deyir: “Hər halda bunu bilənlər var, onlar bunu açıqlasınlar. Bəlkə, heç dempinqə məruz qalan məhsulumuz yoxdur, bəlkə heç bu qanuna ehtiyac qalmayıb”

Azərbaycanın Ümumdünya Ticarət Təşkilatına (ÜTT) üzv olmağa hazırlaşdığını deyən deputat o zaman bu qanunun ÜTT-nin tələblərinə uyğun hazırlanmasının lazım gəldiyini vacib sayır. “Ona görə, yenə soruşuram ki, bunu haradan köçürmsünüz, Rusiyanın qanunundanmı, ya başqasındanmı?”.

Daha sonra deputat indiki vəziyyətlə bu qanun layihəsini ikinci oxunuşun müzakirəsinə çıxarmağın tərəfdarı olmadığını, parlamenin plenar iclasının ikinci  oxunuşuna kimi sənədi təkmilləşdirməyi vacib saydığını deyir.

Məqalədə bu məsələ ilə bağlı ekspert fikirlərinə də yer verilir. Belə ki, ekspertlərin fikrincə, qanunun qəbulunda məqsəd yerli istehsalçılara dəstək vermək deyil. “Azərbaycanda daxil istehsal tələbatı ödəyəcək səviyyədə deyil, bunun da səbəbi ölkədə həm idxal mafiyasının mövcudluğu, həm də korrupsiya və rüşvətin hökm sürməsidir”. Ekspertlərə görə,    hökumət korrupsiya və rüşvətin qarşısını almayınca yerli istehsalın əhəmiyyətli dərəcədə artacağı real görünmür.

Çimərliklər zəbt edilib, nə edək?

“Exo” qəzeti qarşıda yay fəslinin, çimərlik zamanının gəlməsi fonunda Xəzər çimərliklərinə çıxışın durum araşdırılır.

“Çimərliklərin “zəbt olunması davam edir” adlı məqalədə bu sahədə vəziyyətin ağır olması, dəniz sahillərinin hasarlnmasının qüvvədə qaldığı deyilir.

“Sahil boyu hasarlar sökülməyib, odur ki, bu il çiməriklərə problemsiz daxil olmaq mümkün görünmür. Lap bu günlərdə dəniz boyu gəzdim, istirahət, çimərlik üçün nəzərdə tutulan yerlər hasardadır və hətta irihəcmli cərimələr belə qanun pozucularını qorxutmur”. Bunu isə Azad İstehlakçılar Birliyinin sədri Eyyub Hüseynov deyir.

 E.Hüseynov qanun qəbul edilməzdən öncə pozucuların kim olmasına dair “monitorinq” aparılmasını vacib sayır. Onun fikrincə, bununla aydın olacaq ki, bunu edənlər kimdır və qanun pozucuları hansı ranqın yiyələridir. E.Hüseynov qanunun yerinə yetirilməməsinə də toxunub. “Əgər qanun yerinə yetirilmirsə bu, artıq korrupsiyanın əlamətidir”.

Ekspert Telman Zeynalov bütün çimərliklərin yalnız 10%-nə vətəndaşların çıxışı olduğunu, qalanların isə biznes adamları tərəfindən zəbt edildiyini nəzərə çatdırır.

Daha sonra məqalədə qanunvericlikdə bu qanun pozuntularına görə nəzərdə tutulan irihəcmli cərimələr hadqa danışılır.

Hökumət nəyi gözləyir?

“Novoye Vremya” qəzeti ölkə iqtisadiyyatının ağır durumu barədə yazır. “Dünya Bankından təsəlliverici olmayan proqnoz” adlı yazıda bu araşdırılır. Həm də iqtisadiyyatın şaxələnə bilməməyəcəyinə əsas kimi ölkənin əsas gəlir mənbəyi olan neftin dəyərinin hələ də aşağı olması göstərilir. “Başqa maliyyə mərkəzlərinin də fikirləri oxşardır, təəccüblü deyil ki. onlar da öz proqnozlarının neftin qiymətilə əlaqələndirirlər. Görünür, maliyyə mərkəzləri də sürətli templə iqtisadiyyatın şaxələnməsinə yeni vüsət veriləcəyinə inamırlar”.

Digər tərəfdən, məqalədə Dünya Bankının bədbin proqnozu da yer alır. “Əgər bankın proqnozları builki büdcə üçün özünü doğrultsa, qarşıdakı illərdə iqtisadiyyatın artımına nail olmaq daha da çətinləşəcək.”

Yazıda neftin qiymətinin yenidən qalxacağı yönündə rəsmi Bakının gözləntiləri əsassız sayılır və bütün bunlardan sonra məqalədə hakimiyyət ciddi tənqidə məruz qoyulur. “Niyə indiyə kimi ölkənin böhrandan çıxması üçün plan yoxdur? Belə düşünmək olar ki, Nazirlər Kabineti neftin qiymətinin artmasını gözləyir. Nazirlər Kabinetinin belə fəaliyyətsizliyi ilə iqtisadiyyat Dünya Bankının göstərdiyi faizlərdən də çox azala bilər. Yəni, bu, aydın deyilmi?”.